អ្នក​ភ្នាល់​កីឡា​ប្រដាល់​ជាង ៤០​នាក់ ត្រូវ​ឃាត់​ខ្លួន​នៅ បាត់ដំបង


បាត់ដំបងៈ អ្នក​ញៀន​ល្បែង​ភ្នាល់​កីឡា​ប្រដាល់​ប្រមាណ ៤០​នាក់ ត្រូវ​សមត្ថកិច្ច​នគរបាល ក្រុង​បាត់ដំបង ធ្វើ​ការ​ឃាត់​ខ្លួន​ខណៈ​ពួក​គេ​នាំ​គ្នា​ចាក់​លុយ​ភ្នាល់​គ្នា​ក្នុង​តៀម​កាហ្វេ​មួយ​យ៉ាង​គគ្រឹក​គគ្រេង​កាល​ពី​ថ្ងៃ​អាទិត្យ នៅ​ក្នុង ក្រុង-ខេត្ត​បាត់ដំបង។

លោក ម៉េង គឹមលាង អនុ​ប្រធាន​ការិយាល័យ​នគរបាល​ព្រហ្មទណ្ឌ​កម្រិត​ស្រាល ខេត្ត​បាត់ដំបង បាន​ឲ្យ​ដឹង​ថា ក្រុម​អ្នក​ញៀន​ល្បែង​ភ្នាល់​ល្បែង​កីឡា​ប្រដាល់​ដែល​សមត្ថកិច្ច​លោក ធ្វើ​ការ​ឃាត់​ខ្លួន​ពេល​នេះ​សមត្ថកិច្ច​កំពុង​ស៊ើប​សួរ​នៅ​ស្នងការដ្ឋាន​នគរបាល ខេត្ត​នៅ​ឡើយ​ដើម្បី​ធ្វើ​កំណត់​ហេតុ​បញ្ជូន​ទៅ​ព្រះ​រាជអាជ្ញា​អម​សាលា​ដំបូង​ថា​តើ​ត្រូវ​ផាក​ពិន័យ​ឬ​ត្រូវ​អប់រំ?

លោក គឹមលាង បញ្ជាក់​ប្រាប់​ថា៖ «អ្នក​ត្រូវ​ឃាត់​ខ្លួន​គ្រាន់​តែ​ធ្វើការ​ផាក​ពិន័យ​ទេ​តាម​ច្បាប់ ស្តីពី​ល្បែង​ស៊ី​សង ប៉ុន្តែ​បើ​អ្នក​ណា​មុខ​ដដែលៗ​មិន​ព្រម​រាង​ចាល​អាច​ត្រូវ​ផាក​ពិន័យ​ក្នុង​កម្រិត​ខ្ពស់​ហើយ​បើ​អ្នក​ថ្មី​ត្រូវ​អប់រំ ពិន័យ​ប្រាក់»។

លោក ម៉េង គឹមលាង បន្ត​ឲ្យ​ដឹង​ទៀត​ថា អ្នក​ញៀន​ល្បែង​ទាំង​នោះ​ត្រូវ​សមត្ថកិច្ច ក្រុង​បាត់ដំបង ឃាត់​ខ្លួន​កាល​ពី​ថ្ងៃ​ត្រង់​ថ្ងៃ​ម្សិលមិញ ខណៈ ពួក​គេ​កំពុង​ភ្នាល់​គ្នា​តាម​ការ​ផ្សាយ​ផ្ទាល់​កីឡា​ប្រដាល់​តាម​ទូរទស្សន៍ នៅ​ក្នុង​ហាង​កាហ្វេ​មួយ នៅ​ក្នុង ភូមិ​ជ្រៃកោង ក្រុង-ខេត្ត​បាត់ដំបង ដោយ​រឹប​អូស​បាន​ម៉ូតូ​ជាង ៤០ គ្រឿង៕

ព័ត៌មានថ្មីៗ