បុរស​វៀតណាម​ដែល​ចាក់​ស្ត្រី​វៀតណាម​ដូច​គ្នា​របួស​ត្រូវ​ប៉ូលិស​ឃាត់​ខ្លួន


20140520_10b
បុរសវៀតណាមទាំងបីនាក់ត្រូវចាប់ចងក្រោយបង្ករបួស រូបសហការី

ភ្នំពេញៈ បុរស​ជនជាតិ វៀតណាម ៣​នាក់ ដែល​ប្រើ​កាំបិត​ចាក់​ស្រ្តី វៀតណាម ម្នាក់​នៅ​ក្នុង​រោង​សិប្បកម្ម​កែច្នៃ​គ្រឿង​សង្ហារិម​ឲ្យ​របួស​នៅ សង្កាត់​ភ្នំពេញ​ថ្មី ខណ្ឌ​សែនសុខ កាល​ពី​ថ្ងៃ​អាទិត្យ​ខាង​សមត្ថកិច្ច​កំពុង​សាក​សួរ​និង​កសាង​សំណុំ​រឿង​ដើម្បី​ចាត់​ការ​តាម​ច្បាប់។

លោក ម៉ក់ ហុង អធិការ​នគរបាល ខណ្ឌ​សែនសុខ បាន​ឲ្យ​ដឹង​ថា ករណី​បុរស​ជាតិ វៀតណាម ៣​នាក់ ដែល​បង្ក​ហិង្សា​ទៅ​លើ​ស្រ្តី​ជា​ជនជាតិ វៀតណាម ដូច​គា្ន​នោះ​ខាង​ជំនាញ​កំពុង​សាកសួរ​និង​កសាង​សំណុំ​រឿង​ដើម្បី​ចាត់​ការ​តាម​ច្បាប់។

លោក​ប្រាប់​ថា៖ «យើង​កំពុង​ដំណើរការ​តាម​នីតិវិធី​ច្បាប់»។

មន្ត្រី​នគរបាល​ខណ្ឌ​ដែល​ធ្វើ​ការងារ​នេះ​បាន​ឲ្យ​ដឹង​ថា បុរស​បង្ក​ហេតុ​ជាតិ វៀតណាម ទាំង ៣​នាក់ មាន​ឈ្មោះ ចាង វ៉ាន់ឌឿង អាយុ ២៤​ឆ្នាំ ឈ្មោះ ង៉ូ វ៉ាន់ដិញ អាយុ ២៤​ឆ្នាំ (ជន​ដៃ​ដល់) និង​ឈ្មោះ ឡេ វ៉ាន់ណុង អាយុ ២៤​ឆ្នាំ ជា​ជាង​ឈើ​និង​ម្នាក់​ទៀត​កំពុង​គេច​ខ្លួន​ជា​កម្មក​ខ្មែរ។ រីឯ​ស្ដ្រី​រងគ្រោះ​ជា​ម្ចាស់​សិប្បកម្ម​កែច្នៃ​គ្រឿង​សង្ហារិម​នោះ​ឈ្មោះ ង្វៀង ធីប៊េ អាយុ ២២​ឆ្នាំ បាន​រង​របួស​ដៃនិ​ង​ស្មា។

សមត្ថកិច្ច​រំឭក​ថា ករណី​ហិង្សា​ប្រើ​កាំបិត​ចាក់​ស្រ្តី​រងគ្រោះ​ម្នាក់​នេះ​បាន​កើត​ឡើង​បណ្តាល​មក​ពី​ពួក​គេ​ទាស់​សម្តី​គ្នា រវាង​ស្ត្រី​រងគ្រោះ​និង​កម្មករ​ទាំង ៤​នាក់ ហើយ​ត្រូវ​ជន​ដៃ​ដល់ ង៉ូ វ៉ាន់ឌិញ ទាញ​កាំបិត​ចុង​ស្រួច​ចាក់​ទៅ​លើ​ស្រ្តី​រងគ្រោះ​ឲ្យ​រង​របួស បើ​កុំ​តែ​មាន​អ្នក​ជួយ​ឃាត់​ម៉្លេះ​ស្រ្តី​រងគ្រោះ​អាច​ត្រូវ​ជន​ដៃ​ដល់​ចាក់​ស្លាប់​នឹង​កន្លែង​កើត​ហេតុ​ទៅ​ហើយ។

សមត្ថកិច្ច​ខណ្ឌ​រូប​នេះ​បន្ត​ថា ក្រោយ​បង្ក​ហេតុ​រួច បុរស វៀតណាម ទាំង ៣​នាក់ នោះ​បម្រុង​រត់​គេច​ខ្លួន​ដែរ​តែ​ត្រូវ​បាន​សាច់​ញាតិ​ស្រ្តី​រគ្រោះ​ព័ទ្ធ​ចាប់​ទុក​និង​ប្តឹង​សមត្ថកិច្ច​មូលដ្ឋាន​ឲ្យ​ចាប់​ខ្លួន​តែ​ម្តង។

ក្រុម​ជន​ត្រូវ​ចោទ​មិន​អាច​ទាក់​ទង​សួរ​បញ្ជាក់​ពី​រឿង​ហេតុ​បាន​ទេ កាល​ពី​ម្សិលមិញ៕

ព័ត៌មានថ្មីៗ