សាលា​ឧទ្ធរណ៍​តម្កល់​ទោស ហេង ពៅ តែ​កូន​ចៅ​បី​នាក់​ត្រូវ​បន្ថយ​ទោស​រឿង​បាញ់ ថុង អ៊ុយប៉ាង


20140408_09
ជនជាប់ចោទ ហេង ពៅ ចេញពីសវនាការនៅសាលាឧទ្ធរណ៍

ភ្នំពេញៈ សំណុំ​រឿង ៤ របស់​លោក ហេង ពៅ អតីត​ស្នងការ​នគរបាល​រាជធានី និង​គូកន ៣ នាក់​ដែល​មាន​សំណុំ​រឿង​បាញ់​ប្រហារ​លោក ថុង អ៊ុយប៉ាង ចាងហ្វាង​កាសែត កោះ​សន្តិភាព ផង ត្រូវ​សាលា​ឧទ្ធរណ៍​ប្រកាស​សាល​ដីកា​សម្រេច​តម្កល់​ទោស ហេង ពៅ និង​បន្ថយ​ទោស​ដល់​គូកន​ពី​ជាប់​គុក ១៨​ឆ្នាំ មក​ត្រឹម ១៦​ឆ្នាំ ម្នាក់​វិញ។

លោក សេង ស៊ីវុត្ថា ប្រធាន​ក្រុម​ប្រឹក្សា​ជំនុំ​ជម្រះ​សាលា​ឧទ្ធរណ៍​ថ្លែង​ថា សំណុំ​រឿង​ជន​ជាប់​ចោទ ហេង ពៅ និង​គូកន​ដែល​ចោទ​ប្រកាន់​ពី​បទ​បាញ់​ប្រហារ​ចាងហ្វាង​កាសែត កោះ​សន្តិភាព ដែល​លើក​មក​ជំនុំ​ជម្រះ​កាល​ពី​ថ្ងៃ ទី​២៦ ខែ​មីនា ក្រុម​ប្រឹក្សា​ជំនុំ​ជម្រះ​សាលា​ឧទ្ធរណ៍​បាន​ពិនិត្យ​សម្រេច​បន្ថយ​ទោស​ជន​ជាប់​ចោទ លី រ៉ាស៊ី (អតីត​អនុ​ប្រធាន​ការិយាល័យ​ព្រហ្មទណ្ឌ​កម្រិត​ស្រាល​រាជធានី) ផេង ផៃ និង ហេង វ៉េង ដែល​សាលា​ដំបូង​កាត់​ទោស​ឃុំ​ខ្លួន ១៨​ឆ្នាំ ម្នាក់​មក​ត្រឹម ១៦​ឆ្នាំ វិញ ហើយ​ជន​ជាប់​ចោទ ហេង ពៅ នៅ​រក្សា​ទោស​ឃុំ​ខ្លួន ១៦​ឆ្នាំ ដដែល។

លោក​ចៅក្រម​ថ្លែង​ថា៖ «សំណុំ​រឿង​នេះ តុលាការ​បាន​កែប្រែ​ការ​ចោទ​ពី​បទ​ប៉ុនប៉ង​ឃាតកម្ម​គិត​ទុក​ជា​មុន មក​ជា​បទ​សម​គំនិត​វិញ»។

តាម​អង្គហេតុ​កាល​ពី​ថ្ងៃ ទី៨ ខែ​មិថុនា ឆ្នាំ​១៩៩៩ មាន​ជន​ប្រដាប់​អាវុធ ២​នាក់ បាញ់​ប្រហារ​លើ​លោក ថុង អ៊ុយប៉ាង ក្នុង​កម្មវិធី​បុណ្យ​មួយ​នៅ វត្ត​ទឹកថ្លា ធ្វើ​ឲ្យ​រង​របួស​ត្រូវ​គ្រាប់​ចំនួន ២ គ្រាប់ តែ​អង្គរក្ស​គាត់​បាន​បាញ់​ត​វិញ​បណ្តាល​ឲ្យ​ត្រូវ​ជន​ល្មើស ១ គ្រាប់​របួស​ដៃ​ឆ្វេង​និង​ត្រូវ​សមត្ថកិច្ច​រក​ឃើញ​ថា មាន​ការ​ពាក់ព័ន្ធ​នឹង ហេង វ៉េង, លី រ៉ាស៊ី និង ផេង ផៃ ក្រោម​ការ​បញ្ជា​ពី​លោក ហេង ពៅ។ សំណុំ​រឿង​នេះ​ត្រូវ​សាលា​ដំបូង​រាជធានី​សម្រេច​ផ្តន្ទាទោស លី រ៉ាស៊ី ហេង វ៉េង និង ផេង ផៃ ពី​ថ្ងៃ ទី​១០ ខែ​ធ្នូ ឆ្នាំ​២០០៩ ដាក់​ពន្ធនាគារ ១៨​ឆ្នាំ ម្នាក់​និង​ឃុំ​ខ្លួន​ជន​ជាប់​ចោទ ហេង ពៅ ចំនួន ១៦​ឆ្នាំ ពី​បទ​សម​គំនិត និង​បង្គាប់​ឲ្យ​អ្នក​ទាំង ៣​នាក់ សង​ទៅ​ជន​រងគ្រោះ ១៧ ម៉ឺន​ដុល្លារ តែ​ត្រូវ​ជន​ជាប់​ចោទ​ប្តឹង​ទាស់​មក​សាលា​ឧទ្ធរណ៍។

ក្នុង​សវនាការ​ប្រកាស​សាលដីកា​ម្សិលមិញ​នេះ​សម្រាប់​សំណុំ​រឿង ៣​ទៀត ក្រុម​ប្រឹក្សា​ជំនុំ​ជម្រះ​សាលា​ឧទ្ធរណ៍​បាន​ប្រកាស​សម្រេច​តម្កល់​សាល​ក្រម​សាលា​ដំបូង​រាជធានី​ទុក​ជា​បាន​ការ​ដដែល។ សំណុំ​រឿង ទី២ ជន​ជាប់​ចោទ ហេង ពៅ ត្រូវ​សាលា​ដំបូង​ដាក់​ពន្ធនាគារ ១៤​ឆ្នាំ ហើយ​ឈ្មោះ ងិន សុធាវី ជា​ប្រពន្ធ (នៅ​ក្រៅ​ឃុំ) ត្រូវ​ដាក់​ពន្ធនាគារ ២០​ឆ្នាំ ពី​បទ​រក្សា​ទុក​ក្រដាស​ប្រាក់​ក្លែង​ក្លាយ ១០០ ដុល្លារ​ចំនួន ៣០០ សន្លឹក ក្នុង ឆ្នាំ​២០០៦។ សំណុំ​រឿង ទី៣ ឈ្មោះ ហេង ពៅ ត្រូវ​តុលាការ​ផ្តន្ទាទោស ៥​ឆ្នាំ ពី​បទ​បង្ខាំង​មនុស្ស​ខុស​ច្បាប់​ក្នុង ឆ្នាំ​២០០៣ ដែល​មាន​ជន​រងគ្រោះ​ឈ្មោះ ចាន់ សៀក។ រីឯ​សំណុំ​រឿង ទី​៤ សាលា​ដំបូង​បាន​ផ្តន្ទាទោស​ដាក់​ពន្ធនាគារ ហេង ពៅ ចំនួន ៧​ឆ្នាំ និង​ឃុំ​ខ្លួន លី រ៉ាស៊ី ៦​ឆ្នាំ ពី​បទ​បង្ខាំង​មនុស្ស​ខុស​ច្បាប់​ក្នុង ឆ្នាំ​២០០៥ ដែល​មាន​ជន​រងគ្រោះ ហេង គឹមលាង។

ទាក់ទិន​នឹង​ការ​សម្រេច​របស់​សាលា​ឧទ្ធរណ៍​នេះ ទាំង​ជន​ជាប់​ចោទ និង​មេធាវី​ការពារ​ក្តី​ពួកគេ​មិន​អាច​ទាក់ទង​ដើម្បី​សួរ​បញ្ជាក់​ពី​ការ​ប្តឹង​សារទុក្ខ​បាន​ទេ កាល​ពី​ម្សិលមិញ៕

ព័ត៌មានថ្មីៗ