ស្រវឹង​បង្ក​របួស​លើ​ក្មួយ​ស្រី​ត្រូវ​ជាប់​ចោទ​នៅ​តុលាការ


កណ្តាលៈ បុរស​ម្នាក់​ត្រូវ​សមត្ថកិច្ច​នគរបាល ស្រុក​កោះ​ធំ ឃាត់​ខ្លួន​រួច​កសាង​សំណុំ​រឿង​បញ្ជូន​ទៅ​តុលាការ ខេត្ត​កណ្តាល កាល​ពី​ថ្ងៃ​ចន្ទ បន្ទាប់​ពី​ស្រវឹង​ស្រា​ទៅ​បង្ក​ទំនាស់​ក្នុង​គ្រួសារ​ចាប់​បោក​ក្បាល​ក្មួយ​ស្រី​ផ្ទប់​ទៅ​នឹង​សសរ​ផ្ទះ​របួស​ធ្ងន់ កាល​ពី​ថ្ងៃ​អាទិត្យ។

លោក រឿង ដារ៉ា ស្នងការ​រង ខេត្ត​កណ្តាល បាន​ឲ្យ​ដឹង​ថា ជន​សង្ស័យ​ឈ្មោះ សែម សុវណ្ណ អាយុ ៤១​ឆ្នាំ ដែល​ស្រវឹង​រួច​បង្ក​ជម្លោះ​និង​ចាប់​ក្មួយ​ស្រី​បោក​ក្បាល​នឹង​សសរ​ផ្ទះ​របួស​ត្រូវ​បញ្ជូន​ទៅ​សាលា​ដំបូង ខេត្ត​កណ្តាល បន្ទាប់​ពី​សមត្ថកិច្ច​ស្រុក​បញ្ជូន​មក​ស្នងការ​កាល​ពី​ព្រឹក​ម្សិលមិញ។

លោក ម៉ែន សេង មន្ត្រី​នគរបាល ស្រុក​កោះ​ធំ ប្រាប់​ឲ្យ​ដឹង​ពី​ម្សិលមិញ​ដែរ​ថា ជន​ល្មើស​ឈ្មោះ សែម សុវណ្ណ ភេទ​ប្រុស អាយុ ៤១​ឆ្នាំ មុខ​របរ​រត់​ម៉ូតូ​ឌុប​រស់​នៅ ភូមិ​ក្បាល​ជ្រោយ ឃុំ​ឈើ​ខ្មៅ ស្រុក​កោះ​ធំ ខេត្ត​កណ្តាល បាន​បោច​សក់​ក្បាល​ក្មេង​ស្រី​ជន​រងគ្រោះ​ឈ្មោះ វន ចាប អាយុ ១៨​ឆ្នាំ បោក​ទៅ​នឹង​សសរ​បែក​ក្បាល ត្រូវ​ដឹក​ទៅ​សង្គ្រោះ​នៅ​មន្ទីរពេទ្យ​ស្រុក។

លោក​រំឭក​ថា នៅ​ថ្ងៃ​នោះ​ជន​ដៃ​ដល់​ជា​ឪពុក​មា បាន​ជិះ​ម៉ូតូ​ទៅ​រត់​ឌុប​តាំង​ពី​ព្រឹក ប៉ុន្តែ​ម៉ោង​ប្រហែល​ជា ១០ ក៏​ត្រឡប់​មក​ផ្ទះ​វិញ ក្នុង​សភាព​ស្រវឹង​ជោក ខណៈ​ដែល​ប្រពន្ធ​សួរ​នាំ គេ​មិន​ត្រឹម​តែ​មិន​ស្តាប់​ប្រពន្ធ​ទេ នៅ​ថែម​បង្ក​ជម្លោះ​រាល​ដាល​រហូត​ទៅ​ដល់​ក្មួយ​ថ្លៃ​ស្រី ហើយ​បាន​ស្ទុះ​មក​ចាប់​បោច​សក់​ក្បាល​ជន​រងគ្រោះ​ទាញ​បោក​ផ្ទប់​ទៅ​នឹង​សសរ​ផ្ទះ​មួយ​ទំហឹង​បណ្តាល​ឲ្យ​បែក​ក្បាល​ដឹក​ទៅ​ពេទ្យ​ផង។ តែ​ភ្លាមៗ​នោះ​ក្រុម​គ្រួសារ​នារី​រងគ្រោះ​ក៏​បាន​ប្តឹង​ទៅ​សមត្ថកិច្ច​ឲ្យ​ចាប់​ខ្លួន​តែ​ម្តង៕

ព័ត៌មានថ្មីៗ