ប៉ូលិស​ម្នាក់​ដែល​ចាក់​ស្រី​កំណាន់​របួស​ត្រូវ​សមត្ថកិច្ច​តាម​ចាប់​ខ្លួន


ឧត្តរ​មាន​ជ័យៈ មន្ត្រី​នគរបាល​ចរាចរណ៍​ស្នងការដ្ឋាន ខេត្ត​ឧត្តរ​មាន​ជ័យ ម្នាក់​ដែល​ចាក់​ស្រី​ស្នេហ៍​ជាង ១០ កាំបិត​នៅ ក្រុង​សំរោង កាល​ពី​ថ្ងៃ ទី៥ ឧសភា ត្រូវ​សមត្ថកិច្ច​នគរបាល ក្រុង​សំរោង ស្វែង​រក​ចាប់​ខ្លួន​ខណៈ​ស្រ្តី​រងគ្រោះ​ត្រូវ​បញ្ជូន​ទៅ​ព្យាបាល​នៅ​មន្ទីរពេទ្យ ខេត្ត​សៀមរាប។

លោក នៀម ចន្នី នាយ​ផ្នែក​នគរបាល​ព្រហ្មទណ្ឌ ក្រុង​សំរោង បាន​ឲ្យ​ដឹង​ថា ជន​សង្ស័យ​មាន​ឈ្មោះ រិន រតនា ហៅ ម៉ាប់ អាយុ ៣២​ឆ្នាំ ជា​ពលបាល​នៅ​ការិយាល័យ​នគរបាល​ចរាចរណ៍​នៃ​ស្នងការដ្ឋាន​ខេត្ត ត្រូវ​កម្លាំង​សមត្ថកិច្ច​ស្វែង​រក​ចាប់​ខ្លួន​មក​កសាង​សំណុំ​រឿង​បញ្ជូន​ទៅ​តុលាការ​សម្រេច។

លោក នៀម ចន្នី និយាយ​ថា៖ «យើង​ដឹង​ពី​អត្ត​សញ្ញាណ​ជន​ល្មើស​ហើយ ហើយ​យើង​កំពុង​តែ​ដុត​ដៃ​ដុត​ជើង​ធ្វើ​ការ​ក្នុង​រឿង​នេះ»។

លោក​រំឭក​ថា ជន​សង្ស័យ​និង​ស្រី​កំណាន់​ឈ្មោះ រ៉េត គឹមស្រេង អាយុ ៣៣​ឆ្នាំ ជា​នារី​បម្រើ​ខារ៉ាអូខេ ហើយ​បាន​រួមរស់​ជាមួយ​គ្នា​ដោយ​មិន​បាន​រៀបការ​ទេ នៅ​ក្នុង ភូមិ​ឈូក សង្កាត់​សំរោង ក្រុង​សំរោង ខេត្ត​ឧត្តរ​មាន​ជ័យ។

លោក​ឲ្យ​ដឹង​ថា ជន​សង្ស័យ​ជា​សិក្ខាកាម​រៀន ៣ ខែ​នៅ ខេត្ត​សៀមរាប ហើយ​មុន​ថ្ងៃ​កើត​ហេតុ​ជន​សង្ស័យ​បាន​សុំ​ច្បាប់​សាលា​មក​លេង​ផ្ទះ ហើយ​ក៏ កើត​រឿង​រ៉ាវ​មាន​ជម្លោះ​ជាមួយ​ប្រពន្ធ​ឥត​ខាន់​ស្លា​នេះ ហើយ​ឈាន​ដល់​ចាក់​ជន​រងគ្រោះ។

លោក​បញ្ជាក់​ដែរ​ថា ជម្លោះ​នេះ ជន​សង្ស័យ​បាន​យក​កាំបិត​ចិត​បន្លែ ចាក់​ត្រូវ​ពោះ​ស្រ្តី​រងគ្រោះ ៨ កាំបិត​និង​ត្រូវ​ដៃ​ឆ្វេង ៦ កាំបិត​របួស​ជា​ទម្ងន់។​ភ្លាមៗ​ជន​ដៃ​ដល់​បាន​រត់​គេច​ខ្លួន ឯ​នារី​រងគ្រោះ​ត្រូវ​ក្រុម​គ្រួសារ​ដឹក​ទៅ​សង្គ្រោះ​នៅ​មន្ទីរពេទ្យ​បង្អែក ខេត្ត​សៀមរាប៕

ព័ត៌មានថ្មីៗ