តុលាការ​កំពូល​សម្រេច​ឲ្យ​ជន​អូស្ត្រាលី​សង​ប្រាក់​ទៅ​បុរស​អាមេរិក​ដដែល


ភ្នំពេញៈ តុលាការ​កំពូល​កាល​ពី​ម្សិលមិញ​បាន​បើក​សវនាការ​លើ​បណ្តឹង​សារទុក្ខ​របស់​ជនជាតិ អូស្ត្រាលី នៃ​សំណុំ​រឿង​ជំពាក់​ប្រាក់​ជាង ២៥ ម៉ឺន​ដុល្លារ​ហើយ​បាន​សម្រេច​ឲ្យ​គាត់​សង​ប្រាក់​ទៅ​គូក្តី​ទាំង​ការ​ទាំង​ដើម​ដូច​ការ​សម្រេច​របស់​តុលាការ​ថ្នាក់​ក្រោម​ដែរ។

តាម​របាយ​ការណ៍​លោក​ស្រី​ចៅក្រម គឹម សត្ថាវី ថា សំណុំ​រឿង​ជំពាក់​ប្រាក់​ជាង ២៥ ម៉ឺន​ដុល្លារ​នេះ​មាន​ភាគី​ជនជាតិ អាមេរិកាំង ឈ្មោះ Geog Maurice អាយុ ៨៧​ឆ្នាំ ជា​ចុង​ចម្លើយ និង​ឈ្មោះ Owen Back អាយុ ៤៩​ឆ្នាំ ជនជាតិ អូស្រ្តាលី ជាដើម​បណ្តឹង​សារទុក្ខ។

លោក​ស្រី​ថ្លែង​ថា រឿង​នេះ ក្នុង ឆ្នាំ​២០១២ សាលា​ដំបូង ខេត្ត​កំពត បាន​ចេញ​សាលក្រម​ឲ្យ​ភាគី​ជនជាតិ អាមេរិក ឈ្នះ​ក្តី​ដោយ​បង្គាប់​ឲ្យ Owen Back សង​ប្រាក់​ដើម ២១៥ ០០០ ដុល្លារ​ការ​ប្រាក់​ប្រចាំ​ខែ ១ ភាគរយ និង​សង​ជំងឺ​ចិត្ត ១៥ ០០០ ដុល្លារ​ទៅ​ដើម​បណ្តឹង។ ប៉ុន្តែ​លោក Back បាន​ប្តឹង​ទាស់ ហើយ​សាលា​ឧទ្ធរណ៍​បាន​តម្កល់​សេចក្តី​សម្រេច​របស់​តុលាការ ខេត្ត​កំពត។

ក្នុង​សវនាការ​ពី​ម្សិលមិញ Owen Back អះអាង​ថា ក្នុង ឆ្នាំ​២០០៩ ពួក​គាត់​ជួប​ស្គាល់​គ្នា ហើយ​គាត់​និង Geog Maurice ព្រម​ព្រៀង​គ្នា​ពី​គម្រោង​បើក​ផ្ទះ​សំណាក់​នៅ ខេត្ត​កំពត។ ពេល​នោះ​ដៃ​គូ​ខ្លួន​សន្យា​ផ្តល់​ប្រាក់​ដោយ​មិន​ទារ​សំណង​ទេ ទើប​លោក​យក​ប្រាក់​នោះ​មក​សង់​ផ្ទះ​នៅ ក្រុង​កែប (Jasmine Valley Eco-Resort) បើក​ធ្វើ​អាជីវកម្ម​ត​ពី ឆ្នាំ​២០១០ មក។

លោក Owen Back ថា គាត់​ទទួល​ស្គាល់​ប្រាក់​កម្ចី ១៩ ម៉ឺន​ដុល្លារ​តាំង​ពី​នៅ​តុលាការ ខេត្ត​កំពត តែ​បាន​សង ៥ ម៉ឺន​ដុល្លារ​ហើយ ចាប់​ពី​អត់​ចំណូល​គាត់​ក៏​ផ្អាក។

លោក យឹម វិសុទ្ធ មេធាវី​ការពារ​ក្តី​លោក Owen Back ថា ប្រាក់​នោះ​ជា​ប្រាក់​ប្រទានកម្ម​ទេ ហើយ​គាត់​ថា ជួយ​ដល់​ពលរដ្ឋ​ក្រីក្រ ទើប​កូន​ក្តី​លោក​យក។ ហេតុ​នេះ​សូម​ឲ្យ​តុលាការ​ពិចារណា។ តែ​លោក គង់ រ៉ាឌី មេធាវី​លោក Geog Maurice ថ្លែង​ថា កូន​ក្តី​លោក​មាន​វ័យ​ចាស់​អាច​ភ្លេច​ខ្លះ តែ​បើ​តាម​គាត់​រំឭក គាត់​គិត​ឃើញ​ថា ទឹក​ប្រាក់​ដែល​គេ​ជំពាក់​មាន​ជាង ២៨ ម៉ឺន​ដុល្លារ។

លោក ឌិត មុន្ទី ប្រធាន​ក្រុម​ប្រឹក្សា​ជំនុំ​ជម្រះ​ថ្លែង​ថា ក្រោយ​ពី​ពិនិត្យ​ពិចារណា​រួច «តុលាការ​យល់​ឃើញ​ថា លោក Owen Back ទទួល​ស្គាល់​ប្រាក់​ជំពាក់​មែន​ដូច្នេះ​តុលាការ​សម្រេច​ឲ្យ​លោក​សង​ទៅ​លោក Geog Maurice នូវ​ការ​ប្រាក់​ប្រចាំ​ខែ ១ ភាគរយ​និង​ប្រាក់​ដែល​នៅ​ជំពាក់​ចំនួន ២៤៦ ៨៣២ ដុល្លារ៕

ព័ត៌មានថ្មីៗ