ស្ត្រី​ពពោះ​បី​ខែ​ប្តឹង​ព្រះសង្ឃ​មួយ​អង្គ​ថា​បោក​យក​ខ្លួន​នាង


កំពតៈ ស្រ្តី​ម្នាក់​មាន​ផ្ទៃ​ពោះ ៣​ខែ បាន​ប្តឹង​សង្ឃ ១ អង្គ​គង់​នៅ វត្ត​ព្រៃតាកុយ ក្នុង ស្រុក​ដំណាក់​ចង្អើរ ទៅ​មន្ទីរ​ធម្មការ​និង​សាសនា ខេត្ត​កំពត ដោយ​ចោទ​សង្ឃ​អង្គ​នោះ​ថា បាន​សេព​មេថុនធម្ម​ជាមួយ​នាង​ហើយ​គេច​មិន​ទទួល​ខុស​ត្រូវ។

លោក មៀច អែម ប្រធាន​មន្ទីរ​ធម្មការ​និង​សាសនា ខេត្ត​កំពត ប្រាប់​ថា សំណុំ​រឿង​សង្ឃ​និង​ស្រ្តី​ដើម​បណ្តឹង​នោះ​មិន​ទាន់​ដោះស្រាយ​បាន​ទេ តែ​សង្ឃ​រង​ការ​ចោទ​ប្រកាន់​នោះ​ត្រូវ​មេគណ​ខេត្ត​ដក​យក​មក​គង់​នៅ វត្ត​កំពង់ត្រឡាច ក្នុង ក្រុង​កែប សិន​រង់ចាំ​បុណ្យ​វិសាខបូជា​រួច​រាល់​ទើប​ធ្វើ​ការ​ដោះស្រាយ។

លោក នួន នី ប្រធាន​ការិយាល័យ​ធម្មការ ស្រុក​ដំណាក់​ចង្អើរ បាន​ឲ្យ​ដឹង​ថា ស្រ្តី​ឈ្មោះ ហ៊ាន អៀង អាយុ ១៨​ឆ្នាំ រស់​នៅ ភូមិ​ព្រៃតាកុយ ឃុំ​ពងទឹក ស្រុក​ដំណាក់​ចង្អើរ ខេត្ត​កំពត បាន​ដាក់​ពាក្យ​ប្តឹង​សង្ឃ ព្រះ​នាម សេង ឧត្តម ព្រះជន្ម ២១​ឆ្នាំ គង់​នៅ វត្ត​ព្រៃតាកុយ អង្គ​ក្នុង​ភូមិ​ជាមួយ​គ្នា​ដោយ​ចោទ​សង្ឃ​អង្គ​នោះ​ថា គេច​មិន​ព្រម​សឹក​មក​រៀបការ​ជាមួយ​នាង​ប៉ុន្តែ​ការ​ដោះស្រាយ​រឿង​នេះ​គ្មាន​លទ្ធផល​ទេ ព្រោះ​ខាង​សង្ឃ​ប្រកែក​ហើយ​ខាង​ធម្មការ​ស្រុក​បាន​បញ្ជូន​រឿង​នេះ​ទៅ​ធម្មការ​ខេត្ត​ធ្វើ​ការ​ដោះស្រាយ​ហើយ។

លោក​ប្រាប់​ថា ករណី​ទំនាស់​នេះ​ក្នុង​បណ្តឹង​ខាង​ស្រី​បាន​ទាមទារ​ឲ្យ​សង្ឃ​នោះ​សឹក​ទទួល​ខុស​ត្រូវ​ដើម្បី​រៀបការ​ត្រឹម​ត្រូវ​តាម​ច្បាប់​តែ​បើ​មិន​ព្រម​រៀបការ​ទេ​ត្រូវ​សង​ប្រាក់ ៣ ពាន់​ដុល្លារ​ដល់​នាង​តែ​ភាគី​ខាង​ព្រះ​សង្ឃ​លោក​មិន​ព្រម។

លោក​ប្រាប់​បន្ត​ថា៖ «រឿង​នេះ​ខ្ញុំ​ហៅ​ភាគី​ទាំង ២ មក​សម្រុះ​សម្រួល​គ្នា​ដែរ តែ​មិន​បាន​ផល​ហើយ​ខ្ញុំ​ក៏​បញ្ជូន​ឡើង​ទៅ​ធម្មការ​ខេត្ត​ដោះស្រាយ​ទៀត»។

អ្នក​ស្រី សៀង មុំ ជា​ម្តាយ​មីង​ស្រ្តី​ដើម​បណ្តឹង​បាន​ឲ្យ​ដឹង​ថា មុន​ដំបូង​គ្រួសារ​នាង​ប្តឹង​ទារ​ជំងឺ​ចិត្ត ៣ ពាន់​ដុល្លារ តែ​ដោយសារ​រឿង​នេះ​បែក​ធ្លាយ​កាន់​តែ​ធំ​ទៅៗ​ខាង​គ្រួសារ​នាង​គិត​គ្នា​ជា​ថ្មី​ថា តើ​ត្រូវ​ការ​សំណង​សមរម្យ​ប៉ុន្មាន​ពី​សង្ឃ​អង្គ​នោះ។

តាម​នារី​រងគ្រោះ​ប្រាប់​សមត្ថកិច្ច​ថា ព្រះសង្ឃ​អង្គ​នោះ​តែង​តែ​និមន្ត​មក​លេង​ផ្ទះ​នាង​មិន​លស់​ថ្ងៃ​ទេ ហើយ​ស្គាល់​គ្នា​និង​សុំ​លេខ​ទូរស័ព្ទ​ពី​នាង​ហើយ​ក៏​បាន​ទាក់ទង​គ្នា​បាន​រយៈ ១ ឆ្នាំ។ សង្ឃ​អង្គ​នោះ​តែង​និមន្ត​វាង​តាម​ផ្លូវ​ផ្សេងៗ មក​ផ្ទះ​នាង​ហើយ​លួង​លោម​សេពមេថុន​ជាមួយ​នាង​បាន​ចំនួន ៣ ដង​និង​ប្រាប់​កុំ​ឱ្យ​ប្រាប់​ឪពុក​ម្តាយ​ឬ​អ្នក​ភូមិ​ដោយ​រង់​ចាំ​លោក​បំពេញ​ផ្នួស​ជា​ភិក្ខុ​សង្ឃ​រួច ទើប​សឹក​មក​រៀបការ​ជាមួយ​នាង​តែ​សង្ឃ​អង្គ​នោះ​មិន​បាន​គោរព​តាម​ការ​សន្យា​ឡើយ ហើយ​ដោយ​នាង​មាន​ផ្ទៃ​ពោះ​ទើប​ប្តឹង​មក​ធម្មការ​ស្រុក​ឲ្យ​ជួយ​ដោះស្រាយ៕

ព័ត៌មានថ្មីៗ