Microsoft នឹង​ប្រឹង​ប្រែង​ស្នើ​ឲ្យ​ចិន​ដក​ការ​ហាម​ឃាត់


ក្រុង​ញូវយ៉កៈ កាល​ពី​ដើម​សប្តាហ៍​នេះ ក្រុមហ៊ុន Microsoft បាន​ឲ្យ​ដឹង​ថា ខ្លួន​នឹង​បន្ត​ខិត​ខំ​ប្រឹង​ប្រែង​ស្នើ​សុំ​ការ​អនុម័ត​ប្រើ​ប្រាស់​ប្រព័ន្ធ​ប្រតិបត្តិការ Windows 8 របស់​ខ្លួន​នៅ ចិន បន្ទាប់​ពី​រដ្ឋាភិបាល ក្រុង​ប៉េកាំង បាន​ប្រកាស​ពី​ការ​ហាម​ឃាត់។

ដោយ​សំដៅ​លើ​លិខិត​ជូន​ដំណឹង​របស់​មន្ត្រី​រដ្ឋាភិបាល​ចិន ក្រុមហ៊ុន​នេះ​បាន​ឲ្យ​ដឹង​ក្នុង​សេចក្តី​ថ្លែង​ការណ៍​មួយ​ថា៖ «យើង​ភ្ញាក់​ផ្អើល​យ៉ាង​ខ្លាំង​នៅ​ពេល​ទទួល​បាន​ដំណឹង​អំពី​រឿង​រ៉ាវ​ទាក់ទង​នឹង​កម្មវិធី Windows 8 ក្នុង​សេចក្តី​ជូន​ដំណឹង​នេះ»។

សេចក្តី​ថ្លែង​ការណ៍​ដដែល​បាន​ឲ្យ​ដឹង​ទៀត​ថា៖ «ក្រុមហ៊ុន Microsoft ក៏​បាន​និង​កំពុង​សហការ​ជាមួយ​មជ្ឈមណ្ឌល​លទ្ធកម្ម​រដ្ឋាភិបាល​មជ្ឈិម និង​ទីភ្នាក់ងារ​រដ្ឋាភិបាល​ផ្សេង​ទៀត​ដើម្បី​ឲ្យ​មាន​ការ​ផ្លាស់​ប្តូរ​តាម​រយៈ​ដំណើរការ​វាយតម្លៃ​ដើម្បី​ធានា​ថា ផលិតផល និង​សេវាកម្ម​របស់​យើង​នឹង​អាច​ឆ្លើយ​តប​តាម​លក្ខខណ្ឌ​លទ្ធកម្ម​ទាំង​អស់​របស់​រដ្ឋាភិបាល​ចិន»។

សេចក្តី​ថ្លែង​ការណ៍​បាន​បន្ត​ឲ្យ​ដឹង​ថា៖ «យើង​បាន​ផ្តល់ ហើយ​នឹង​បន្ត​ផ្តល់​កម្មវិធី Windows 7 ដល់​អតិថិជន​ដែល​ជា​មន្ត្រី​រដ្ឋាភិបាល។ ទន្ទឹម​នឹង​នោះ​ដែរ យើង​កំពុង​សិក្សា​លើ​ការ​វាយ​តម្លៃ​កម្មវិធី Windows 8 ជាមួយ​ទីភ្នាក់ងារ​រដ្ឋាភិបាល​ពាក់​ព័ន្ធ​ផង​ដែរ»។

ព័ត៌មាន​ស្តីពី​ការ​ហាម​ឃាត់​របស់​រដ្ឋាភិបាល​ចិន​នេះ​បាន​កើត​ឡើង​នៅ​ពេល​មាន​ជម្លោះ​ការទូត​ជុំវិញ​ការ​ចោទ​ប្រកាន់​មួយ​នៅ​អាមេរិក​លើ​សមាជិក ៥ រូប​នៃ​អង្គភាព​យោធា​ចិន​ពី​បទ​ចូល​លួច​ព័ត៌មាន​សម្ងាត់​ពាណិជ្ជកម្ម​របស់​ក្រុមហ៊ុន​អាមេរិក៕ BP

ព័ត៌មានថ្មីៗ