ស្ត្រី​វៀតណាម​ជាប់​ចោទ​ជួញ​ថ្នាំ​ញៀន​ថយ​ទោស​ជាប់​ឃុំ​ពីរ​ឆ្នាំ


ភ្នំពេញៈ សាលា​ឧទ្ធរណ៍​ពី​ថ្ងៃ​ចន្ទ បាន​ប្រកាស​សាលដីកា​បន្ថយ​ទោស​ដល់​ស្រ្តី​ជាប់​ចោទ វៀតណាម ២​នាក់ ឲ្យ​នៅ​ជាប់​ឃុំ​តែ ២​ឆ្នាំ វិញ​ពី​បទ​ជួញ​ដូរ​គ្រឿង​ញៀន​ជិត ២០ ក្រាម ខណៈ​ដែល​តុលាការ​ថ្នាក់​ក្រោម​សម្រេច​ដាក់​ឃុំ​ពួក​គេ ៤ឆ្នាំ។

លោក​ស្រី ចាន់ ម៉ាឌីណា ប្រធាន​ក្រុម​ប្រឹក្សា​ជំនុំ​ជម្រះ ប្រកាស​ថា ក្រោយ​បើក​សវនាការ​ជំនុំ​ជម្រះ​ជន​ជាប់​ចោទ​ឈ្មោះ ង្វៀង ធីគុក អាយុ ៤៦​ឆ្នាំ និង​ឈ្មោះ ង្វៀង ធីគាវ អាយុ ៣៤​ឆ្នាំ (២៤ មេសា) ក្រុម​ប្រឹក្សា​សាលា​ឧទ្ធរណ៍​យល់​ឃើញ​ថា ការ​សម្រេច​របស់​សាលា​ដំបូង​រាជធានី ពិត​ជា​ត្រឹម​ត្រូវ​តាម​គតិ​ច្បាប់​និង​រក្សា​ការ​ជាប់​ឃុំ​ដដែល ប៉ុន្តែ​កែប្រែ​ទោស​ឃុំ​ខ្លួន​ពី ៤​ឆ្នាំ ម្នាក់​មក​ត្រឹម ២​ឆ្នាំ ម្នាក់​វិញ។

លោក​ស្រី​បន្ត​ថា ជន​ជាប់​ចោទ​ទាំង ២​នាក់ អនុវត្ត​ទោស​ជាង ១ ឆ្នាំ​ហើយ​ពេល​នេះ​ជន​ជាប់​ចោទ​ម្នាក់​មាន​ជំងឺ​គីស​ដោះ ដែល​ត្រូវ​អនុវត្ត​តាម​គ្រូពេទ្យ​នៅ​ពន្ធនាគារ​ទៅ​តាម​សភាព​ជំងឺ​ជាក់​ស្តែង។

លោក​ស្រី​បញ្ជាក់​ថា៖ «តុលាការ​បន្ថយ​ទោស​មក​ត្រឹម ២​ឆ្នាំ ព្រោះ​ជន​ជាប់​ចោទ​ទាំង ២​នាក់ មាន​ជំងឺ​ប្រចាំ​កាយ និង​មាន​សំបុត្រ​ពេទ្យ​បញ្ជាក់​ផង ដូច្នេះ​អ្នក​ទាំង ២ ត្រូវ​ជាប់​ទោស​មួយ​ឆ្នាំ​ទៀត»។

តាម​អង្គហេតុ ង្វៀង ធីគុក នៅ ភូមិ​លូ សង្កាត់​ស្វាយប៉ាក ខណ្ឌ​ឫស្សីកែវ ត្រូវ​សមត្ថកិច្ច​ប្រឆាំង​គ្រឿង​ញៀន​រាជធានី​ចាប់​ខ្លួន​នៅ​ថ្ងៃ ទី​១១ ខែ​មិថុនា ឆ្នាំ​២០១៣ បី​ថ្ងៃ​ក្រោយ​សមត្ថកិច្ច​បាន​បន្ត​មក​ឆែកឆេរ​ផ្ទះ​ឈ្មោះ ង្វៀង ធីគាវ ក៏​បាន​រក​ឃើញ​រឹប​អូស​បាន​ថ្នាំ​ញៀន មេតំហ្វេតាមីន ១០ គ្រាប់​និង​ថ្នាំ​ម៉ា​ទឹកកក ៦ កញ្ចប់​តូច​ស្មើ ១៩,៨៥ ក្រាម។ សំណុំ​រឿង​នេះ​សាលា​ដំបូង​រាជធានី​សម្រេច​ផ្តន្ទាទោស​ជន​ជាប់​ចោទ​ដាក់​ពន្ធនាគារ​ម្នាក់ៗ ៤​ឆ្នាំ និង​ពិន័យ​ប្រាក់​ម្នាក់ ៣ លាន​រៀល​ចូល​ថវិកា​រដ្ឋ៕

ព័ត៌មានថ្មីៗ