បុរស​អង់គ្លេស​ម្នាក់​ស្លាប់​ក្នុង​ផ្ទះ​សំណាក់​មួយ​នៅ​ក្រុង​ព្រះ​សីហនុ


ព្រះសីហនុៈ បុរស​ជា​ទេសចរ​ជនជាតិ​អង់គ្លេស​ម្នាក់​ត្រូវ​គេ​ប្រទះ​ឃើញ​ដេក​ស្លាប់​នៅ​ក្នុង​បន្ទប់​ផ្ទះ​សំណាក់ សកល នៅ សង្កាត់​៣ ក្រុង​ព្រះសីហនុ កាល​ពី​ថ្ងៃ​ពុធ ហើយ​ត្រូវ​សមត្ថកិច្ច​ជំនាញ​បញ្ជាក់​ថា គាត់​ស្លាប់​ដោយ​ជំងឺ​គាំង​បេះដូង។

លោក កុល ផល្លី ស្នងការ​រង​នគរបាល ខេត្ត​ព្រះសីហនុ ផ្នែក​ព្រហ្មទណ្ឌ​ឲ្យ​ដឹង​ថា បុរស​ជា​ទេសចរ​ជាតិ​អង់គ្លេស ឈ្មោះ SWEENEY MICHAEL DENNIS ដែល​ស្លាប់​នោះ​ខាង​នគរបាល​បច្ចេកទេស​ខេត្ត​ធ្វើ​កោសល្យ​វិច័យ​ឃើញ​ថា គាត់​ស្លាប់​ព្រោះ​ជំងឺ​គាំង​បេះដូង។

លោក ផល្លី ប្រាប់​ថា៖ «ខាង​ជំនាញ​រក​ឃើញ​ថា គាត់​ស្លាប់​ដោយ​សារ​គាំង​បេះដូង​ហើយ​ខាង​ស្ថានទូត​អង់គ្លេស​គេ​ចាត់​ចែង​និង​មក​ដឹក​សព​យក​ទៅ​ភ្នំពេញ​ហើយ»។

សមត្ថកិច្ច ក្រុង​ព្រះសីហនុ ឲ្យ​ដឹង​ថា ជន​រងគ្រោះ​ឈ្មោះ SWEENEY MICHAEL DENNIS អាយុ ៦៥​ឆ្នាំ សញ្ជាតិ​អង់គ្លេស កាន់​លិខិត​ឆ្លង​ដែន​លេខ ៧៦១១១៧២៣៩ បាន​ចូល​មក​កម្ពុជា តាម​ច្រក​ព្រលាន​យន្តហោះ​អន្តរជាតិ​ភ្នំពេញ ហើយ​បាន​មក​ស្នាក់នៅ​ផ្ទះ​សំណាក់ សកល ក្រុង​ព្រះ​សីហនុ នេះ​នៅ​ថ្ងៃ ទី​៧ ខែ​ឧសភា ឆ្នាំ​២០១៤។

មន្ត្រី​ស្ថានទូត​អង់គ្លេស​មិន​អាច​ទាក់​ទង​សុំ​ការ​បញ្ជាក់​បាន​ទេ​កាល​ពី​ម្សិលមិញ។

គួរ​រំឭក​ថា ក្នុង សង្កាត់​លេខ​៣ ក្រុង​ព្រះ​សីហនុ នេះ​ដែរ ពី​ថ្ងៃ​អង្គារ​ស្ត្រី​ចំណាស់​វ័យ ១០២​ឆ្នាំ ជា​ជនជាតិ ហុងគ្រី ម្នាក់​បាន​ស្លាប់​ដោយ​ជរាពាធ ក្នុង​ពេល​ដែល​គាត់​មក​លេង​ចៅៗ ជា​ជនជាតិ​ខ្មែរ​នៅ​ទី​នេះ៕

ព័ត៌មានថ្មីៗ