តុលាការ​កំពូល​ជំនុំ​ជម្រះ​បណ្តឹង​សុំ​នៅ​ក្រៅ​ឃុំ​របស់​លោក ហេង ឈាង


20140403_09
លោក ហេង ឈាង និងសាច់ញាតិរង់ចាំឡើងសវនាការ នៅតុលាការកំពូល ហេង ជីវ័ន

ភ្នំពេញៈ សំណុំ​រឿង​លោក ហេង ឈាង អគ្គ​នាយក​រង ក្រុមហ៊ុន អានកូ ប្រាឌ័រ ដែល​ប្តឹង​ចោទ​ពី​បទ​កេង​បន្លំ​ប្រាក់​ក្រុមហ៊ុន​ពី​សំណាក់​លោក​ឧកញ៉ា កុក អាន ជា​ប្រធាន​នោះ កាល​ពី​ថ្ងៃ​ពុធ ត្រូវ​តុលាការ​កំពូល​លើក​ប្តឹង​សារទុក្ខ​ប្រឆាំង​នឹង​ការ​សម្រេច​របស់​តុលាការ​ថ្នាក់​ក្រោម​ដែល​ដាក់​ពន្ធនាគារ​គាត់ ៣​ឆ្នាំ មក​ជំនុំ​ជម្រះ។

លោក ហេង ប្រីយ៉ា ចៅក្រម​របាយ​ការណ៍​ថ្លែង​ឲ្យ​ដឹង​ថា ជន​ជាប់​ចោទ​ឈ្មោះ ហេង ឈាង ជា​អគ្គ​នាយក​រង​ក្រុមហ៊ុន អានកូ ដែល​លោក​ឧកញ៉ា កុក អាន ជា​ប្រធាន​ប្តឹង​ចោទ​ពី​បទ​កិប​កេង​ប្រាក់​ក្រុមហ៊ុន ឆ្នាំ​២០០៨ ត្រូវ​សាលា​ដំបូង​ភ្នំពេញ​ផ្តន្ទាទោស​ដាក់​ពន្ធនាគារ ៣​ឆ្នាំ និង បង្គាប់​ឲ្យ​សង​ប្រាក់​ជាង ៨ លាន​ដុល្លារ​ទៅ​ដើម​បណ្តឹង។ ប៉ុន្តែ ជន​ជាប់​ចោទ​មិន​សុខ​ចិត្ត​បាន​ប្តឹង​ទាស់​សុំ​នៅ​ក្រៅ​ឃុំ​មក​ឧទ្ធរណ៍​តែ​ត្រូវ​សាលា​ឧទ្ធរណ៍​ជំទាស់​និង​សម្រេច​តម្កល់​សាល​ក្រម​សាលា​ដំបូង​នៅ​ថ្ងៃ ទី​២៣ ខែ​សីហា ឆ្នាំ​២០១៣ ទុក​ជា​បាន​ការ​ដដែល។

ក្នុង​សវនាការ​ម្សិលមិញ​លោក ហេង ឈាង បាន​ប្រាប់​ចៅក្រម​ថា គាត់​ប្តឹង​សុំ​នៅ​ក្រៅ​ឃុំ​មក​ពី​គាត់​មាន​ជំងឺ​ទឹក​នោម​ផ្អែម​ប្រចាំ​កាយ​ដែល​ចាំបាច់​ត្រូវ​មាន​គ្រូ​ពេទ្យ​ព្យាបាល​តាម​លក្ខណៈ​វិទ្យាសាស្រ្ត​ត្រឹម​ត្រូវ។​ម៉្យាង​ទៀត គាត់​មាន​កូន ៣​នាក់ ក្នុង​បន្ទុក​និង​មាន​ម្តាយ​ចាស់​ជរា​ដែល​ត្រូវ​ការ​រក​លុយ​កាក់​ព្រោះ​គាត់​នៅ​ជំពាក់​លុយ​គេ​ច្រើន ហើយ​ទ្រព្យ​សម្បត្តិ​កំពុង​ត្រូវ​រក្សា​ការពារ​មិន​ឲ្យ​លក់​ដូរ​ផង។

លោក​បន្ត​ថា លោក ឧកញ៉ា កុក អាន បាន​ដក​ពាក្យ​ប្តឹង​ពី​គាត់​ហើយ ហើយ​គាត់​ក៏​អនុវត្ត​ទោស​បាន ៣៤ ខែ​ហើយ​ដែរ។​លោក​ថ្លែង​ថា៖ «ខ្ញុំ​សូម​ឲ្យ​តុលាការ​មេត្តា​អនុញ្ញាត​ឲ្យ​ខ្ញុំ​បាន​នៅ​ក្រៅ​ឃុំ​ដើម្បី​ដោះស្រាយ​ជាមួយ​ធនាគារ​និង​ថែទាំ​សុខភាព។ ខ្ញុំ​សន្យា​ថា មិន​បង្ក​បញ្ហា​ដល់​ដើម​បណ្តឹង​ហើយ​ក៏​មិន​ទៅ​បំភ័យ​សាក្សី​ណា​ដែរ​និង​មិន​បំផ្លាញ​ភ័ស្តុតាង​នោះ​ឡើយ»។

លោក ពិន វណ្ណៈ មេធាវី​ការពារ​ក្តី​លោក ហេង ឈាង ថ្លែង​ក្នុង​សវនាការ​ថា ការ​សម្រេច​មិន​ឲ្យ​កូន​ក្តី​លោក​នៅ​ក្រៅ​ឃុំ​របស់​តុលាការ​ថ្នាក់​ក្រោម​បាន​ធ្វើ​ឲ្យ​កូន​ក្តី​លោក​បាត់បង់​សេរីភាព​និង​មាន​បញ្ហា​ផ្នែក​អារម្មណ៍​ដែល​ការ​លំបាក​ទាំង​នេះ​មិន​អាច​ត្រឡប់​មក​វិញ​បាន​ទេ។

លោក​ថា៖ «រហូត​មក​ដល់​ពេល​នេះ​សាលា​ឧទ្ធរណ៍​នៅ​មិន​ទាន់​ជំនុំ​ជម្រះ​ទោស​កូន​ក្តី​ខ្ញុំ​ឲ្យ​ប្រាកដ​ផង មិន​ដឹង​ថា គាត់​មាន​ទោស​ឬ​អត់​ទេ? តែ​មិន​ឃើញ​មាន​ភ័ស្តុតាង​ជាក់លាក់​ណា​បញ្ជាក់​ថា កូន​ក្តី​ខ្ញុំ​មាន​ទោស​ទេ។ ខ្ញុំ​សូម​ឲ្យ​កូន​ក្តី​ខ្ញុំ​បាន​នៅ​ក្រៅ​ឃុំ​ព្រោះ​គាត់​មាន​ផ្ទះ​ត្រឹម​ត្រូវ ហើយ​ក៏​មិន​ទៅ​បង្ក​ហេតុ​ដល់​ដើម​បណ្តឹង​ឬ​បំផ្លាញ​ភ័ស្តុតាង​និង​បំភ័យ​សាក្សី​ដែរ»។

តំណាង​មហា​អយ្យការ​លោក សេង ប៊ុនឃាង បាន​សន្និដ្ឋាន​ថា ការ​សម្រេច​មិន​ឲ្យ​ជន​ជាប់​ចោទ​នៅ​ក្រៅ​ឃុំ​របស់​សាលា​ឧទ្ធរណ៍​គឺជា​ការ​ត្រឹម​ត្រូវ​ព្រោះ​ខ្លាច​ជន​ជាប់​ចោទ​ទៅ​គាប​សង្កត់​លើ​សាក្សី​និង​បំផ្លាញ​ភ័ស្តុតាង​ដែល​សំណុំ​រឿង​កំពុង​ដំណើរការ​នៅ​ឡើយ។ លោក​យល់​ថា ការ​មិន​ឲ្យ​ជន​ជាប់​ចោទ​នៅ​ក្រៅ​ឃុំ​របស់​សភា​ស៊ើបសួរ​នៅ​សាលា​ឧទ្ធរណ៍​ពិត​ជា​ត្រឹម​ត្រូវ​តាម​ទម្រង់​ច្បាប់​និង​សុំ​ឲ្យ​ក្រុម​ប្រឹក្សា​ពិនិត្យ​ពិចារណា​លើ​រឿង​នេះ។

បន្ទាប់​ពី​ការ​សួរ​ដេញ​ដោល​បញ្ចប់​ប្រធាន​ក្រុម​ប្រឹក្សា​ជំនុំ​ជម្រះ​បាន​សម្រេច​លើក​ការ​ប្រកាស​ដីកា​រឿង​នេះ​ទៅ​ធ្វើ​នៅ ថ្ងៃ ទី​២៥ ខែ​មេសា ខាង​មុខ៕

ព័ត៌មានថ្មីៗ