ត្បូង និងគ្រឿងអលង្ការដែលអាជីវករចូលរួមដាក់បង្ហាញក្នុងពិព័រណ៍គ្រឿងអលង្ការនៅភ្នំពេញកន្លងមក។ ហេង ជីវ័ន
ភ្នំពេញ: ប្រទេស កម្ពុជា បាននាំចូលត្បូងមានតម្លៃជាង ៩៦ លានដុល្លារ ក្នុងរយៈពេល ៦ ខែ ឆ្នាំ ២០១៩។ នេះបើយោងតាមទិន្នន័យពីក្រសួងពាណិជ្ជកម្ម។
.jpg)
លោក ស៊ាង ថៃ អ្នកនាំពាក្យក្រសួងពាណិជ្ជកម្មបានប្រាប់ភ្នំពេញប៉ុស្តិ៍កាលពីថ្ងៃចន្ទថា កម្ពុជាបាននាំចូលត្បូងថ្មមានតម្លៃ $៩៦,២៤ លានដុល្លារ ក្នុងរយៈពេល ៦ ខែ ឆ្នាំ ២០១៩ នេះ ប៉ុន្តែលោកមិនបានបញ្ជាក់ពីប្រទេសដែលកម្ពុជានាំចូលភាគច្រើននោះ។
ប្រទេស កម្ពុជា ភាគច្រើននាំចូលត្បូង និងគ្រឿងអលង្ការពីហុងកុង និងថៃ។ នេះបើយោងតាមសេចក្តីរាយការណ៍កាលពីលើកមុន។
យោងតាមសេចក្តីរាយការណ៍របស់កាសែត The Nation របស់ថៃ ប្រទេស ថៃ បាននាំចេញត្បូង និងគ្រឿងអលង្ការភាគច្រើនមកប្រទេស កម្ពុជា។ របាយការណ៍បង្ហាញថា ការនាំចេញរបស់ថៃមកកម្ពុជាបានកើនឡើង ១៣៧ ភាគរយ ក្នុងចំណោមការនាំចេញត្បូង និងគ្រឿងអលង្ការសរុបជាង ១១,៤៥២ ពាន់លានដុល្លារអាមេរិក ក្នុងរយៈពេល ៨ ខែដំបូងឆ្នាំនេះ។
តាមលោក ស៊ាង ថៃ ក្រសួងពាណិជ្ជកម្មពុំមានទិន្នន័យនៃការនាំចូលគ្រឿងអលង្ការផ្សេងក្រៅពីត្បូងនោះទេដោយលោកអះអាង ទិន្នន័យទាំងនោះអាចរកបាននៅ អគ្គនាយកដ្ឋានគយ និងរដ្ឋាករកម្ពុជា។
លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករកម្ពុជាមិនអាចសុំធ្វើអត្ថាធិប្បាយបន្ថែមជុំវិញការនាំចូលត្បូង និងគ្រឿងអលង្ការរបស់ប្រទេសកម្ពុជាបានទេកាលពីថ្ងៃអង្គារម្សិលមិញ។
ម្ចាស់ហាងគ្រឿងអលង្ការម្នាក់នៅផ្សារធំថ្មីសុំមិនបញ្ចេញឈ្មោះបានឲ្យដឹងថា ការនាំចូលគ្រឿងអលង្ការរបស់កម្ពុជាភាគច្រើនពីថៃ ហុងកុង និង បែលហ្ស៊ិក ជាដើម។ លោកបន្តថា៖ «នៅយើងពឹងផ្អែកទាំងស្រុងលើការនាំចូលពីទីផ្សារអន្តរជាតិដែលជាហេតុធ្វើឲ្យតម្លៃវាមានការប្រែប្រួល [តាមហាងឆេង] អន្តរជាតិ»។
អាជីវករ ទិញ លក់ គ្រឿងអលង្ការនៅផ្សារចាស់ដែលសុំមិនបញ្ចេញឈ្មោះ បានឲ្យដឹងថា ទីផ្សារគ្រឿងអលង្ការមានតម្រូវការល្អដែលមាសសុទ្ធលក់ចេញ ១ ជីមានតម្លៃ ១៨២ ដុល្លារ និងប្លាទីន ១២៧ ដុល្លារ។ អាជីវកររូបនេះថ្លែងថា៖ «តូបខ្ញុំលក់ដាច់គួរសមឲ្យម៉ូយដែលកុម្ម៉ង់ធ្វើច្រើនក្នុងខែនេះ»។
ទោះបីយ៉ាងនេះក្តីសម្រាប់អាជីវកររូបនេះគាត់មិនសូវដឹងពីការនាំចេញនាំចូលគ្រឿងអលង្ការនោះទេ។
លោកស្រីបានបន្តទៀតថា៖ «ខ្ញុំទិញពីម៉ូយបោះដុំនៅភ្នំពេញ ត្រង់ថា ម៉ូយយកមកពីណាខ្ញុំក៏អត់បានដឹងទេ»។
កម្ពុជាបច្ចុប្បន្នកំពុងមានក្រុមហ៊ុនរុករករ៉ែមាសធំៗ ២ ដែលកំពុងដំណើរការរុករកនៅភាគឦសានប្រទេសកម្ពុជា។
ក្រុមហ៊ុនរ៉ែមាសមានមូលដ្ឋាននៅប្រទេសឥណ្ឌា Mesco Gold ដែលទទួលបានសិទិ្ធធ្វើអាជីវកម្មរ៉ែមាសនៅកម្ពុជារំពឹងថានឹងអាចធ្វើការចម្រាញ់រ៉ែមាសនៅកម្ពុជាជាលើកដំបូងនៅចុងឆ្នាំនេះដោយក្រុមហ៊ុនបានដំឡើងផលិតកម្មចម្រាញ់រ៉ែមាសនៅគម្រោងរ៉ែមាសភូមិស៊ីយ៉ារុង ក្នុងខេត្តរតនគិរី។
ដោយឡែកក្រុមហ៊ុន Emerald Resources ដែលជាក្រុមហ៊ុនចុះបញ្ជីនៅប្រទេសអូស្ដ្រាលីនៅពីក្រោយគម្រោងរ៉ែមាសអូរខ្វាវរបស់ប្រទេសកម្ពុជា នៅក្នុងខេត្តមណ្ឌលគិរីត្រូវបានរំពឹងថានឹងចាប់ផ្ដើមគម្រោងរ៉ែមាសទ្រង់ទ្រាយធំលើកដំបូងរបស់ខ្លួននៅកម្ពុជានៅដើមឆ្នាំ ២០២០៕LA
វីដេអូ៖
