ជម្លោះ​តិចតួច​ឈាន​ដល់​បាញ់​នឹង​ស្នា​ស្លាប់​នៅ​ព្រះវិហារ


ព្រះវិហារៈ ជន​សង្ស័យ​ម្នាក់​ត្រូវ​សមត្ថកិច្ច​កសាង​សំណុំ​រឿង​បញ្ជូន​ទៅ​តុលាការ ខេត្ត​ព្រះវិហារ នៅ​ថ្ងៃ​ព្រហស្បតិ៍​នេះ បន្ទាប់​ពី​ជន​សង្ស័យ​យក​ស្នា​បាញ់​សត្វ​ព្រៃ​បាញ់​ត្រូវ​ចំ​ក្បាល​បុរស​ម្នាក់​ប្រកាច់​ស្លាប់​នៅ​នឹង​កន្លែង​កាល​ពី​យប់​ថ្ងៃ​អង្គារ​នៅ ភូមិ​បរិបូរណ៍ ឃុំ​ត្បែង​ពីរ ស្រុក​គូលែន ខេត្ត​ព្រះវិហារ។

លោក យាង សំភួត អធិការ​រង​នគរបាល ស្រុក​គូលែន បាន​ឲ្យ​ដឹង​ថា ជន​សង្ស័យ​ដែល​ប្រើ​ស្នា​បាញ់​សត្វ​ឈ្មោះ ថេន ធាង ភេទ​ប្រុស អាយុ ៥៣​ឆ្នាំ បាញ់​ត្រូវ​អ្នក​ភូមិ​ជាមួយ​គ្នា​ឈ្មោះ ហេង សាន អាយុ ៤៤​ឆ្នាំ នៅ​វាល​ចម្ការ​ក្នុង ភូមិ​បរិបូរណ៍ ឃុំ​ត្បែង​ពីរ ស្រុក​គូលែន ខេត្ត​ព្រះវិហារ ស្លាប់​នឹង​កន្លែង​នោះ ក្រោយ​ពី​ត្រូវ​ចាប់​ខ្លួន ឥឡូវ​សមត្ថកិច្ច​បញ្ចប់​ការ​ស៊ើប​សួរ​និង​កសាង​សំណុំ​រឿង​រួច​ហើយ ហើយ​នឹង​បញ្ជូន​ទៅ​តុលាការ ខេត្ត​ព្រះវិហារ នៅ​ថ្ងៃ​ព្រហស្បតិ៍​នេះ។

លោក​ប្រាប់​ថា៖ «បទល្មើស​ជាក់ស្តែង​បែប​នេះ ជន​ល្មើស​នឹង​ត្រូវ​តុលាការ​ចោទ​ប្រកាន់​ហើយ​គាត់​ត្រូវ​តែ​មាន​ទោស។ ក្នុង​កំណត់​ហេតុ​សមត្ថកិច្ច​ជន​សង្ស័យ​ត្រូវ​បាន​ចោទ​ពី​បទ​ឃាតកម្ម​ដោយ​ចេតនា»។

លោក​ឲ្យ​ដឹង​ថា រវាង​ជន​សង្ស័យ​និង​ជន​រងគ្រោះ​ធ្វើ​ចម្ការ​និង​រស់​នៅ​ក្បែរ​គ្នា ហើយ​អ្នក​ទាំង ២ នាក់​ពេល​ជួប​គ្នា​ចេះ​តែ​ជេរ​និង​និយាយ​ដៀម​ដាម​ដាក់​គ្នា ទើប​កើត​ទំនាស់​ឈាន​ដល់​ការ​បាញ់​សម្លាប់​គ្នា​បែប​នេះ។

លោក​បន្ត​ថា មុន​ពេល​កើត​ហេតុ​កូន​ជន​រងគ្រោះ​បាន​មក​លេង​ក្បែរ​ខ្ទម​ជន​ដៃ​ដល់​ដែល​បាន​ហាម​កូន​ជន​រងគ្រោះ​ថា កុំ​ឲ្យ​មក​ក្បែរ​រោង​គាត់ ព្រោះ​ចេះ​តែ​បាត់​ស្ករ​និង​ប៊ីចេង។ ក្មេង​នោះ​ក៏​រត់​ទៅ​ប្រាប់​ឪពុក​ជា​ជន​រងគ្រោះ​ធ្វើ​ឲ្យ​ផ្ទុះ​កំហឹង​ឡើង គាត់​ក៏​ស្ទុះ​ដើរ​សំដៅ​ទៅ​ខ្ទម​ជន​ល្មើស​តែ​ដោយ​ដឹង​ខ្លួន​មុន​គូ​បដិបក្ខ​ក៏​ចេញ​ទៅ​ស្ទាក់​ផ្លូវ​ចាំ​ជា​ស្រេច និង​ទាស់​សម្តី​គ្នា។

លោក​អធិការ​រង​បន្ត​ថា ជន​សង្ស័យ ថេន ធាង បាន​ហាម​ជន​រងគ្រោះ ហេង សាន ថា កុំ​ឲ្យ​ចូល​ទៅ​ជិត​ខ្លួន​និង​ឲ្យ​ត្រឡប់​ទៅ​ខ្ទម​វិញ​តែ ហេង សាន មិន​ព្រម​ទៅ ពេល​នោះ ថេន ធាង ក៏​បាញ់​ជន​រងគ្រោះ​ត្រូវ​មួយ​ព្រួញ​ស្នា​ចំ​ក្បាល​លិច​មួយ​ចង្អុល​ដៃ​ដួល​ប្រកាច់​ស្លាប់​នៅ​នឹង​កន្លែង។ ជន​សង្ស័យ​បាន​ព្យាយាម​គេច​ខ្លួន​ដែរ តែ​ត្រូវ​សមត្ថកិច្ច​មក​ឃាត់​ខ្លួន​បាន​មុន​ពេល​រត់​គេច៕

ព័ត៌មានថ្មីៗ