ប៉ូលិស​ស្រុក​មង្គលបុរី​កំពុង​តាម​រក​ចោរ​ស្រី​ដែល​ចាក់​ម្ចាស់​ផ្ទះ​របួស


បន្ទាយ​មាន​ជ័យៈ សមត្ថកិច្ច ស្រុក​មង្គលបុរី កំពុង​ស្វែង​រក​ចាប់​ខ្លួន​ចោរ​ស្រី​ដៃ​ដល់​ម្នាក់​ដែល​ចូល​លួច​ទ្រព្យ​របស់​និង​ចាក់​ស្ត្រី​ម្ចាស់​ផ្ទះ​ឲ្យ​របួស​កាល​ពី​ថ្ងៃ​អង្គារ​នៅ ភូមិ​គោកព្នៅ ឃុំ​បន្ទាយ​នាង ស្រុក​មង្គលបុរី ខេត្ត​បន្ទាយ​មាន​ជ័យ។

លោក ឌីលាប ផេង មន្ត្រី​នគរបាល​ព្រហ្មទណ្ឌ ស្រុក​មង្គលបុរី ឲ្យ​ដឹង​ថា ក្នុង​អំពើ​លួច​ហើយ​មាន​ការ​ត​ដៃ​ចាក់​ស្រ្តី​ម្ចាស់​ផ្ទះ​ឲ្យ​រង​របួស​កាល​ពី​ថ្ងៃ​អង្គារ​នោះ សមត្ថកិច្ច​លោក​កំពុង​តែ​ស្រាវជ្រាវ​និង​កំណត់​អត្ត​សញ្ញាណ​ជន​សង្ស័យ​ហើយ​ថា ចោរ​ស្រ្តី​ដៃ​ដល់​ម្នាក់​នោះ​ម្ចាស់​ផ្ទះ​រងគ្រោះ​ថា​មិន​មែន​ជា​អ្នក​រស់​នៅ​ក្នុង​ភូមិ​ទេ ប៉ុន្តែ សមត្ថកិច្ច​នៅ​រង់​ចាំ​ការ​បំភ្លឺ​បន្ថែម​ពី​ស្ត្រី​រងគ្រោះ​ពេល​ចេញ​ពី​មន្ទីរពេទ្យ។

លោក​ថា៖ «តាម​ស្រ្តី​រងគ្រោះ​គាត់​ថា មិន​អាច​ចំណាំ​មុខ​ស្ត្រី​ជា​ជន​ល្មើស​ដៃ​ដល់​នោះ​បាន​ទេ តែ​សមត្ថកិច្ច​កំពុង​ព្យាយាម​កំណត់​អត្តសញ្ញាណ​និង​ស្វែង​រក​ចាប់​ខ្លួន​ជន​ល្មើស»។

លោក​ឲ្យ​ដឹង​ដែរ​ថា ស្រ្តី​រងគ្រោះ​ឈ្មោះ គឹម សារ៉ូន អាយុ ៥៤​ឆ្នាំ ជា​ថៅកែ​ម៉ាស៊ីន​កិន​ស្រូវ​រស់​នៅ ភូមិ​គោក​ព្នៅ ឃុំ​បន្ទាយនាង ស្រុក​មង្គលបុរី រង​របួស​ក្បាល​តែ​មិន​ធ្ងន់​ទេ ហើយ​ក៏​មិន​មាន​បាត់​បង់​របស់​ទ្រព្យ​អី​ដែរ។

លោក​រំឭក​ថា មុន​ពេល​កើត​ហេតុ​ស្រ្តី​រងគ្រោះ​ទៅ​បោច​ស្មៅ​នៅ​ក្រោយ​ផ្ទះ ក៏​ឮ​សំឡេង​រុះរើ​ក្នុង​ផ្ទះ​គាត់​ស្មាន​តែ​ចៅ​ចូល​រើ​កកាយ​ក៏​ងើប​មក​មើល ក៏​ប្រទះ​ឃើញ​ស្រី​ម្នាក់​កំពុង​រើ​កកាយ​លើ​គ្រែ​និង​ក្នុង​ទូ​អីវ៉ាន់ ហើយ​ក៏​ប្រវាយ​ប្រតប់​គ្នា តែ​គាត់​ត្រូវ​ស្រី​នោះ​យក​ទួនណឺវីស​ចាក់​ត្រូវ​ក្បាល​របួស​ដោយ​សារ​ស្រី្ត​នោះ​មាឌ​តូច​ជាង​គាត់ គេ​ក៏​រត់​គេច​ខ្លួន​បាត់​ចោល​ស្បែក​ជើង​មួយ​គូ​ចំណែក​គាត់​ត្រូវ​ក្រុម​គ្រួសារ​បញ្ជូន​ទៅ​មន្ទីរពេទ្យ​ស្រុក។

ដោយ​ឡែក​នៅ ភ្នំពេញ នៅ​ព្រឹក​ថ្ងៃ​ម្សិលមិញ​នគរបាល​ប៉ុស្តិ៍ បឹង​កេងកង ទី១ បាន​ឃាត់​ខ្លួន​ជន​សង្ស័យ​ម្នាក់​ឈ្មោះ គង់ វណ្ណា ភេទ​ប្រុស អាយុ ២៥​ឆ្នាំ ទីលំនៅ​និង​មុខ​របរ​មិន​ពិត​ប្រាកដ សង្ស័យ​លួច​ទូរស័ព្ទ ៣ គ្រឿង​និង​លុយ ១០០ ដុល្លារ ពី​ហាង​ម៉ាស្សា មួយ​កាល​ពី​ព្រឹក​ថ្ងៃ ទី​៧ ខែ​ឧសភា នៅ​ផ្ទះ​ម៉ាស្សា​នៅ​តាម​ផ្លូវ ១៩៤ ក្នុង សង្កាត់​បឹង​កេងកង ទី១ ខណ្ឌ​ចំការមន។

នារី​រងគ្រោះ ស្រី ឡាង អាយុ ២០​ឆ្នាំ ជា​នារី​ម៉ាស្សា​ក្នុង​ហាង​ប្រាប់​សមត្ថកិច្ច​ថា ក្រោយ​ជន​សង្ស័យ​ចូល​មក​ម៉ាស្សា​រួច​ចេញ​ទៅ​វិញ​ក្នុង​ហាង​បាត់​ទូរស័ព្ទ​បី​និង​លុយ ១០០ ដុល្លារ លុះ​បើក​កាមេរ៉ា​សុវត្ថិភាព ក៏​ឃើញ​ជន​សង្ស័យ​យក។ ចៃដន្យ​ព្រឹក​ឡើង​ស្រាប់​តែ​លេច​មុខ​ជន​សង្ស័យ​មក​រក​ម៉ាស្សា​ទៀត ក៏​តេ​ហៅ​ប៉ូលិស​មក​ឃាត់​ខ្លួន​សួរ។ ជន​នេះ​សារភាព​ឲ្យ​របស់​មក​វិញ តែ​ត្រូវ​បញ្ជូន​ទៅ​លើ​ចាត់​ការ​បន្ត៕

ព័ត៌មានថ្មីៗ