អាជ្ញាធរ​ដោះលែង​អ្នក​នេសាទ​វៀតណាម​ដោយ​មិន​ពិន័យ


20140507_08
អ្នកនេសាទវៀតណាមចូលមកនេសាទក្នុងដែនទឹកកម្ពុជា ត្រូវបានឃាត់ខ្លួនកន្លងមក សហការី

កំពតៈ អ្នក​នេសាទ​ជាតិ វៀតណាម ១៣​នាក់ ជាមួយ​នឹង​ទូក​នេសាទ ៣ គ្រឿង ដែល​ប្រជា​សហគមន៍​នេសាទ​ព័ទ្ធ​ចាប់​បាន​ក្នុង​ដែន​ទឹក កម្ពុជា ក្នុង​ដែន​សមុទ្រ ខេត្ត​កំពត កាល​ពី​ថ្ងៃ ទី៤ ខែ​ឧសភា ត្រូវ​អាជ្ញាធរ​ខេត្ត​ប្រគល់​ឲ្យ​ទៅ​អាជ្ញាធរ ខេត្ត​គៀងយ៉ាង របស់ វៀតណាម វិញ ដោយ​គ្រាន់​តែ​ធ្វើ​ការ​អប់រំ​ណែនាំ ប៉ុន្តែ​គ្មាន​ការ​ពិន័យ​អ្វី​ឡើយ​កាល​ពី​ព្រឹក​ថ្ងៃ​អង្គារ។

លោក ខូយ ឃុនហួរ អភិបាល ខេត្ត​កំពត បាន​ឲ្យ​ដឹង​ថា អ្នក​នេសាទ​ជនជាតិ វៀតណាម ដែល​អ្នក​នេសាទ​ខ្មែរ​ចាប់​ឃាត់​ខ្លួន​ពី​ថ្ងៃ​អាទិត្យ​ត្រូវ​អាជ្ញាធរ​ខេត្ត​ប្រគល់​ឲ្យ​ខាង​ភាគី វៀតណាម វិញ​ដោយ​អនុវត្ត​តាម​កិច្ច​ព្រម​ព្រៀង​រវាង​ខេត្ត​ទាំង ២ ដោយ​មិន​មាន​ផាក​ពិន័យ​អី្វ​ឡើយ។

លោក​អភិបាល​ខេត្ត​បញ្ជាក់​ថា ករណី​នេះ​កន្លង​មក​ខាង​អាជ្ញាធរ ខេត្ត​គៀងយ៉ាង របស់ វៀតណាម ក៏​ធ្លាប់​ចាប់​និង​ដោះលែង​អ្នក​នេសាទ កម្ពុជា ដែរ ហើយ​មាន​រហូត​ដល់ ១៥ ទូក​ឯ​ណោះ គឺ​ខាង​អាជ្ញាធរ​ខេត្ត​យើង​បាន​ទៅ​សុំ​គេ​ទាំង​ទូក​ទាំង​មនុស្ស​មក​វិញ ដោយ​គ្មាន​បាត់​បង់​អ្វី​ឡើយ។ លោក​ប្រាប់​ថា៖ «កន្លង​មក​អ្នក​នេសាទ​ខ្មែរ​ធ្លាប់​ត្រូវ​ខាង វៀតណាម ចាប់​ទូក ១៥ គ្រឿង​តែ​ខាង​គេ​បាន​ប្រគល់​ឲ្យ​មក​វិញ​សូម្បី​តែ​ត្រី​មួយ​ក៏​មិន​បាត់​ផង។ តែ​បើ​ខាង កម្ពុជា យើង​ចាប់​ទូក​គេ​វិញ ឲ្យ​ទៅ​គេ​វិញ​នៅ​សល់​តែ​សម្បក​ទូក​និង​មនុស្ស​ទេ»។

លោក​បន្ត​ទៀត​ថា ក្នុង​ច្បាប់​ជលផល​ត្រូវ​ផាក​ពិន័យ​លើ​ជនល្មើស ប៉ុន្តែ ច្បាប់ វៀតណាម វិញ​គ្មាន​ផាក​ពិន័យ​ទេ ហើយ​រាល់​លើក​ដែល​គេ​ចាប់​និង​លែង​អ្នក​នេសាទ កម្ពុជា ខាង​វៀតណាម មិន​ដែល​ផាក​ពិន័យ​អ្វី​ទេ។

លោក​ថ្លែង​ថា៖ «យើង​ផាក​គេ​វា​មិន​អី​ទេ តែ​បើ​គេ​ផាក​យើង​វិញ ប្រយ័ត្ន​យំ​មិន​ចេញ។ កន្លង​មក​យើង​ចូល​គេ​ច្រើន​ជាង​គេ​ចូល​មក​យើង​ផង» ។ លោក​កត់​សម្គាល់​ថា ការ​ចាប់​អ្នក​នេសាទ វៀតណាម នេះ​អ្នក​ចាប់​ជួន​កាល​មិន​ដឹង​ថា ពួក​គេ​នៅ​ចំណុច​ណា​និង​គ្មាន​ផែនទី​ផង ហើយ​ចេះ​តែ​ថា វៀតណាម ចូល​មក​ក្នុង​ដែន​ទឹក កម្ពុជា ឯ​ខាង វៀតណាម វិញ​គេ​ក៏​ថា ទូក​នេសាទ កម្ពុជា ទៅ​ចាប់​ត្រី​ក្នុង​ដែន​ទឹក​គេ​ដែរ ដែល​នេះ​គឺជា​បញ្ហា។

តាម​អាជ្ញាធរ​ជលផល ខេត្ត​កំពត បាន​ឲ្យ​ដឹង​ថា អ្នក​នេសាទ វៀតណាម ១៣ នាក់​និង​ទូក​នេសាទ ៣ គ្រឿង​ត្រូវ​ប្រជា​នេសាទ​សហគមន៍​ត្រើយ​កោះ ព័ទ្ធ​ចាប់​នៅ​ម៉ោង​ប្រហែល ១១ យប់ ថ្ងៃ ទី​៤ ខែ​ឧសភា ខណៈ​ពួក​គាត់​ប្រទះ​ឃើញ​ចូល​មក​នៅ​ម្តុំ កោះ​ការ៉ាង និង​កោះ​ត្រងោល ក្នុង​ដែន​ទឹក កម្ពុជា។

តំណាង​សហគមន៍​នេសាទ ត្រើយ​កោះ មិន​អាច​ទាក់​ទង​សួរ​បញ្ជាក់​ពី​ការ​ដោះលែង​ទូក​នេសាទ វៀតណាម នេះ​បាន​ទេ កាល​ពី​ម្សិលមិញ៕

ព័ត៌មានថ្មីៗ