ពលរដ្ឋ​វាយ​ជន​សង្ស័យ​ប្លន់​ម៉ូតូ​ស្លាប់​នៅ​នឹង​កន្លែង


កណ្តាលៈ ចោរ​ប្លន់​ម៉ូតូ​ម្នាក់​ត្រូវ​ពលរដ្ឋ​ព្រួត​គ្នា​វាយ​ស្លាប់​នៅ​នឹង​កន្លែង​និង​ម្នាក់​ទៀត​សមត្ថកិច្ច​ចាប់​ខ្លួន​បន្ទាប់​ពី​ប្លន់​ម៉ូតូ​បាន​ពី ខេត្ត​កណ្តាល រួច​ជិះ​គេច​ខ្លួន​ទៅ​ដល់ ឃុំ​ពុតស ស្រុក​បាទី ខេត្ត​តាកែវ។

លោក ឃុត ឡូ អធិការ​រង ស្រុក​បាទី ឲ្យ​ដឹង​ថា ជន​សង្ស័យ​ដែល​សមត្ថកិច្ច​ចាប់​ខ្លួន​ឈ្មោះ ថុល បញ្ញា អាយុ ២៥​ឆ្នាំ មាន​លំនៅ ភូមិ​ត្រពាំងលាន ឃុំ​ចំបក់ ស្រុក​បាទី ខេត្ត​តាកែវ និង​ជន​សង្ស័យ​ស្លាប់​ឈ្មោះ ដេរ អាយុ ២៥​ឆ្នាំ រស់​នៅ ក្រុង​តាខ្មៅ ខេត្ត​កណ្តាល។ លោក​បាន​បន្ត​ថា៖ «ជន​សង្ស័យ​ប្លន់​ម៉ូតូ​ពី ខេត្ត​កណ្តាល ហើយ​នគរបាល​មូលដ្ឋាន​រាយការណ៍​មក​ប្រាប់។ យើង​ទៅ​មិន​ទាន់​ពលរដ្ឋ​ស្ទាក់​វាយ​ស្លាប់​ព្រោះ​ជន​សង្ស័យ​ព្យាយាម​រត់​គេច»។

លោក​ថា មុន​កើត​ហេតុ​ថ្ងៃ​ព្រហស្បតិ៍​ម៉ោង​ជាង ១០ សមត្ថកិច្ច​បាន​រាយការណ៍​ពី​ភិន​ភាគ​ម៉ូតូ​ដែល​ជន​សង្ស័យ​ប្លន់​ជិះ​គេច​ខ្លួន​ហើយ​សមត្ថកិច្ច​ស្រុក​បាន​រាយ​កម្លាំង​ពួន​ស្ទាក់​មួយ​សន្ទុះ​បាន​ឃើញ​ជន​សង្ស័យ​ម្នាក់។ ឃើញ​សភាពការណ៍​មិន​ស្រួល​ជន​សង្ស័យ​ជិះ​បក​ក្រោយ​និង​ផ្តួល​ម៉ូតូ​ចោល​រួច​រត់​កាត់​ស្រែ​ប្រាំង​តែ​ត្រូវ​ពលរដ្ឋ​កំពុង​ធ្វើ​ស្រែ​ស្ទាក់​វាយ​រហូត​ស្លាប់៕

ព័ត៌មានថ្មីៗ