ក្រុងឡុងដ៍: ក្រុមអ្នកស្រាវជ្រាវបាននិយាយថាស្រោមដៃផ្ទុកបាក់តេរីរហូតដល់ ៥ ដងច្រើនជាងបរិមាណអតិសុខុមប្រាណលើចានបង្គន់ទៅទៀត។
ជ័រស្វិតផលិតពីក្រណាត់ក្រែបស្ងួតឯងដែលធ្វើឲ្យបែកញើសដៃត្រូវបានរកឃើញជាសម្ភារផ្ទុកបាក់តេរីច្រើនបំផុត បន្ទាប់ពីរោមសត្វ ស្បែកសត្វ និងស្រោមដៃឡែន។
គំរូស្រោមដៃសម្រាប់ដុសលាងអនាម័យត្រូវបានប្រមូលបានទាំងក្នុង និងក្រៅស្រោមដើម្បីវាស់ស្ទង់បរិមាណវត្ដមានអតិសុខុមប្រាណ។
វិធីនេះបានបង្ហាញថាចានបង្គន់ជាមធ្យមមានបាក់តេរីប្រមាណ ២២០ តែស្រោមដៃពាក់សម្អាតផ្ទះ និងសម្ភារប្រើប្រាស់បានផ្ទុកកម្រិតបាក់តេរីជាង ១ ០០០ ក្បាល។
ការស្ទង់មតិធ្វើឡើងដោយក្រុមហ៊ុនផលិតផលសម្អាត Initial Washroom Hygiene លើមនុស្ស ១៥០០ នាក់ដែលពាក់ស្រោមដៃបានរកឃើញ ១ ក្នុងចំណោម ៧ នាក់អត់បានលាងសម្អាត និងជិត ២ ភាគ ៣ ដែលបានសម្អាត ១ ខែម្ដង ឬតិចជាងនេះ។
មិនច្បាស់ថា បើបាក់តេរីរកឃើញតោងលើស្រោមដៃអាចបង្កគ្រោះថ្នាក់ ឬយ៉ាងណាតែក្រុមអ្នកជំនាញបាននិយាយថា ដៃមនុស្សគឺជាវត្ថុដំបូងដែលប៉ះពាល់បាក់តេរី និងមេរោគឆ្លង។
វេជ្ជបណ្ឌិត សាលី ប្លូមហ្វៀល (Sally Bloomfield) ជាអតិសុខុមជីវវិទូ និងជាសាស្ដ្រាចារ្យកិត្ដិយសនៅសាលាអនាម័យ និងវេជ្ជសាស្ដ្រត្រូពិកក្រុងឡុងដ៍ បាននិយាយថាស្រោមដៃកខ្វក់មិនទំនងជាអាចបង្កផលប៉ះពាល់ដល់សុខភាពធ្ងន់ធ្ងរឡើយ តែមិនខុសពីដៃទទេនោះទេ ស្រោមដៃអាចជាភ្នាក់ងារចម្លងមេរោគបាន៕ HR