សមត្ថកិច្ច​កំពុង​បន្ត​ស៊ើប​ករណី​ចាក់​សម្លាប់​ស្ត្រី​ចិន


ភ្នំពេញៈ សមត្ថកិច្ច​កំពុង​បន្ត​ធ្វើ​ការ​ស៊ើប​អង្កេត​ករណី​ឃាតកម្ម​ចាក់​សម្លាប់​ស្រ្តី​ជាតិ​ចិន​ម្នាក់​នៅ ខណ្ឌ​ពោធិ៍​សែន​ជ័យ ដែល​កម្មករ​ប្រទះ​ឃើញ​សាកសព​កាល​ពី​ថ្ងៃ​សៅរ៍។

លោក យឹម សារ៉ាន់ អធិការ ខណ្ឌ​ពោធិ៍​សែន​ជ័យ បាន​ឲ្យ​ដឹង​កាល​ពី​ម្សិលមិញ​ថា ស្រ្តី​ចិន​ដែល​ត្រូវ​គេ​សម្លាប់​នោះ​សមត្ថកិច្ច​កំពុង​ធ្វើ​ការ​ស៊ើប​អង្កេត​តាម​រយៈ​ការ​ធ្វើ​កោសល្យវិច័យ​លើ​ស្លាក​ស្នាម​ចាក់​ដើម្បី​កំណត់​អត្តសញ្ញាណ​ជន​ល្មើស។ ស្រ្តី​រងគ្រោះ​ឈ្មោះ ចាំង លី អាយុ ៤៣​ឆ្នាំ ជាតិ ចិន ដី​គោក​គឺជា​ម្ចាស់​សិប្បកម្ម​ដេរ​មួក​តូច​មួយ​នៅ ភូមិ​ត្រពាំង​ថ្លឹង សង្កាត់​ចោមចៅ ដែល​មាន​កម្មករ​ធ្វើ​ការ​ក្នុង​សិប្បកម្ម​នេះ ប្រហែល ១៥​នាក់ ប៉ុណ្ណោះ។ «យើង​សង្ស័យ​ឃាតកម្ម​នេះ​ធ្វើ​ឡើង​ដោយ​គំនុំ​ច្រើន​ជាង​អំពើ​ប្លន់​សម្លាប់ ពីព្រោះ​ជន​រងគ្រោះ​អត់​ឃើញ​បាត់បង់​ទ្រព្យ​សម្បត្តិ​អី​ទេ»។

បើ​តាម​លោក សារ៉ាន់ ស្រ្តី​រងគ្រោះ​ត្រូវ​បាន​កម្មករ​ឃើញ​ដេក​ស្លាប់​ក្នុង​ថ្លុក​ឈាម​នៅ​ក្បែរ​ជណ្តើរ​ផ្ទះ កាល​ពី​ព្រឹក​ថ្ងៃ​សៅរ៍។ ជន​រងគ្រោះ​ត្រូវ​គេ​ចាក់​សម្លាប់​នឹង​វត្ថុ​រឹង​អាច​ជា​កន្រៃ្ត​ប្រហែល ១០ កន្លែង​នៅ​ត្រង់​បរិវេណ​ពោះ ក និង​នៅ​ចង្កេះ។

ករណី​ដូច​គ្នា​នេះ​ដែរ កាល​ពី​ថ្ងៃ ទី២៩ ខែ​មេសា ស្រ្តី​ជាតិ ហូឡង់ ឈ្មោះ Daphna Beerdsen អាយុ ៣១​ឆ្នាំ ម្នាក់​ធ្វើការ​នៅ​អង្គការ UNHABITAT ស្នាក់នៅ​ផ្ទះ​ជួល​ក្នុង សង្កាត់​ទន្លេ​បាសាក់ ត្រូវ​បាន​គេ​ចាក់​សម្លាប់​ឲ្យ​ដេក​ដួល​ក្នុង​ថ្លុក​ឈាម​ខណៈ​កូន​ស្រី​តូច​អាយុ ១៩​ខែ រង​របួស​ធ្ងន់​ហើយ​មួយ​ថ្ងៃ​បន្ទាប់​មក​ជន​សង្ស័យ​ត្រូវ​ចាប់​ខ្លួន។

លោក មុំ ស៊ីថា ប្រធាន​ការិយាល័យ​ជន​អន្តោប្រវេសន៍​រាជធានី​ភ្នំពេញ បាន​ឲ្យ​ដឹង​ថា គិត​ពី​ដើ​ម ឆ្នាំ​២០១៤ ដល់​ដើម ខែ​ឧសភា នេះ​អំពើ​ឃាតកម្ម​មក​លើ​ជន​បរទេស​មាន​តែ ២ ករណី​នេះ​ទេ គឺ​ស្រ្តី​ជនជាតិ ហូឡង់ និង​ស្រ្តី​ជនជាតិ ចិន ដែល​ត្រូវ​បាន​គេ​សម្លាប់​នៅ ខណ្ឌ​ពោធិ៍​សែន​ជ័យ នេះ៕

ព័ត៌មានថ្មីៗ