បញ្ជូន​ជន​សង្ស័យ​ពូកែ​លួច​គោ​អ្នក​ស្រុក​ទៅ​តុលាការ


កំពង់ធំៈ សមត្ថកិច្ច ស្រុក​សន្ទុក បញ្ជូន​ជន​សង្ស័យ​ជា​ចោរ​ជើង​ខ្លាំង​និង​គូកន​ដែល​លួច​គោ​ក្របី​អ្នក​ស្រុក ក្រុង​ស្ទឹងសែន ប្រមាណ ៤០ ក្បាល​ពី​សប្តាហ៍​មុន ទៅ​សាលា​ដំបូង​ខេត្ត​បន្ទាប់​ពី​ឃាត់​ខ្លួន​កាល​ពី​ថ្ងៃ​អង្គារ។

លោក ជៀប គឹមសុង អធិការ​រង​ផ្នែក​ព្រហ្មទណ្ឌ ស្រុក​សន្ទុក ឲ្យ​ដឹង​ថា ជន​សង្ស័យ ប្រើ​ឡាន​ទ្រុង​ដើរ​លួច​គោ​អ្នក​ស្រុក​ឈ្មោះ គង់ រិទ្ធ ភេទ​ប្រុស អាយុ ៤៩​ឆ្នាំ រស់នៅ ភូមិ​កំពង់ក្តី ឃុំ​កំពង់​ចិន​ត្បូង ក្រុង​ស្ទឹងសែន ខេត្ត​កំពង់ធំ និង​ម្នាក់​ទៀត​ឈ្មោះ ក្លី ហាំម៉ាត់ អាយុ ២០​ឆ្នាំ ជា​ខ្មែរ​អ៊ិស្លាម​និង​ជា​កូន​ថៅកែ​កុងស៊ី​កាប់​គោ​ក្របី​រស់​នៅ ភូមិ​ដើម​គ សង្កាត់​ជ្រោយចង្វារ ខណ្ឌ​ឫស្សីកែវ រាជធានី​ភ្នំពេញ។

លោក​បាន​រៀបរាប់​ថា មុន​ឃាត់​ខ្លួន​លោក​បាន​ទទួល​សេចក្តី​រាយការណ៍​តាម​ទូរស័ព្ទ​ថា មាន​សកម្មភាព​លួច​គោ​ក្របី​ទ្រង់​ទ្រាយ​ធំ​នៅ ក្រុង​ស្ទឹងសែន ហើយ​មុខ​សញ្ញា​ជនល្មើស​បាន​ធ្វើ​ដំណើរ​ឆ្លង​កាត់​មូលដ្ឋាន​លោក​ដោយ​បើក​រថយន្ត​កូរ៉េ ១ គ្រឿង​ចំណុះ ១ តោន​ពណ៌​ខៀវ​គ្មាន​ស្លាក​លេខ​និង​មាន​ទ្រុង​ដូច​រថយន្ត​ដឹក​ទឹកកក​ដែរ។

លោក​បន្ត​ថា ក្រោយ​ពី​សមត្ថកិច្ច ក្រុង​ស្ទឹងសែន រាយការណ៍​បញ្ជាក់​អំពី​ភិនភាគ​មធ្យោបាយ​ដឹក​ជញ្ជូន​ដែល​សង្ស័យ​រួច​មក​សមត្ថកិច្ច​លោក​បាន​រាយ​កម្លាំង​គ្រប់​ច្រក​ចេញ​ចូល​សំខាន់ៗ​តាម​ឃុំ​ហើយ​ក៏​ឃើញ​ជន​សង្ស័យ​កំពុង​បើក​រថយន្ត​ឆ្លង​កាត់ ស្រុក​សន្ទុក បម្រុង​មក ទីក្រុង​ភ្នំពេញ ក៏​ត្រូវ​សមត្ថកិច្ច​លោក​ស្ទាក់​ចាប់​តែ​ម្តង។

លោក ញ៉ែម ឈុនលី អធិការ ក្រុង​ស្ទឹងសែន ប្រាប់​ឲ្យ​ដឹង​ថា ពាក់ព័ន្ធ​ចោរ​លួច​គោ​ក្របី​នេះ​មាន ៣ ករណី គឺ​ប្លន់​គោ ១ និង​លួច ២ ករណី​ហើយ​ជន​សង្ស័យ​ជា​មនុស្ស​តែ​មួយ។ ជន​សង្ស័យ​បាន​ប្រើ​រថយន្ត​កូរ៉េ​មាន​បណ្តុះ​ដែក​ត ទ្រុង​បិទ​ជិត​របៀប​ឡាន​ដឹក​ទំនិញ​កែ​ទ្រុង​ក្រោយ​ហើយ​ជា​មុខ​សញ្ញា​លួច​ប្លន់​គោ​ក្របី​កាល​ពី​សប្តាហ៍​មុន​ដែល​បាន​ចាប់​ម្ចាស់​ចង​ប្លន់​យក​គោ​ក្របី​អស់ ៤០ ក្បាល។​លើក​ចុង​ក្រោយ​ជន​សង្ស័យ​បាន​បើក​ឡាន​ទៅ​លួច​គោ​នៅ​តំបន់​វាល​ក្រោម​ក្នុង​ទឹក​ដី ស្រុក​កំពង់ស្វាយ ខេត្ត​កំពង់ធំ បាន​ក្របី ៦ ក្បាល​លុះ​ពេល​សមត្ថកិច្ច​ដេញ​តាម​ជន​សង្ស័យ​ភ័យ​បាន​បើក​ឡាន​រត់​ហើយ​ធ្លាក់​ក្របី​តាម​ផ្លូវ រហូត​ទើប​ដល់ ស្រុក​សន្ទុក ត្រូវ​សមត្ថកិច្ច​ចាប់​បាន​តែ​ម្តង។

លោក​ថា៖ «យើង​បាន​បញ្ចប់​នីតិវិធី​ស៊ើប​សួរ​ហើយ​ដោយ​សារ​បទល្មើស​ជាក់ស្តែង​មាន​ទាំង​គោ​មាន​ទាំង​វត្ថុតាង​ត្រង់​ថា ជន​សង្ស័យ​ត្រូវ​មាន​ទោស​យ៉ាង​ណា​នោះ​អាស្រ័យ​ចៅក្រម​ចោទ​ទេ»៕

ព័ត៌មានថ្មីៗ