ក្រុមហ៊ុន Unilever លក់​អាជីវកម្ម​ផលិត​ទឹក​ជ្រលក់


ក្រុងឡាអេៈ នៅ​ថ្ងៃ​ព្រហស្បតិ៍​ក្រុមហ៊ុន Unilever របស់ ប្រទេស​ហូឡង់ បាន​ប្រកាស​ពី​ការ​លក់​អាជីវកម្ម​ផលិត​ទឹក​ជ្រលក់​ម៉ាក Ragu និង Bertolli នៅ​អាមេរិក​ខាង​ជើង ទៅ​ឲ្យ​ក្រុមហ៊ុន ជប៉ុន ក្នុង​តម្លៃ ២,១៥ ពាន់​លាន​ដុល្លារ​ខណៈ​ក្រុមហ៊ុន​នេះ​ផ្តោត​លើ​ផលិតផល​ថែរក្សា​សម្ផស្ស​ដែល​មាន​ប្រាក់​ចំណេញ​ខ្ពស់។

ក្រុមហ៊ុន Unilever បាន​ឲ្យ​ដឹង​ក្នុង​សេចក្តី​ថ្លែង​ការណ៍​មួយ​ថា ក្រុមហ៊ុន Mizkan Group របស់ ជប៉ុន បាន​ទិញ​យក​អាជីវកម្ម​ផលិត​ទឹក​ជ្រលក់​ទាំង​ពីរ​នេះ រួម​ទាំង​រោងចក្រ​ផលិតកម្ម​ចំនួន​ពីរ​កន្លែង​នៅ​រដ្ឋ Kentucky និង California។

លោក Kees Kruythoff ប្រធាន​ក្រុមហ៊ុន Unilever នៅ​អាមេរិក​ខាង​ជើង​បាន​ថ្លែង​ថា៖ «ការ​លក់​នេះ​តំណាង​ឲ្យ​ជំហាន​មួយ​ក្នុង​ចំណោម​ជំហាន​ចុង​ក្រោយ​នៃ​ការ​កែប្រែ​កញ្ចប់​វិនិយោគ​របស់​យើង​នៅ​អាមេរិក​ខាង​ជើង ដើម្បី​ផ្តល់​ប្រាក់​ចំណេញ​ប្រកប​ដោយ​និរន្តរភាព​ឲ្យ​ក្រុមហ៊ុន Unilever»។

ក្រុម​អ្នក​វិភាគ​បាន​បន្ត​ឲ្យ​ដឹង​ថា ការ​លក់​អាជីវកម្ម​ផលិត​ទឹក​ជ្រលក់​នេះ​គឺ​ជា​ផ្នែក​មួយ​នៃ​យុទ្ធសាស្ត្រ​សកល​របស់​ក្រុមហ៊ុន Unilever ដើម្បី​យក​ចិត្ត​ទុក​ដាក់​កាន់​តែ​ខ្លាំង​លើ​ផលិតផល​គ្រឿង​សម្អាង​កាយ ដែល​ផ្តល់​អនុបាត​ប្រាក់​ចំណេញ​កាន់​តែ​ខ្ពស់​ជាង​ម្ហូប​អាហារ ដែល​ក្រុមហ៊ុន​របស់​ខ្លួន​មាន​ការ​លំបាក​ក្នុង​ការ​ទទួល​បាន​ប្រាក់​ចំណេញ​នៅ​ទីផ្សារ ឥណ្ឌា និង ប្រទេស​ចិន។

ការ​លក់​ចំណី​អាហារ​របស់ Unilever បាន​កើន​ឡើង​តែ ០,៣ ភាគរយ​ប៉ុណ្ណោះ​នៅ ឆ្នាំ​២០១៣៕ BP

ព័ត៌មានថ្មីៗ