ថៃ​បញ្ជូន​ក្មេងៗ​ត្រូវ​គេ​នាំ​ទៅ​លក់​ពលកម្ម​លើ​កោះ​ភូកេត​មក​វិញ


20140331_10b
ម្តាយមកយកកូនស្រី(វៀតណាម)ដែលថៃបញ្ជូនមកវិញ រូប សហការី

បន្ទាយ​មាន​ជ័យៈ មាន​ក្មេងៗ​ចាប់​ពី​អាយុ ៧​ឆ្នាំ ដល់ ១៣​ឆ្នាំ ត្រូវ​តម្រួត ប្រទេស​ថៃ ចាប់​បញ្ជូន​មក កម្ពុជា បន្ត​បន្ទាប់​តាម​ច្រក​អន្តរជាតិ ប៉ោយប៉ែត បន្ទាប់​ពី​ត្រូវ​គេ​នាំ​យក​ទៅ​ជួញ​ដូរ​កម្លាំង​ពលកម្ម​ឲ្យ​ដើរ​លក់​កាសែត​និង​លក់​ផ្កា​នៅ កោះភូកេត ប្រទេស​ថៃ។ នេះ​បើ​តាម​ការ​ឲ្យ​ដឹង​ពី​មន្រ្តី​អង្គការ​គ្រួសារ​ថ្មី​ដែល​ទើប​ទទួល​កុមារ​ពីរ​នាក់​ដែល ថៃ បញ្ជូន​កាល​ពី​សប្តាហ៍​មុន។

អ្នក​គ្រូ មុំ បុគ្គលិក​អង្គការ គ្រួសារ​ថ្មី នៅ​មណ្ឌល ប៉ោយប៉ែត ឲ្យ​ដឹង​ថា អង្គការ គ្រួសារ​ថ្មី កាល​ពី​សប្តាហ៍​មុន​បាន​ទទួល​ក្មេង​ស្រី​ពីរ​នាក់​ក្នុង​នោះ​ក្មេង កម្ពុជា ម្នាក់​និង​ក្មេង​ស្រី​ជនជាតិ វៀតណាម អាយុ ១៣​ឆ្នាំ ម្នាក់​ដែល​តម្រួត ថៃ ចាប់​បញ្ជូន​មក កម្ពុជា តាម​ច្រក ប៉ោយប៉ែត។

អ្នក​គ្រូ​បន្ត​ទៀត​ថា តាម​ការ​សួរ​នាំ​ក្មេង​ស្រី វៀតណាម ឈ្មោះ ង្វៀង ធីម៉ី អាយុ ១៣​ឆ្នាំ ដែល​តម្រួត ថៃ ទើប​បញ្ជូន​មក​ជាមួយ​ក្មេង​ដទៃ​ទៀត​នាង​ថា រូប​គេ​ត្រូវ​គេ​ល្បួង​នាំ​យក​ទៅ កោះភូកេត ប្រទេស​ថៃ។

អ្នក​គ្រូ​និយាយ​ថា៖ «ពេល​ប្រគល់​ក្មេង​ឲ្យ​ទៅ​ម្តាយ​វិញ​មាន​មន្ទីរ​សង្គមកិច្ច​ចូល​រួម​និង​ឲ្យ​ម្តាយ​ក្មេង​រងគ្រោះ​ផ្តិត​មេដៃ​ទទួល​ត្រឹម​ត្រូវ។ ក្មេង​នោះ ប្រាប់​ខ្ញុំ​ថា គេ​បង្ខំ​ឲ្យ​នាង​ដើរ​លក់​កាសែត​និង​លក់​ផ្កា លើ កោះ​ភូកេត បើ​លក់​មិន​ដាច់​គេ​វាយ​ធ្វើ​បាប តែ​នាង​មិន​និយាយ​ពី​ប្រាក់​កម្រៃ​ទេ ហើយ​អង្គការ​យើង​តែង​តែ​ទទួល​ក្មេង​ដែល ថៃ បញ្ជូន​មក​បន្ត​បន្ទាប់​ដែរ​ពី​មុន​មក»។

លោក ភិន ភារម្យ បុគ្គលិក​អង្គការ កម្ពុជា ដើម្បី​ជួយ​ស្រ្តី​មាន​វិបត្តិ​ប្រចាំ ក្រុង​ប៉ោយប៉ែត ឲ្យ​ដឹង​ដែរ​ថា លោក​គ្មាន​ទិន្នន័យ​ពី​ចំនួន​ក្មេង​រងគ្រោះ​ដែល​តម្រួត ថៃ បញ្ជូន​មក​ទេ ប៉ុន្តែ​ក្នុង​មួយ​ឆ្នាំៗ ការ​បញ្ជូន​ក្មេង​មក​ពី ប្រទេស​ថៃ មាន​មិន​តិច​ទេ ពួក​គេ​អាយុ​ចាប់​ពី ៧​ឆ្នាំ រហូត ១៤​ឆ្នាំ។

លោក​បន្ត​ថា ក្មេង​រងគ្រោះ​ដែល​គេ​បញ្ជូន​មក​ទាំង​នោះ ពួក​គេ​លាក់​ព័ត៌មាន​មិន​ព្រម​ប្រាប់​ពី​មូលហេតុ​ដែល​ត្រូវ​គេ​ល្បួង​នាំ​យក​ទៅ ប្រទេស​ថៃ ទេ។

លោក​ឲ្យ​ដឹង​ទៀត​ថា តែ​តាម​ការ​ស្រាវជ្រាវ​និង​តាម​រយៈ​ក្មេង​ប្រាប់​ក្រោយ​មក​ពួក​គេ​ត្រូវ​មេខ្យល់ ខ្មែរ នាំ​ទៅ ថៃ នោះ​ច្រើន​ជា​សាច់​ញាតិ​ពួកគេ​តែ​ម្តង លុះ​ទៅ​ដល់ កោះភូកេត ស្រុក​ថៃ ពួក​គេ​ភាគ​ច្រើន​ត្រូវ​ថៅកែ​ជនជាតិ វៀតណាម គ្រប់​គ្រង។

លោក​ថា៖ «ក្មេង​ទាំង​នោះ​ពេល​ថ្ងៃ​គេ​បង្ខំ​ឲ្យ​ដើរ​លក់​កាសែត​ហើយ​នៅ​ពេល​យប់​ឲ្យ​ដើរ​លក់​ផ្កា ពេល​ខ្លះ​ត្រូវ​ថៅកែ​វ៉ៃ​ធ្វើ​បាប​ផង​ព្រោះ​លក់​មិន​ដាច់»។

មន្រ្តី​អង្គការ​មណ្ឌល​សំចត​នៅ​ក្រុង ប៉ោយប៉ែត ជា​អង្គការ​មួយ​ចាំ​ទទួល​ក្មេងៗ​ទាំង​នោះ​មួយ​ដែរ​ប្រាប់​ថា ថ្វី​ដ្បិត​តែ​ព័ត៌មាន​ស្តី​ពី​ការ​ជួញ​ដូរ​និង​មាន​ក្មេង​កំពុង​ត្រូវ​បាន​គេ​លក់​កម្លាំង​ពលកម្ម​នៅ ស្រុក​ថៃ ក៏​ពិត​មែន ប៉ុន្តែ គ្មាន​អង្គការ​ណា​មួយ​អាច​ចូល​ទៅ​ប្រមូល​ក្មេង​ទាំង​នោះ​បាន​ទេ មាន​តែ​សហការ​ជាមួយ​តម្រួត ថៃ តែ​ប៉ុណ្ណោះ។

ម្តាយ​កុមារី​ជាតិ វៀតណាម ឈ្មោះ ង្វៀង ធីហ្វឿង មិន​អាច​ទាក់ទង​សួរ​ដំណើរ​រឿង​នេះ​បាន​ទេ​កាល​ពី​ម្សិលមិញ៕

ព័ត៌មានថ្មីៗ