ការប្រើប្រាស់រូបសាក់ ដើម្បីបិទបាំងលើសម្លាក ស្នាមវះកាត់ និងលើកកម្ពស់ស្ត្រីមានវិបត្តិផ្លូវចិត្ត។ AFP
ក្រុងហាណូយ៖ ក្នុងអាផាតមិនដ៏តូចមួយ អ្នកចាក់សាក់ អ្នកស្រី ង៉ុក បានចាក់សាក់ឱ្យស្ដ្រីស្ថិតក្នុងវ័យកណ្ដាល ដែលជីវិតរបស់ពួកគេបានជួបទុក្ខធំ ដោយសារបញ្ហានៃការលែងលះ និងជំងឺរួតរឹត ដោយនាំគ្នាស្វែងរកការព្យាបាលផ្លូវចិត្ដតាមរយៈទម្រង់សិល្បៈដែលនៅតែជាស្លាកស្នាមអាចទទួលការមាក់ងាយក្នុងសង្គមវៀតណាម។
.jpg)
ថ្វីដ្បិតែសង្គមមានការផ្លាស់ប្ដូរយ៉ាងណាក៏ដោយ ក៏សិល្បៈនៃការចាក់សាក់លើរាងកាយនៅតែត្រូវបានចាត់ទុកថាជាឥរិយាបថរបស់ក្រុមអន្ធពាល ពេស្យាចារ និងឧក្រិដ្ឋជននៅក្នុងប្រទេសកុម្មុយនីស្ដដ៏អភិរក្សនិយមមួយនេះ។
អ្នកស្រី ង៉ុក ដែលមានឈ្មោះថា «ង៉ុក ឡៃ» បានប្រាប់ AFP ថា៖ «ខ្ញុំបានជួបស្ដ្រីជាច្រើនដែលបានប្រាប់ខ្ញុំថា ពួកគេចូលចិត្ដសាក់ តែពួកគេកើតមកក្នុងវេលាដែលគ្មាននរណាគាំទ្រខ្លួនឡើយ»។
ប៉ុន្ដែអ្នកខ្លះបន្ដជម្នះនឹងរនាំងប្រពៃណី ដោយចាត់ទុកស្នាមសាក់លើរាងកាយជាការងើបផុតពីសង្គមដ៏តឹងរ៉ឹង ដែលពួកគេធ្លាប់រស់នៅ។ ការចាក់សាក់ជាសម្រស់បែបថ្មីសម្រាប់ជីវិតស្ដ្រីទាំងនេះ។
រូបភាពថតនៅថ្ងៃទី ២០ ខែមីនា ឆ្នាំ ២០២១ បង្ហាញសកម្មភាពសាក់របស់អ្នកស្រី ង៉ុក លើរាងកាយស្ត្រីជាអតិថិជន នៅទីក្រុងហាណូយ។ AFP
អ្នកស្រី ង៉ុក អាយុ ២៨ ឆ្នាំបាននិយាយថា៖ «ពួកគេជម្នះការភ័យខ្លាចចំពោះការវាយតម្លៃពីសង្គម និងចាប់យកក្ដីស្រមៃសម្រាប់ពួកគេក្នុងបំណងបើកទំព័រសករាជថ្មីនៃជីវិត»។
ជាអ្នកទទួលបាននូវការអប់រំ និងចំណេះដឹងផ្នែកជំនួញ អ្នកស្រី ង៉ុក ធ្លាប់ត្រូវបានគេសើចចំអកពេលចាប់ផ្ដើមធ្វើជាអ្នកចាក់សាក់កាលពីប៉ុន្មានឆ្នាំមុន។
អ្នកស្រី បាននិយាយថា៖ «ជាអ្នកចាក់សាក់ ខ្ញុំត្រូវទទួលយកការពិតថា មនុស្សម្នាមិនចូលចិត្ដជំនាញនេះ មិនចូលចិត្ដការសិក្សារបស់ខ្ញុំ និងមិនចូលចិត្ដខ្ញុំតែម្ដង»។
ពលរដ្ឋវៀតណាមតែ ៤ ភាគរយប៉ុណ្ណោះដែលមានស្នាមសាក់លើរាងកាយ។ នេះបើយោងតាមការស្ទង់មតិតូចមួយក្នុងឆ្នាំ ២០១៥ ដោយក្រុមហ៊ុនស្រាវជ្រាវទីផ្សារវៀតណាម Q&Me ហើយនេះក៏ជាទិន្នន័យថ្មី និងចុងក្រោយបំផុតផងដែរ។
អ្នកស្រី ង៉ុក កំពុងផ្ចិតផ្ចង់សាក់រូបដល់អតិថិជននៅក្រុងហាណូយ។ AFP
ការស្រាវជ្រាវនេះក៏បានបង្ហាញថា ប្រជាជន ២៥ ភាគរយមានអារម្មណ៍ភ័យខ្លាច ពេលឃើញស្នាមសាក់។
ប៉ុន្ដែសម្រាប់អ្នកស្រី ត្រាន់ ហាង្វៀង ជាគ្រូវិទ្យាល័យម្នាក់ ការចាក់សាក់គឺជាការអបអរក្រោយការលែងលះពីស្វាមីដ៏ចាស់គំរឹល។
អ្នកស្រីបានរំឭកថា៖ «អតីតស្វាមីខ្ញុំតែងតែជំទាស់នឹងការចាក់សាក់របស់ខ្ញុំ។ ប៉ុន្ដែខ្ញុំមិនខ្លាចបាត់បង់ការងារនោះទេ បើខ្ញុំមានស្នាមសាក់លើខ្លួននោះ»។
ក្រោយពីលែងលះ ស្ដ្រីវ័យ ៤១ ឆ្នាំរូបនេះបានប្រាប់ AFP ថា អ្នកស្រីចង់ដាច់ស្រឡះពីជីវិតអតីតកាល និងធ្វើអ្វីៗដែលខ្លួនមិនហ៊ានធ្វើពីមុនមក។
អតិថិជនជានារីវៀតណាម ដែលមានចំណូលមធ្យម ៥០០ ដុល្លារក្នុង ១ ខែ តែហ៊ានចំណាយខ្ពស់លើសេវាកម្មសាក់។ AFP
អ្នកស្រីបានជ្រើសរើសស្នាមសាក់ផ្កាឈូកនៅលើភ្លៅ ដែលល្មមគ្មាននរណាអាចមើលឃើញ លុះត្រាតែអ្នកស្រីជម្រុះខោអាវអស់ បន្សល់នៅតែឈុតខោអាវក្នុង។
អ្នកស្រី ង្វៀង បានឱ្យដឹងថា៖ «វាគ្រាន់តែជាស្នាមសាក់តូចមួយប៉ុណ្ណោះ តែខ្ញុំមានអារម្មណ៍ថា ខ្ញុំបានរកឃើញជីវិតខ្លួនឯងដ៏ពិតប្រាកដ»។
អ្នកស្រី ង៉ុក បានសម្រេចចិត្ដផ្ដោតលើការងារចាក់សាក់ចំពោះស្ដ្រីដែលមានស្នាមសម្លាកទាំងផ្លូវកាយ និងផ្លូវចិត្ដ។ ការចាក់សាក់កំពុងមានតម្រូវការខ្ពស់ ហើយអ្នកស្រីមានកាលវិភាគណាត់ជួបពេញ។
អតិថិជនរបស់អ្នកស្រីក្នុងក្រុងហាណូយ ជាទីដែលពលរដ្ឋមានប្រាក់ចំណូលមធ្យម ៥០០ ដុល្លារក្នុង ១ ខែ តែងតែមានបំណងចំណាយប្រាក់ទ្វេដងលើការចាក់សាក់រាងកាយ ដើម្បីបិទបាំងស្នាមសម្លាក ស្លាមវះកាត់ និងដានវិបត្តិផ្លូវចិត្តនានា៕ HR
សកម្មភាពសាក់ និងលាបថ្នាំ ត្រូវបានធ្វើលើលើអតិថិជនជានារីវៀតណាម ដែលស្វែងរកសេវាកម្មសាក់រូប ដើម្បីបំបាត់ស្លាមស្នាម សម្លាក ឬវិបត្តិផ្លូវចិត្ត។ AFP
ស្ត្រីវៀតណាមមួយចំនួន ប្រើប្រាស់ស្នាមសាក់ ដើម្បីលើកទឹកចិត្តខ្លួនឯង ពីទុក្ខសោក ឬវិបត្តិ។ AFP
