លោក​និង​កូន​សិស្ស​ក្នុង​វត្ត​ស្វាយធំ ស្វាយរៀង​ពុល​ចង្ហាន់​ផ្អើល​ពេញ​វត្ត


ស្វាយរៀងៈ លោក​សង្ឃ ២៥ អង្គ​និង​កូន​សិស្ស ៣ នាក់​ដែល​គង់​នៅ​ក្នុង វត្ត​ស្វាយ​ធំ ក្នុង ស្រុក​ស្វាយជ្រំ ខេត្ត​ស្វាយរៀង បាន​ពុល​ក្អូត​ចង្អោរ​ឆោឡោ​ពេញ​វត្ត​បន្ទាប់​ពី​ឆាន់​ចង្ហាន់​ថ្ងៃ​ត្រង់​រួច​កាល​ពី​ម្សិលមិញ ធ្វើ​ឲ្យ​ផ្អើល​អស់​អ្នក​ភូមិ​នាំ​គ្នា​មក​ជួយ​ដឹក​តាម​រ៉ឺម៉ក​ខ្លះ តាម​រថយន្ត​ខ្លះ​បញ្ជូន​ទៅ​កាន់​មន្ទីរពេទ្យ​បង្អែក​ខេត្ត​ដើម្បី​ជួយ​សង្គ្រោះ។

បើ​តាម​លោក ឃឹម ម៉ានិត នាយ​នគរបាល​ប៉ុស្តិ៍ ឃុំ​ស្វាយចេក ឲ្យ​ដឹង​តាម​យាយ​ជី​និយាយ​ប្រាប់​លោក​ថា ព្រះសង្ឃ​ដែល​ពុល​ចង្ហាន់​នោះ​មាន​ច្រើន អង្គ​គាត់​មិន​ចាំ​ព្រះ​នាម​ទេ តែ​មុន​ពេល​ឆាន់​នោះ មាន​លោក​នេនៗ​ប៉ុន្មាន​អង្គ​បាន​ស្ល​សម្ល​ប្រហើរ​ត្រី​មួយ​មុខ មាន​ពង​ទា​ចៀន ខ​សាច់​ជ្រូក និង​មាន​ម្ហូប​សល់​ខ្លះ​ទៀត​ជា​ចង្ហាន់។ បន្ទាប់​ពី​ឆាន់​រួច​មាន​លោក​អង្គ​ខ្លះ​និមន្ត​ទៅ​កុដិ​និង​អង្គ​ខ្លះ​មិន​ទាន់​ទាំង​ទៅ​ដល់​កុដិ​ផង​ក៏​ក្អួត​ចង្អោរ​បន្តៗ​គ្នា​ពេញ​វត្ត​តែ​ម្តង។

លោក​មេប៉ុស្តិ៍​បន្ត​ថា៖ «ពុទ្ធ​បរិស័ទ​ចំណុះ​ជើង​វត្ត​និង​យាយ​ជី តា​អាចារ្យ រត់​ប្រជែង​ជើង​គ្នា​រក​រ៉ឺម៉ក​កង់​បី​និង​រថយន្ត​ដើម្បី​ដឹក​ជញ្ជូន​ទៅ​កាន់​មន្ទីរពេទ្យ​ខេត្ត​បន្ត​បន្ទាប់»។

លោក​និយាយ​ដែរ​ថា៖ «ថ្ងៃ​នោះ​ចៅ​អធិការ​វត្ត​និមន្ត​ទៅ​សិក្ខាសាលា​នៅ​ទីរួម​ខេ​ត្តបាត់ កុំ​អី​ពុល​ទាំង​អស់​គ្មាន​សល់​អង្គ​ណា​ទេ»។

លោក​ថា ព្រះ​សង្ឃ​ទាំង ២៥​អង្គ និង​កូន​សេក ៣​នាក់ ដែល​ពុល​នោះ​រហូត​មក​ទល់​ល្ងាច​ថ្ងៃ​ម្សិលមិញ​បាន​ធូរ​ស្បើយ​វិញ​ហើយ​មិន​មាន​អ្នក​ណា​ធ្ងន់ធ្ងរ​ទេ។

លោក ចន្ទ ដារ៉ា ប្រធាន​មន្ទីរពេទ្យ ខេត្ត​ស្វាយរៀង មិន​អាច​ទាក់ទង​បាន​ទេ ពី​ម្សិលមិញ។ តែ​បើ​តាម​លោក​មេប៉ុស្តិ៍​អះអាង​ថា លោក​ប្រធាន​មន្ទីរពេទ្យ​បង្អែក​ខេត្ត​បាន​ប្រាប់​លោក​ថា ការ​ពុល​អាហារ​នេះ​មិន​ទាន់​ដឹង​ថា ពុល​ម្ហូប​មុខ​ម្ហូប​ណា​មួយ​ទេ ទាល់​តែ​យក​ទៅ​ធ្វើ​ការ​ពិសោធ​នៅ​ភ្នំពេញ​សិន ហើយ​ឥឡូវ​អាហារ​ទាំង​ប៉ុន្មាន​នោះ​បាន​វេច​ខ្ចប់​មក​ពិសោធ​ហើយ៕

ព័ត៌មានថ្មីៗ