បញ្ជូន​ស្ត្រី​ម្នាក់​ទៅ​តុលាការ​ពី​បទ​ឆបោក​ប្រាក់​ជាង ២ ម៉ឺន​ដុល្លារ


ភ្នំពេញៈ ស្ត្រី​ម្នាក់​ដែល​សមត្ថកិច្ច​ព្រហ្មទណ្ឌ​ក្រសួង មហាផ្ទៃ ឃាត់​ខ្លួន​កាល​ពី​ថ្ងៃ ទី​៣ ឧសភា ត្រូវ​បញ្ជូន​ទៅ​សាលា​ដំបូង​រាជធានី​នៅ​ព្រឹក​ថ្ងៃ​ចន្ទ​ពី​បទ​ឆបោក​ប្រាក់ ២ ម៉ឺន ៥ ពាន់​ដុល្លារ។

លោក ប៉ា គន្ធី នាយ​រង​ការិយាល័យ​ព្រហ្មទណ្ឌ​កម្រិត​ស្រាល​ក្រសួង មហាផ្ទៃ ឲ្យ​ដឹង​ថា ស្រ្តី​ឈ្មោះ ហែម ប៊ុនហេងសុធារ័ត្ន អាយុ ៣៣​ឆ្នាំ ស្នាក់នៅ​បុរី​ពិភព​ថ្មី ផ្លូវ​លេខ ៣ ភូមិ​ទឹក​ថ្លា សង្កាត់​ទឹក​ថ្លា ខណ្ឌ​សែន​សុខ ត្រូវ​កសាង​សំណុំ​រឿង​បញ្ជូន​ទៅ​សាលា​ដំបូង​ពី​បទ​ពាក់ព័ន្ធ​ករណី​ឆបោក​ប្រាក់ ២ ម៉ឺន ៥ ពាន់​ដុល្លារ ហើយ​តុលាការ​កំពុង​ស៊ើប​សួរ​នៅ​ឡើយ។ លោក​ថា៖ «ខ្ញុំ​មិន​ដឹង​ថា តុលាការ​ចោទ​ឬ​យ៉ាង​ណា​នោះ​ទេ តែ​ស្រ្តី​សង្ស័យ​កំពុង​ត្រូវ​តុលាការ​សាកសួរ»។

លោក​បន្ត​ថា តាម​បណ្តឹង​ជន​សង្ស័យ​ត្រូវ​នគរបាល​ឃាត់​ខ្លួន​កាល​ពី​ថ្ងៃ ទី​០៣ ខែ​ឧសភា នៅ​តាម​ផ្លូវ ហើយ​តាម​បណ្តឹង​ពាណិជ្ជករ​ម្នាក់​បាន​បញ្ជា​ទិញ​ជណ្ដើរ​យន្ដ​ម៉ាក មីតស៊ុយប៊ីស៊ី ២ គ្រឿង​មាន​តម្លៃ ៥ ម៉ឺន​ដុល្លារ​យក​មក​បំពាក់​នៅ​ផ្សារ​ទំនើប។ ក្នុង​ទំនាក់​ទំនង​ទិញ​លក់​នោះ​ជន​សង្ស័យ​ទាមទារ​ឲ្យ​ដើម​បណ្តឹង​កក់​ប្រាក់​មុន ២៥ ០០០ ដុល្លារ​ថា យក​ទៅ​ទិញ​និង​ដឹក​ជញ្ជូន​ពេល​បំពាក់​ជណ្ដើរ​រួច​ទើប​ប្រគល់​លុយ​គ្រប់​ចំនួន។ តែ​ពេល​ទទួល​ប្រាក់​កក់​ហើយ​ស្រាប់​តែ​ស្រ្តី​សង្ស័យ​គេច​ខ្លួន​បាត់​ទើប​ដើម​បណ្តឹង​សម្រេច​ដាក់​ពាក្យ​ប្ដឹង​មក​ក្រសួង មហាផ្ទៃ តែ​ម្តង​ហើយ​លោក​ព្រះ​រាជអាជ្ញា​រង មាស ច័ន្ទពិសិដ្ឋ បាន​ចេញ​ដីកា​ឃាត់​ខ្លួន​ខណៈ​ជន​សង្ស័យ​មិន​ព្រម​ចូល​មក​ដោះស្រាយ។ មិន​អាច​សុំ​ការ​បញ្ជាក់​ពី​ព្រះ​រាជអាជ្ញា​រង​បាន​ទេ​ពី​ម្សិលមិញ៕

ព័ត៌មានថ្មីៗ