បើក​ត្រាក់ទ័រ​ភ្ជួរ​ដី​កិន​គ្រាប់​កប់​ដី​ផ្ទុះ​របួស​នៅ ស្រុក​ម៉ាឡៃ


20140402_10b
ជនរងគ្រោះដោយការផ្ទុះមីនតោនសប្តាហ៍មុន រូបសហការី

បន្ទាយ​មាន​ជ័យៈ បុរស​ម្នាក់​បាន​រង​របួស​ដៃ ហើយ​ត្រាក់ទ័រ​គាត់​បាន​រង​ការ​ខូច​ខាត​បន្ទាប់​ពី​គាត់​បើក​ភ្ជួរ​ដី​ហើយ​កិន​លើ​ក្បាល​គ្រាប់​ផ្លោង​ធុន ៨០ ម.ម ផ្ទុះ​នៅ​ក្នុង ភូមិ​បន្ទាយ ទី១ ស្រុក​ម៉ាឡៃ ខេត្ត​បន្ទាយ​មាន​ជ័យ កាល​ពី​ថ្ងៃ ទី​៣១ ខែ​មីនា។

លោក សៅ ប៊ុន អធិការ​នគរបាល ស្រុក​ម៉ាឡៃ បាន​ឲ្យ​ដឹង​ថា ជន​រងគ្រោះ​ឈ្មោះ សួន ពិសិដ្ឋ អាយុ ២០​ឆ្នាំ មាន​មុខ​របរ​ជា​កសិករ​មាន​លំនៅ ភូមិ​កោះ​ស្នួល ឃុំ​ទួលពង្រ ស្រុក​ម៉ាឡៃ ខេត្ត​បន្ទាយ​មាន​ជ័យ។

លោក​ប្រាប់​ថា៖ «ជន​រងគ្រោះ​គ្រាន់​តែ​រង​អំបែង​ក្បាល​គ្រាប់​របួស​ទេ ហើយ​ប្រសិន​ជា​មីន​តោន​វិញ​នោះ​គាត់​ប្រហែល​ជា​អាច​គ្រោះថ្នាក់​ដល់​ស្លាប់ ប៉ុន្តែ​ឥឡូវ​គេ​ដឹក​គាត់​ទៅ​ព្យាបាល​នៅ​មន្ទីរពេទ្យ​ឃុំ»។

លោក​រៀបរាប់​ថា ពី​រសៀល​ថ្ងៃ​ចន្ទ​ជន​រងគ្រោះ​បាន​បើក​ត្រាក់ទ័រ​ទៅ​ភ្ជួរ​ដី​ស្រៃ​នៅ​ម្តុំ ភ្នំ​យាយ​សំ ក្នុង ភូមិ-ឃុំ​ទួលពង្រ ស្រុក​ម៉ាឡៃ តែ​ចៃដន្យ​ត្រាក់ទ័រ​បាន​កិន​ក្បាល​គ្រាប់ ៨០ ម.ម មួយ​គ្រាប់​ផ្ទុះ​ឡើង​ធ្វើ​ឲ្យ​បែក​កង់​ត្រាក់ទ័រ​ខាង​ក្រោយ​និង​ខូច​ជាច្រើន​កន្លែង​ឯ​រូប​គាត់​បាន​រង​អំបែង​គ្រាប់​របួស។

លោក​បញ្ជាក់​ថា ក្បាល​គ្រាប់​នោះ​នៅ​កប់​មិន​ជ្រៅ​ទេ ដោយ​សារ​កន្លែង​នោះ​ជា​អតីត​សមរភូមិ​ក្តៅ​បំផុត​ក្នុង​សម័យ​សង្គ្រាម​ស៊ីវិល ហើយ​អង្គភាព​កម្ចាត់​មីន​ស៊ីម៉ាក់ ក៏​មិន​ទាន់​ចុះ​ទៅ​បោស​សម្អាត​នៅ​ឡើយ​ព្រោះ​ទី​នោះ​ជា​តំបន់​ព្រៃ​ស្បាត​មាន​ផ្ទៃ​ដី​ធំ ដូច្នេះ គ្រាប់​មិន​ទាន់​ផ្ទុះ​កប់​ដី​អាច​នៅ​មាន​សេស​សល់​ច្រើន។

បើ​តាម​មន្រ្តី​គ្រប់​គ្រង​ទិន្នន័យ​ជន​រងគ្រោះ​ដោយ​គ្រាប់​មីន ខេត្ត​បន្ទាយ​មាន​ជ័យ ឲ្យ​ដឹង​ពី​សប្តាហ៍​មុន​ទិន្នន័យ​ជន​រងគ្រោះ​ដោយ​គ្រាប់​មិន​ទាន់​ផ្ទុះ ក្នុង ឆ្នាំ​២០១២ ទូទាំង​ខេត្ត​នេះ​មាន ១៧ នាក់​ក្នុង​នោះ​ស្លាប់ ១០ នាក់​តែ​ក្នុង ឆ្នាំ​២០១៣ អ្នក​ស្លាប់​និង​របួស​មាន​តែ ៦​នាក់ ហើយ​ក្នុង ឆ្នាំ​២០១៤ គិត​ទាំង​លើក​នេះ​ផង ទើប​តែ​មាន ២ ករណី​ទេ៕

ព័ត៌មានថ្មីៗ