បញ្ជូន​ជន​វាយ​សម្លាប់​ឪពុក-ឪពុក​មា នឹង​ដែក​ស្បែង​ទៅ​តុលាការ


ក្រចេះ: បុរស​ម្នាក់​ដែល​វាយ​សម្លាប់​ឪពុក​និង​ឪពុក​មា​ខ្លួន​នឹង​ដែក​ស្បែង​កាល​ពី​ថ្ងៃ​អង្គារ នៅ ស្រុក​សម្បូណ៌ ខេត្ត​ក្រចេះ ត្រូវ​សមត្ថកិច្ច​នគរបាល​ខេត្ត​បញ្ជូន​ទៅ​កាន់​សាលា​ដំបូង​ខេត្ត​ដើម្បី​ធ្វើ​ការ​ចោទ​ប្រកាន់​កាល​ពី​រសៀល​ម្សិលមិញ។

លោក អ៊ុំ ភី ស្នងការ​រង ខេត្ត​ក្រចេះ ឲ្យ​ដឹង​ថា ជន​សង្ស័យ​ជា​កូន​បង្កើត​បាន​ប្រើ​ដែក​ស្បែង​វាយ​សម្លាប់​ឪពុក​និង​ឪពុក​មា ឯង​ពី​ថ្ងៃ​អង្គារ ខាង​សមត្ថកិច្ច​ជំនាញ​បាន​បញ្ចប់​ការ​កសាង​សំណុំ​រឿង ហើយ​បាន​បញ្ជូន​ទៅ​សាលា​ដំបូង ខេត្ត​ក្រចេះ កាល​ពី​ម្សិលមិញ ដើម្បី​ឲ្យ​ចៅក្រម​សម្រេច​ចោទ​ប្រកាន់​និង​ឃុំ​ខ្លួន​តាម​នីតិវិធី​ហើយ។

លោក​ប្រាប់​ដែរ​ថា ជន​ល្មើស​ឈ្មោះ ឆន សុផៃ អាយុ ៣៤​ឆ្នាំ ជា​កូន​ច្បង​ក្នុង​គ្រួសារ​មាន​បង​ប្អូន ៥​នាក់។ ឯ​ឪពុក​បង្កើត​រងគ្រោះ​ឈ្មោះ វ៉ាន់ ឆែ អាយុ ៥២​ឆ្នាំ និង​ឪពុក​មា ឈ្មោះ វ៉ាន់ ឆាន់ រស់​នៅ ភូមិ​ថ្មី ឃុំ​សណ្តាន់ ស្រុក​សម្បូណ៌ ខេត្ត​ក្រចេះ។ ជន​រងគ្រោះ​ម្នាក់ៗ​ត្រូវ​ជន​ល្មើស​វាយ ៣ ដែក​ស្បែង​ថ្នាំង​អំពៅ​បែក​ក្បាល​ធ្លាយ​ខួរ​ស្លាប់​នៅ​កន្លែង​កើត​ហេតុ។

លោក ប៊ុន ឈឿន អធិការ​រង ស្រុក​សម្បូណ៌ ឲ្យ​ដឹង​ថា ជន​រងគ្រោះ​ជា​ឪពុក​មា​បាន​មក​លេង​បង​ប្រុស​ហើយ​ទាំង ៣​នាក់ បាន​ទិញ​ស្រា​ស​មក​ផឹក​ជុំ​គ្នា​លើ​ផ្ទះ​និង​ជជែក​គ្នា​តាំង​ពី​ម៉ោង ៧ ព្រឹក​រហូត​ដល់​រសៀល​ម៉ោង ២ អស់​ស្រា ៤​លីត្រ។

លោក​ថា លុះ​ស្រវឹង​រៀងៗ​ខ្លួន​ឪពុក​មា​បាន​ស្តី​ប្រដៅ​ក្មួយ​ពី​ការ​រក​ស៊ី​ក្នុង​ន័​យ​ល្អ​ទេ ស្រាប់​តែ​ក្មួយ​ខឹង​ក៏​ចាប់​ឪពុក​មា​បោះ​ពី​លើ​ផ្ទះ​មក​ដី តែ​ឪពុក​បង្កើត​ឃាត់​ក៏​កើត​ជា​ជម្លោះ​ស្រែក ជេរ​គ្នា​ផ្អើល​ភូមិ។ ទំនង​ខឹង​ខ្លាំង​ទប់​មិន​បាន​ព្រោះ​តែ​ជាតិ​សុរា​ដឹក​មុខ​ជន​សង្ស័យ​ស្ទុះ​ទៅ​ទាញ​ដែក​ស្បែង​ថ្នាំ​អំពៅ (ដែក​គាស់) មក​វាយ​ក្បាល​ឪពុក​មា ត្រូវ ៣ ដែក​ឪពុក​ឃើញ​ដូច្នោះ​ស្ទុះ​ទៅ​ឃាត់​ហើយ​ក៏​ត្រូវ​កូន​បង្កើត​វាយ ៣ ដែក​បែក​ក្បាល​ចេញ​ខួរ​ស្លាប់​នៅ​កន្លែង​កើត​ហេតុ​ទាំង ២ នាក់​ផ្អើល​ដល់​សមត្ថកិច្ច​ចុះ​មក​ឃាត់​ខ្លួន​ជន​ដៃ​ដល់​ភ្លាមៗ​នៅ​នឹង​កន្លែង។

លោក​ប្រាប់​ថា ជន​សង្ស័យ​មិន​ធ្លាប់​មាន​បញ្ហា​ក្នុង​ភូមិ​ពី​មុន​មក​ទេ ព្រោះ​មិន​សូវ​រស់​នៅ​ក្នុង​ភូមិ​គេ​តែង​ចេញ​ទៅ​រក​ការងារ​ធ្វើ​នៅ​ខេត្ត​ក្រៅ​បាត់ៗ។

គ្រួសារ​រងគ្រោះ​មិន​អាច​ទាក់​ទង​បាន​ទេ​ពី​ម្សិលមិញ៕

ព័ត៌មានថ្មីៗ