ស្ត្រី​ជះ​ទឹក​អាស៊ីត​លើ​ប្តី​ត្រូវ​ព្រះ​រាជអាជ្ញា​ចោទ​ប្រកាន់


បន្ទាយ​មាន​ជ័យៈ ព្រះ​រាជអាជ្ញា ខេត្ត​បន្ទាយ​មាន​ជ័យ កាល​ពី​ម្សិលមិញ​បាន​សម្រេច​ចោទ​ស្រ្តី​ម្នាក់​ដែល​ជះ​ទឹក​អាស៊ីត​ទៅ​លើ​ប្តី​របស់​ខ្លួន​កាល​ពី​យប់​ថ្ងៃ​អង្គារ ពី​បទ​ប្រើ​ហិង្សា​ដោយ​ចេតនា​លើ​អ្នក​ដទៃ​ដោយ​ប្រើ​អាស៊ីត​ខ្លាំង និង​បាន​បញ្ជូន​ទៅ​ចៅក្រម​ស៊ើប​សួរ​សម្រេច​ធ្វើ​ការ​ឃុំ​ខ្លួន​ជា​បណ្តោះ​អាសន្ន។

លោក ឡុង ជាប ព្រះ​រាជអាជ្ញា​រង​សាលា​ដំបូង ខេត្ត​បន្ទាយ​មាន​ជ័យ បាន​ប្រាប់​ឲ្យ​ដឹង​កាល ពី​ម្សិលមិញ​ថា លោក​បាន​ធ្វើ​ការ​ចោទ​ស្រី្ត​រូប​នេះ​រួច​ហើយ​ពី​បទ​ប្រើ​ហិង្សា​ដោយ​ចេតនា ទៅ​លើ​អ្នក​ដទៃ​ដោយ​ប្រើ​អាស៊ីត​ខ្លាំង​តាម​ច្បាប់​អាស៊ីត​ថ្មី​មាត្រា ២០។

យោង​តាម​ច្បាប់​អាស៊ីត​មាត្រា ២០ បាន​ចែង​ថា៖ «អំពើ​ហិង្សា​ដោយ​ចេតនា​ទៅ​លើ​អ្នក​ដទៃ​ដោយ​ប្រើ​អាស៊ីត​ខ្លាំង​ត្រូវ​ផ្តន្ទាទោស​ដាក់​ពន្ធនាគារ​ពី ២ ឆ្នាំ​ទៅ ៥ ឆ្នាំ​និង​ពិន័យ​ជា​ប្រាក់​ពី ៤ លាន​រៀល​ទៅ ១០ លាន​រៀល។ ត្រូវ​ផ្តន្ទាទោស​ដាក់​ពន្ធនាគារ​ពី ៥ ឆ្នាំ​ទៅ ១០ ឆ្នាំ​កាល​បើ​ការ​ប្រព្រឹត្ត​អំពើ​នេះ​នាំ​ឲ្យ​មាន​ការ​កាត់​អវយវៈ ឬ​ឲ្យ​មាន​ពិការភាព​ជា​អចិន្រៃ្តយ៍​ដល់​ជន​រងគ្រោះ»។

សមត្ថកិច្ច ខេត្ត​បន្ទាយ​មាន​ជ័យ បាន​ប្រាប់​កាសែត ភ្នំពេញ ប៉ុស្តិ៍ កាល​ពី​ថ្ងៃ​ពុធ​ថា ស្រ្តី​វ័យ ២៦​ឆ្នាំ ម្នាក់​បាន​យក​ទឹក​អាស៊ីត​ស្រោច​ទៅ​លើ​ប្តី​របស់​ខ្លួន​ឲ្យ​រង​របួស​ជា​ទម្ងន់​នៅ​លើ​ផ្ទៃ​មុខ និង​ដង​ខ្លួន​ដោយ​សារ​តែ​មាន​ជម្លោះ ព្រោះ​តែ​រឿង​ប្រចណ្ឌ​ប្តី​មាន​ស្រី​ថ្មី។

ជន​រងគ្រោះ​ត្រូវ​បាន​បញ្ជូន​ទៅ​កាន់​មន្ទីរពេទ្យ​បង្អែក ក្រុង​សិរីសោភ័ណ ដើម្បី​ព្យាបាល​របួស។ នៅ​ពេល​ទាក់​ទង​សួរ​ពី​ស្ថានភាព​អ្នក​រងគ្រោះ អ្នក​គ្រូពេទ្យ ស៊ិន សារ៉ូ បុគ្គលិក​ផ្នែក​សង្គ្រោះ​បន្ទាន់​នៃ​មន្ទីរពេទ្យ​បង្អែក ក្រុង​សិរីសោភ័ណ បាន​ប្រាប់​ថា ជន​រងគ្រោះ​ត្រូវ​បញ្ជូន​បន្ត​នៅ​មន្ទីរពេទ្យ​បង្អែក ស្រុក​មង្គលបុរី ដោយ​សារ​ភ្នែក​គាត់​រងគ្រោះ​ធ្ងន់ធ្ងរ។

អ្នក​គ្រូពេទ្យ​ថ្លែង​ថា៖ «ភ្នែក​ឆ្វេង​របស់​ជន​រងគ្រោះ​អាច​នឹង​ជ្រុះ​ចេញ​ដោយ​សារ​រង​ការ​ប៉ះពាល់​ខ្លាំង​ពី​អាស៊ីត។ គាត់​មក​ព្យាបាល​នៅ​ទីនេះ ២ យប់​រួច​យើង​ក៏​បាន​បញ្ជូន​គាត់​ទៅ​ពេទ្យ មង្គលបុរី ដែល​មាន​អ្នក​ជំនាញ​ខាង​ភ្នែក​នៅ​ទី​នោះ»៕

ព័ត៌មានថ្មីៗ