ក្រុងញូវយ៉ក: ការសិក្សាថ្មីមួយបានរកឃើញថារស់នៅក្នុងទីក្រុងពោរពេញដោយបរិស្ថានខ្យល់កខ្វក់ ធ្វើឲ្យកុមារឈានទៅចាប់ទម្លាប់ញ៉ាំអាហារខ្លាញ់ពេលពេញវ័យ។
ក្រុមអ្នកស្រាវជ្រាវបាននិយាយថា កម្រិតខ្យល់ធូលីច្រើនក្នុងបរិយាកាសដែលចេញពីរោងចក្រ និងយានយន្តមានទំនាក់ទំនងនឹងការបង្កើនអត្រាការទទួលទានអាហារខ្លាញ់ចម្រាញ់ខ្ពស់រហូតដល់ទៅ ៣៤ ភាគរយ។
មិនច្បាស់ថា តើវាបណ្ដាលមកពីមូលហេតុអ្វីឡើយ ទោះបីជាក្រុមអ្នកជំនាញបាននិយាយថាវាអាចមកពីការរំខាននៃបរិស្ថានកខ្វក់ទៅលើរាងកាយដែលស្រូបថាមពលពីចំណីអាហារធ្វើឲ្យកម្រិតជាតិស្ករធ្លាក់ចុះ និងបង្កើនចំណង់ឃ្លានអាហារ។
ក្រុមការងារមកពីសាកលវិទ្យាល័យកាលីហ្វ័រនីញ៉ាខាងត្បូងបានឲ្យដឹងថា ភ័ស្ដុតាងរបស់ពួកគេបានបង្ហាញថា ការបន្ទាបកម្រិតខ្យល់កខ្វក់អាចជាវិធីទប់ស្កាត់បញ្ហាធាត់លើសទម្ងន់របស់ពលរដ្ឋសហរដ្ឋអាមេរិក។
ចំពោះការសិក្សាដែលចុះផ្សាយក្នុងព្រឹត្ដិបត្រអាមេរិកសម្រាប់ជីវជាតិអាហារសុខភាព ក្រុមការងារបានតាមដានកុមារ ៣១០០ នាក់ និងរកឃើញថាកុមារប៉ះពាល់នឹងខ្យល់កខ្វក់កាន់តែខ្លាំង ជាពិសេសពីចរាចរណ៍តាមដងផ្លូវ ពួកគេមានចំណង់ឃ្លានអាហារខ្លាញ់កាន់តែខ្លាំង។
កម្រិតខ្យល់សុវត្ថិភាព នីត្រូឌីអុកស៊ីដ ត្រូវបានកំណត់ដោយទីភ្នាក់ងារការពារបរិស្ថានត្រឹមបរិមាណ ១០០ លើ ១ ពាន់លានក្នុង ១ ម៉ោង។
វេជ្ជបណ្ឌិត ហ្សាងហ៊ួ ឈិន អ្នកដឹកនាំការសិក្សាបាននិយាយថា៖ «ដោយការវិវត្ដខួរក្បាលពីកុមារទៅពេញវ័យ វាជាគម្លាតពេលវេលាដែលកត្ដាបរិស្ថានអាចមានឥទ្ធិពលយូរអង្វែងលើខួរក្បាល និងអត្ដចរិត»៕ HR