ឡាន​ដឹក​គ្រញូង​ទៅ​បុក​រ៉ឺម៉ក​ឆេះ​ខ្ទេច​នៅ​ស្រុក​បន្ទាយ​ស្រី


សៀមរាបៈ រថយន្ត​ម៉ាក​កាមរី​ឆ្លាម​មួយ​គ្រឿង​បាន​ផ្ទុះ​ឆេះ​ខ្ទេច​អស់​ទាំង​ឈើ​គ្រញូង ក្នុង​ឡាន​ផង នៅ​ពេល​ជួប​គ្រោះថ្នាក់​បុក​ជាមួយ​រ៉ឺម៉ក​ដឹក​ស្រូវ​ហើយ​ជ្រុល​ទៅ​បុក​នឹង​ដើម​អាកាស្យា​នៅ​ចិញ្ចើម​ផ្លូវ​កាល​ពី​ថ្ងៃ​ពុធ​ម្សិលមិញ​នៅ ភូមិ​ខ្នារ ឃុំ​ខ្នារ​សណ្ដាយ ស្រុក​បន្ទាយ​ស្រី ខេត្ត​សៀមរាប។

លោក មុយ ណន អធិការ​ស្តីទី​នៃ​អធិការដ្ឋាន​នគរបាល ស្រុក​បន្ទាយ​ស្រី បាន​ប្រាប់​ថា គ្រោះថ្នាក់​ចរាចរណ៍​រហូត​ផ្ទុះ​ឆេះ​រថយន្ត​នេះ បាន​កើត​ឡើង​កាល​ពី​ម៉ោង ៩ ព្រឹក​ថ្ងៃ​ពុធ​ម្សិលមិញ​បង្ក​ពី​រថយន្ត​កាមរី​ឆ្លាម​ពណ៌​ស​ពាក់​ស្លាក​លេខ​ភ្នំពេញ 2A-2633 បាន​បើក​មក​ពី​ទិស​ខាង​ជើង​ចំណែក​រ៉ឺម៉ក​បើក​ស្រប​ទិស​គ្នា​ពី​មុខ។ លុះ​បើក​មក​ដល់​កន្លែង​កើត​ហេតុ​រថយន្ត​ក៏​បាន​បុក​រ៉ឺម៉ក​ដឹក​ស្រូវ​មួយ​គ្រឿង​ពី​ក្រោយ​ហើយ​ជ្រុល​ទៅ​បុក​ដើម​អាកាស្យា នៅ​លើ​ចិញ្ចើម​ផ្លូវ​ទៀត។

ភ្លាមៗ​សមត្ថកិច្ច​បាន​ចុះ​ទៅ​អន្តរាគមន៍​ទើប​ដឹង​ថា​រថយន្ត​នោះ​មាន​ឈើ​គ្រញូង ប៉ុន្តែ​ឈើ​ឆេះ​អស់​ទៅ​ហើយ។ លោក​ឲ្យ​ដឹង​ថា ឈើ​គ្រញូង​ជាង ២០ ដុំ​ដែល​ឆេះ​នោះ​ទំនង​ដឹក​ពី​តំបន់​ព្រៃ​ស្អាក ស្រុ​កអន្លង់វែង សំដៅ​មក​កាន់ ក្រុង​សៀមរាប។

លោក​បន្ត​ថា ម្ចាស់​ម៉ូតូ​អូស​រ៉ឺម៉ក​ឈ្មោះ កែវ វណ្ណៈ អាយុ ៤៣​ឆ្នាំ រស់​នៅ ភូមិ​ត្រពាំង​សេះ សង្កាត់​គោកចក ក្រុង​សៀមរាប បាន​រង​របួស​បាក់​ជើង។ ឯ​អ្នក​បើក​រថយន្ត​បាន​រត់​គេច​ខ្លួន​នៅ​ក្រោយ​ពេល​កើត​ហេតុ។

ជន​រងគ្រោះ​ត្រូវ​សមត្ថកិច្ច​ដឹក​មក​សង្គ្រោះ​នៅ​មន្ទីរពេទ្យ សៀមរាប ហើយ​រ៉ឺម៉ក​និង​ស្រូវ​ត្រូវ​បាន​នាំ​មក​ប៉ុស្តិ៍​នគរបាល ឃុំ​ខ្នារ​សណ្តាយ៕

ព័ត៌មានថ្មីៗ