ឧទ្ធរណ៍​ជម្រះ​សំណុំ​រឿង​ថ្នាំ​ញៀន​ពាក់ព័ន្ធ​ខ្មែរ​អូស្ត្រាលី​និង​តៃកុង​ឡាន


20140409_09b
ជនជាប់ចោទខ្មែរអូស្ត្រាលី ត្រូវឆ្មាំគុកប្រើឡានទំនើបដឹកមកតុលាការ សារុំ

ភ្នំពេញៈ ជន​ជាប់​ចោទ​ជា​អាណិកជន ខ្មែរ អូស្រ្តាលី ម្នាក់ និង​អ្នក​បើក​ឡាន ត្រូវ​សាលា​ឧទ្ធរណ៍​បើក​សវនាការ​បណ្តឹង​ឧទ្ធរណ៍​កាល​ពី​ម្សិលមិញ លើ​សំណុំ​រឿង​ជួញ​ដូរ​គ្រឿង​ញៀន​ជិត​កន្លះ​គីឡូក្រាម។

លោក ឃុន លាងម៉េង ប្រធាន​ក្រុម​ប្រឹក្សា​ជំនុំ​ជម្រះ​ថ្លែង​ថា សំណុំ​រឿង​ជួញ​ដូរ​គ្រឿង​ញៀន​របស់​ជន​ជាប់​ចោទ ថៃ សិទ្ធ ខ្មែរ នៅ អូស្ត្រាលី និង​អ្នក​បើកបរ ឡុត សេរីបុត្រ ត្រូវ​ក្រុម​ប្រឹក្សា​ជំនុំ​ជម្រះ​ចាត់​របៀប​ម្តង​ហើយ ព្រោះ​តែ​មាន​មន្ទិល​លើ​ករណី​ខ្លះ​អំពី​ការ​រឹបអូស​របស់​របរ​ពី​ជន​ជាប់​ចោទ​ហើយ​តុលាការ​ត្រូវ​ការ​កោះ​ហៅ​នគរបាល ៣ រូប​នៅ​ក្រសួង មហាផ្ទៃ ឲ្យ​មក​បំភ្លឺ​បន្ថែម តែ​ពួក​គេ​អវត្តមាន។

លោក​ចៅក្រម​បញ្ជាក់​ថា៖ «តុលាការ​បាន​ផ្ទៀង​ដីកា​កោះ​អញ្ជើញ​មន្រ្តី​នគរបាល​ហើយ ពួក​គាត់​ដឹង​និង​ចារ​ទទួល​ផង តែ​គាត់​មិន​មក​ចូល​រួម»។

តាម​អង្គហេតុ នៅ​ល្ងាច​ថ្ងៃ ទី​១៧ ខែ​មករា ឆ្នាំ​២០១០ មាន​ករណី​ផ្ទុះ​អាវុធ​ខាង​ត្បូង ផ្សារ​ស៊ីឡិប ដែល​ភ្លាមៗ​នោះ​ឈ្មោះ ស៊ឹម ប៊ុនសាន ត្រូវ​នគរបាល​ប្រឆាំង​គ្រឿង​ញៀន​ចាប់​ឃុំ​ខ្លួន​នៅ​ក្រសួង មហាផ្ទៃ។

ស៊ឹម ប៊ុនសាន ជា​កម្មករ​សំណង់​ដែល​សាលា​ដំបូង​រាជធានី​ផ្តន្ទាទោស​ឃុំ​ខ្លួន ៣​ឆ្នាំ ត្រូវ​សាលា​ឧទ្ធរណ៍​ដោះលែង​វិញ​ដោយ​រក​មិន​ឃើញ​កំហុស​និយាយ​ក្នុង​សវនាការ​ថា៖ «គេ​ចាប់​ខ្ញុំ​ចោទ​ថា ក្នុង​ថង់​មាន​ថ្នាំ​ញៀន​ជិត​កន្លះ​គីឡូក្រាម​តែ​ខ្ញុំ​កាន់​មក​មាន​ឯកសារ​តែ ៣ សន្លឹក​គត់។ បើ​ដូច​ប៉ូលិស​ចោទ​ថង់​នោះ​មិន​ស្រាល​ទេ។ ប៉ូលិស​បង្ខំ​ឲ្យ​ខ្ញុំ​ផ្តិត​មេដៃ​លើ​ក្រដាស​ស​គ្មាន​អក្សរ ហើយ​បើ​ខ្ញុំ​មិន​ផ្តិត​គេ​វាយ​ខ្ញុំ»។

ឯ​ជន​ជាប់​ចោទ ថៃ សិទ្ធ ជា ខ្មែរ នៅ អូស្រ្តាលី ប្រាប់​តុលាការ​ថា ថ្ងៃ​នោះ​គាត់​ជិះ​ឡាន​ម៉ាក​កាមរី​ពណ៌​ទឹក​មាស​មាន ឡុត សេរីបុត្រ ជា​អ្នក​បើក​មក​រក​ទិញ​នំ​ធ្វើ​ខួប​កំណើត​កូន​តែ​ចៃដន្យ​គាត់​ឃើញ​គេ​ឈ្លោះ​គ្នា​និង​មាន​ផ្ទុះ​អាវុធ​ស្មាន​ថា ជា​ករណី​ប្លន់​ចុះ​ទៅ​មើល​ក៏​ត្រូវ​ចាប់​ខ្លួន​តែ​ម្តង។

ក្នុង​សវនាការ ថៃ សិទ្ធ ថា ប៉ូលិស​ដក​យក​របស់​មាន​តម្លៃ​រាប់​ម៉ឺន​ដុល្លារ​ពី​គាត់​និង​បង្ខំ​ឲ្យ​ផ្តិត​មេ​ដៃ​លើ​ក្រដាស​ពេល​ឃុំ។

លោក មួង សុគន្ធ មេធាវី ថៃ សិទ្ធ ថា តុលាការ​ថ្នាក់​ក្រោម​ជឿ​លើ​របាយ​ការណ៍​ប៉ូលិស​កុហក​និង​កាឡៃ ហើយ​ថា ប៉ូលិស​មិន​បាន​បង្ហាញ​វត្ថុតាង​ថ្នាំ​ញៀន​ពេល​ចាប់​ជន​ត្រូវ​ចោទ​ទេ។

សាល​ដីកា​សំណុំ​រឿង​នេះ​ប្រធាន​ចៅក្រម​ជំនុំ​ជម្រះ​ថ្លែង​ថា នឹង​ប្រកាស​នៅ​ថ្ងៃ ទី​២៣ ខែ​មេសា ខាង​មុខ​នេះ៕

ព័ត៌មានថ្មីៗ