ទាហាន​រពឹស​ទៅ​ឆ្កឹះ​មីន​លេង​ផ្ទុះ​របួស​មុខ​និង​ខ្លួន


បន្ទាយ​មាន​ជ័យៈ យោធិន​ក្នុង​កង​វរៈ ៥១៣ ម្នាក់ បាន​រង​របួស​ផ្ទៃ​មុខ​និង​ដង​ខ្លួន​ក្រោយ​ពី​យក​ឈើ​ទៅ​ឆ្កឹះ​គ្រាប់​មីន​កប់​ដី​លេង​ផ្ទុះ​កាល​ពី​ថ្ងៃ​ត្រង់​ថ្ងៃ​អាទិត្យ នៅ ភូមិ​សិលាខ្មែរ ឃុំ​អូរបីជាន់ ស្រុក​អូរជ្រៅ។

លោក ឈុង សុងលី មេប៉ុស្តិ៍ ឃុំ​អូរបីជាន់ ឲ្យ​ដឹង​ថា ជន​រងគ្រោះ​ឈ្មោះ ខៀន ហុង អាយុ ៣៦​ឆ្នាំ ពល​ទាហាន​វរៈ ៥១៣ ឈរ​ជើង​នៅ ថ្មសិន ក្នុង ឃុំ​កូប ស្រុក​អូរជ្រៅ រង​របួស​មុខ​និង​ត្រឹម​ចង្កេះ​ឡើង​លើ​ត្រូវ​អង្គភាព​បញ្ចូន​ទៅ​សង្គ្រោះ​នៅមន្ទីរពេទ្យ​បង្អែក ក្រុង​ប៉ោយប៉ែត។

លោក​ថា៖ «ជន​រងគ្រោះ​ចូល​ទៅ​ក្នុង​តំបន់ ស៊ីម៉ាក់ ហាម​ឃាត់ និង​យក​ឈើ​ទៅ​ឆ្កឹះ​គ្រាប់​មីន។ គាត់​ជា​ទាហាន​ស្គាល់​មីន​ច្បាស់ តែ​គាត់​ទៅ​ឆ្កឹះ​វា​លេង»។

លោក​បន្ត​ថា គាត់​ដើរ​ទៅ​មើល​ស្រែ​គាត់​នៅ​ក្បែរ​តំបន់​មីន​ដែល​ខាង ស៊ីម៉ាក់ ហាម​ឃាត់ ហើយ​ទៅ​អង្គុយ​ក្រោម​ដើម​ឈើ​មួយ រួច​យក​ឈើ​ឆ្កឹះ​គ្រាប់​មីន​លេង ក៏​ផ្ទុះ​ជះ​អំបែង​ត្រូវ​របួស តែ​មីន​នោះ​ជា​មីន​ផ្តាច់​ជើង​មនុស្ស​ទេ។

គួរ​រំឭក​ថា ក្នុង ខែ​មីនា នៅ​ថ្ងៃ ចុង​ខែ​បុរស​ម្នាក់​រង​របួស​ដៃ​និង​ខូច​ត្រាក់ទ័រ​ខណៈ​បើក​ទៅ​ភ្ជួរ​ដី​ហើយ​កិន​ក្បាល​គ្រាប់ ៨០ ម.ម ផ្ទុះ​នៅ ភូមិ​បន្ទាយ​ទី​១ ក្នុង ស្រុក​ម៉ាឡៃ ខេត្ត​បន្ទាយ​មាន​ជ័យ ហើយ​កាល​ពី​ថ្ងៃ​២៦ មីនា គ្រាប់​មីន ១ គ្រាប់ បាន​ផ្ទុះ​ឡើង នៅ​ចម្ការ​មីន​លេខ TA57.29 នៅ​ក្នុង ឃុំ​ស្លក្រាម ស្រុក​ស្វាយ​ចេក ខេត្ដ​បន្ទាយ​មាន​ជ័យ ធ្វើ​ឱ្យ​មនុស្ស ៣ នាក់​ក្នុង​នោះ​ក្មេង​ប្រុស ២​នាក់ និង​ស្ដ្រី​ម្នាក់​របួស​ធ្ងន់​ខ្លះ​ដាច់​ជើង​ឆ្វេង​បាក់​ជើង​ស្ដាំ និង​បាក់​ដៃ​នៅ​ពេល​ដើរ​ទៅ​ចាក់​អង្ក្រង​ក្នុង​ព្រៃ៕

ព័ត៌មានថ្មីៗ