តុលាការ​កំពូល​ជម្រះ​រឿង​សុំ​នៅ​ក្រៅ​ឃុំ​ជន​ជាប់​ចោទ​បង្ក​ហិង្សា​មុខ​វត្ត​ស្ទឹង​មាន​ជ័យ


20140403_10b
ជនជាប់ចោទបង្កហិង្សាពេលប៉ូលិសឃុំខ្លួន រូប SHANE WORRELL

ភ្នំពេញៈ សំណុំ​រឿង​បាតុកម្ម​របស់​កម្មករ​រោងចក្រ SL ដែល​បង្ក​ហិង្សា​ដុត​ឡាន​និង​ម៉ូតូ​ប៉ូលិស​នៅ​មុខ​វត្ត ស្ទឹង​មាន​ជ័យ ខណ្ឌ​មាន​ជ័យ កាល​ពី ខែ​វិច្ឆិកា ឆ្នាំ​២០១៣ ត្រូវ​តុលាការ​កំពូល​លើក​មក​ជំនុំ​ជម្រះ​កំបាំង​មុខ​លើ​បណ្តឹង​សារទុក្ខ​សុំ​នៅ​ក្រៅ​ឃុំ​កាល​ពី​ព្រឹក​ថ្ងៃ​ពុធ។

តាម​អង្គហេតុ​បញ្ជាក់​ថា មន្រ្តី​នគរបាល ៦ រូប​បាន​ប្តឹង​ជន​ជាប់​ចោទ​បី​នាក់​មាន​ឈ្មោះ វ៉ាន់ នី និង វ៉ាន់ នន (ជា​បង​ប្អូន) ហើយ​និង​ឈ្មោះ មាស នន អាយុ ១៨​ឆ្នាំ (ត្រូវ​ដោះលែង​វិញ) ពាក់​ព័ន្ធ​នឹង​អំពើ​ហិង្សា​និង​បំផ្លិច​បំផ្លាញ​សម្បត្តិ​សាធារណៈ​និង​ជេរ​ប្រមាថ​មន្រ្តី​សាធារណៈ នៅ​ក្នុង​ក្រុម​បាតុកម្ម កម្មករ​រោងចក្រ SL នៅ​មុខ​វត្ត ស្ទឹង​មាន​ជ័យ ពី​ថ្ងៃ ទី​១២ វិច្ឆិកា ២០១៣។

សំណុំ​រឿង​នេះ ត្រូវ​សាលា​ដំបូង​រាជធានី​ភ្នំពេញ​បដិសេធ​ការ​សុំ​នៅ​ក្រៅ​ឃុំ​របស់​ជន​ជាប់​ចោទ​នៅ​ថ្ងៃ​ចាប់​ខ្លួន។ ប៉ុន្តែ ជន​ជាប់​ចោទ​បាន​ប្តឹង​ទាស់​មក​ឧទ្ធរណ៍​ហើយ​នៅ​ថ្ងៃ ទី​៥ ខែ​ធ្នូ ឆ្នាំ​២០១៣ ត្រូវ​សាលា​ឧទ្ធរណ៍​តម្កល់​សេចក្តី​សម្រេច​សាលា​ដំបូង​ទុក​ដដែល​និង​បង្គាប់​ឲ្យ​ដោះលែង​ឈ្មោះ មាស នន ឲ្យ​នៅ​ក្រៅ​ឃុំ​តែ​ដាក់​ឲ្យ​នៅ​ក្រោម​ការ​ឃ្លាំ​មើល​របស់​តុលាការ​និង​ហាម​មិន​ឲ្យ​ចូល​រួម​ក្នុង​សកម្មភាព​បាតុកម្ម​ណា​ទៀត​ឡើយ។

លោក និប វិបូ អធិការ​រង ខណ្ឌ​មាន​ជ័យ តំណាង​ឲ្យ​នគរបាល ខណ្ឌ​ទួលគោក និង​ខណ្ឌ​ដង្កោ ដែល​ជា​ដើម​បណ្តឹង​បាន​ថ្លែង​ក្នុង​សវនាការ​ថា ព្រឹត្តិការណ៍​បាតុកម្ម​ហិង្សា​នោះ​បាន​កើត​ឡើង​នៅ​ម៉ោង ៨ កន្លះ​ព្រឹក ខណៈ​លោក​ដឹក​នាំ​កម្លាំង​ប្រមាណ ៦០ នាក់​ទៅ​ទប់។

លោក​ថា ក្នុង​បាតុកម្ម​ហិង្សា​នោះ​បាតុករ​បាន​ចាប់​ខ្លួន​មន្ត្រី​នគរបាល ៧ នាក់​ធ្វើ​ជា​ចំណាប់​ខ្មាំង។ ក្នុង​ពេល​នោះ​លោក​ចូល​ទៅ​រំដោះ​ពួកគេ​បាន ២ នាក់​មក​វិញ​តែ​ត្រូវ​ក្រុម​បាតុករ​បាញ់​ចម្ពាម​កៅស៊ូ​ត្រូវ​របួស​សន្លប់​ហើយ​ត្រូវ​អ្នក​រត់​ម៉ូតូ​ឌុប ឌុប​មក​កាន់​មន្ទីរពេទ្យ វិសាលសុខ។

លោក​ប្រាប់​ថា៖ «បាតុកម្ម​នោះ​មិន​មែន​បុគ្គល​ធ្វើ​ទេ គឺ​មាន​មេ​សហជីព​ដឹក​នាំ​ឲ្យ​ធ្វើ​ប៉ុន្តែ ពេល​ចាប់​ខ្លួន​ចាប់​បាន​តែ​អ្នក​ផ្សេង ឯ​មេខ្លោង​រត់​គេច​អស់។ គាត់​ស៊ី​លុយ​ប្រាក់​ខែ​កម្មករ​មួយ​ខែ ៦ ដុល្លារ​និង​យក​លុយ​ពី​ថៅកែ​រោងចក្រ​ទៀត​តែ​កម្មករ​យើង​ល្ងង់​ចេះ​តែ​ធ្វើ​តាម​គេ។ ខ្ញុំ​មិន​ចង់​ចាប់​គាត់​ទេ តែ​ច្បាប់​អ្នក​ណា​ធ្វើ​អ្នក​នោះ​ត្រូវ​មាន​ទោស»។

កញ្ញា សេរីវុធ ចរិយា មេធាវី​ការពារ​ក្តី​ឲ្យ​ជន​ជាប់​ចោទ​ថ្លែង​ក្នុង​សវនាការ​ថា កូន​ក្តី​គាត់​មិន​មែន​ជា​កម្មករ​រោងចក្រ​ទេ ពួក​គេ​គ្រាន់​តែ​ជា​កម្មករ​កើប​ខ្សាច់​នៅ​ផ្ទះ​លក់​សំណង់​ជិត​នោះ​ហើយ​ពេល​កើត​ហេតុ​នោះ ពួក​គេ​ទៅ​ឈរ​មើល​គេ ក៏​ត្រូវ​សមត្ថកិច្ច​ចាប់​ខ្លួន​តែ​ម្តង។ កញ្ញា​បន្ត​ថា៖ «បើ​គាត់​ជា​អ្នក​ដុត​ឡាន​តើ​ចាំបាច់​អី​ដើរ​ទៅ​រក​ហ្វូង​ប៉ូលិស។ ខ្ញុំ​សូម​ឲ្យ​តុលាការ​ពិចារណា​ឲ្យ​គាត់​បាន​នៅ​ក្រៅ​ឃុំ​ព្រោះ​ការ​ស៊ើប​សួរ​ជាង ៤​ខែ ហើយ​តាម​ខ្ញុំ​ដឹង​បាន​បញ្ចប់​ហើយ»។

តំណាង​មហា​អយ្យការ​លោក សេង ប៊ុនឃាង បាន​ថ្លែង​ថា៖ «ខ្ញុំ​សូម​ឲ្យ​ក្រុម​ប្រឹក្សា​ពិចារណា​និង​តម្កល់​ការ​សម្រេច​របស់​តុលាការ​ថ្នាក់​ក្រោម​និង​បន្ត​ឃុំ​ខ្លួន​ជន​ជាប់​ចោទ ព្រោះ​ថា បើ​ឲ្យ​នៅ​ក្រៅ​ឃុំ​ពួក​គេ​អាច​បង្ក​បទល្មើស​ថែម​ទៀត»។

បន្ទាប់​ពី​សាកសួរ​បញ្ចប់​ចៅក្រម​ប្រកាស​ថា សាល​ដីកា​នេះ​នឹង​លើក​ទៅ​ប្រកាស​នៅ​ថ្ងៃ ទី​២៥ ខែ​មេសា។

គួរ​រំឭក​ថា កាល​ពី​ថ្ងៃ ទី​១២ វិច្ឆិកា ឆ្នាំ​២០១៣ ក្រុម​កម្មករ​រោងចក្រ អេសអិល ប្រមាណ​ជា ៣ ពាន់​នាក់ បាន​នាំ​គ្នា​ដើរ​ហែ​ក្បួន​បាតុកម្ម​ឆ្ពោះ​ទៅ​ក្រសួង ការងារ និង​ផ្ទះ​លោក​នាយក​រដ្ឋ​មន្ត្រី ដើម្បី​សុំ​អន្តរាគមន៍​ដោះស្រាយ​បញ្ហា​ជម្លោះ​ដែល​ជាប់​គាំង​រវាង​ក្រុម​កម្មករ​និង​ថៅកែ​រោងចក្រ ប៉ុន្តែ ការ​រារាំង​ក្បួន​ពួក​គេ​នៅ​មុខ​វត្ត ស្ទឹង​មាន​ជ័យ បាន​បង្ក​ឲ្យ​មាន​ហិង្សា​កើត​ឡើង ដោយ​ហ្វូង​បាតុករ​នាំ​គ្នា​ដុត​ឡាន​និង​ម៉ូតូ​ប៉ូលិស​អស់ ៤ គ្រឿង ហើយ​សមត្ថកិច្ច​ក៏​ធ្វើ​ការ​បង្ក្រាប​ដោយ​ហិង្សា ធ្វើ​ឲ្យ​ស្ត្រី​លក់​បាយ​ម្នាក់​នៅ​ជិត​នោះ​ស្លាប់​ហើយ​កម្មករ​រោងចក្រ​និង​សមត្ថកិច្ច​ប៉ូលិស​ជាច្រើន​បាន​រង​របួស។ ភ្លាមៗ​នោះ សមត្ថកិច្ច​បាន​ឃាត់​ខ្លួន​មនុស្ស ៣១ នាក់​ដែល​សង្ស័យ​ពាក់​ព័ន្ធ​ក្នុង​អំពើ​ហិង្សា​នេះ ប៉ុន្តែ ត្រូវ​បាន​ដោះលែង ២៩ នាក់​វិញ​នៅ​ថ្ងៃ ទី​១៣ វិច្ឆិកា។ ចំណែក​ជន​សង្ស័យ ៣ នាក់​ត្រូវ​ប៉ូលិស​កសាង​សំណុំ​រឿង​បញ្ជូន​ទៅ​តុលាការ៕

ព័ត៌មានថ្មីៗ