ជន​ប្រមឹក​ដុត​ផ្ទះ​បង​ដើរ​អុកឡុក​គេ​អ្នក​ភូមិ​និង​គ្រួសារ​ចង់​ដាក់​គុក​ឲ្យ​រាង


បន្ទាយ​មាន​ជ័យៈ ជន​សង្ស័យ​ដែល​ស្រវឹ​ងស្រា​ដុត​ផ្ទះ​បង​នៅ ស្រុក​ព្រះ​នេត្រ​ព្រះ ត្រូវ​សមត្ថកិច្ច​ខេត្ត​បញ្ជូន​ទៅ​តុលាការ ខេត្ត​បន្ទាយ​មាន​ជ័យ នៅ​ថ្ងៃ​ចន្ទ​នេះ បន្ទាប់​ពី​ប្រគល់​ឲ្យ​សាច់​ញាតិ​និង​សហគមន៍​យក​ទៅ​អប់រំ វិញ​តែ​ត្រូវ​បដិសេធ​មិន​ទទួល​យក។

លោក សិទ្ធ លាស់ ស្នងការ​រង ខេត្ត​បន្ទាយ​មាន​ជ័យ ឲ្យ​ដឹង​ថា ជន​ស្រវឹង​ដុត​ផ្ទះ​នគរបាល​ខេត្ត​ពី​ព្រឹក​ថ្ងៃ​អាទិត្យ​គិត​ប្រគល់​ឲ្យ​សាច់​ញាតិ​យក​ទៅ​អប់រំ​តែ​ទាំង​គ្រួសារ​និង​សហគមន៍​បាន​បដិសេធ​មិន​យក​ទេ។

លោក​ថា៖ «ដូច្នេះ​មាន​តែ​កសាង​សំណុំ​រឿង​បញ្ជូន​ទៅ​តុលាការ​ហើយ​យ៉ាង​ម៉េច​យ៉ាង​ម៉ា​ក៏​ស្រេច​តែ​តុលាការ​ទៅ​ចុះ»។

សមត្ថកិច្ច ស្រុក​ព្រះ​នេត្រ​ព្រះ ឲ្យ​ដឹង​ថា ឈ្មោះ ចឹម វិចិត្រ អាយុ ២៨​ឆ្នាំ នៅ ភូមិ-ឃុំ​រហាល ស្រុក​ព្រះ​នេត្រ​ព្រះ ខេត្ត​បន្ទាយ​មាន​ជ័យ ផឹក​ស្រា​ស្រវឹង​រួច​ទៅ​រក​រឿង​បង​ថ្លៃ និង​បាន​ដុត​ផ្ទះ​ឈើ​ប្រក់​ស័ង្កសី ១ ខ្នង​ឆេះ​ម៉ដ្ឋ​ហើយ​ជន​ប្រមឹក​រូប​នេះ​ក៏​បាន​ទៅ​ដុត​ផ្ទះ​បង​ឯង​បន្ត​ទៀត​តែ​ត្រូវ​អ្នក​ភូមិ​ជួយ​ពន្លត់​ទាន់។

សមត្ថកិច្ច​ស្រុក​អះអាង​បន្ត​ថា ដោយសារ​តែ​ជន​សង្ស័យ​ញៀន​ស្រា​ឡប់​សតិ​មិន​ដឹង​ខុស​ត្រូវ​ទៅ​ហើយ នោះ​ក្រុម​គ្រួសារ​បាន​ប្តឹង​ឲ្យ​សមត្ថកិច្ច​មក​ឃាត់​ខ្លួន​បំណង​ឲ្យ​នាំ​យក​ជន​ស្រវឹង​ខួប​នេះ​ទៅ​ដាក់​នៅ​ពន្ធនាគារ​ឲ្យ​រាង​ចាល ព្រោះ​ជន​ម្នាក់​នេះ​តែង​បង្ក​ការ​អុកឡុក​អ្នក​ភូមិ​គ្មាន​លោះ​ថ្ងៃ​ទេ៕

ព័ត៌មានថ្មីៗ