ទិដ្ឋភាពកំពង់ផែក្រុងព្រះសីហនុ។ ការនាំចេញទំនិញពីកម្ពុជាទៅកាន់អាមេរិកក្នុងរយៈពេល ២ ខែ ដើមឆ្នាំ ២០២០ នេះមានតម្លៃជាង ១ ០៨៣ លានដុល្លារកើនឡើងជិត ៤៧ ភាគរយបើធៀបនឹងរយៈពេលដូចគ្នាកាលពីឆ្នាំ ២០១៩។ ហេង ជីវ័ន
ភ្នំពេញៈ ការនាំចេញទំនិញពីកម្ពុជាទៅកាន់អាមេរិកក្នុងរយៈពេល ២ ខែ ដើមឆ្នាំ ២០២០ នេះមានតម្លៃជាង ១ ០៨៣ លានដុល្លារកើនឡើងជិត ៤៧ ភាគរយបើធៀបនឹងរយៈពេលដូចគ្នាកាលពីឆ្នាំ ២០១៩ ខណៈដែលទំហំពាណិជ្ជកម្មទ្វេភាគីកើនជិត ៤០ ភាគរយ។ នេះបើយោងតាមទិន្នន័យពីការិយាល័យស្ថិតិអាមេរិក។
.jpg)
របាយការណ៍បង្ហាញថា ចាប់ពីដើមខែមករារហូតដល់ចុងខែកុម្ភៈ កម្ពុជាបាននាំទំនិញទៅកាន់អាមេរិកមានតម្លៃសរុបជាង ១០៨៣ លានដុល្លារកើនឡើង ៤៦,៩៦ ភាគរយបើធៀបនឹងរយៈពេលដូចគ្នាកាលពីឆ្នាំ ២០១៩ ដែលមានតម្លៃត្រឹម ៧៣៧,១ លានដុល្លារ។ ក្នុងនោះការនាំចេញទំនិញពីកម្ពុជាទៅអាមេរិកក្នុងខែមករាមានកំណើន ៣៨,៥ ភាគរយ និងការនាំចេញក្នុងខែកុម្ភៈមានកំណើន ៥៧,១ ភាគរយ។
ទិន្នន័យបានឲ្យដឹងទៀតថា ជាមួយនឹងកំណើនដ៏ខ្ពស់នៃការនាំចេញទំនិញពីកម្ពុជានេះបានធ្វើឲ្យទំហំពាណិជ្ជកម្មទ្វេភាគីរវាងប្រទេសទាំង ២ ក្នុងរយៈពេលនេះមានតម្លៃសរុប ១,១៣៦ ពាន់លានដុល្លារកើនឡើង ៣៩,៩៦ ភាគរយពីចំនួន ៨១២ លានដុល្លារកាលពីឆ្នាំ ២០១៩។
ទោះបីយ៉ាងណារបាយការណ៍នេះបង្ហាញថា ការនាំទំនិញពីអាមេរិកមកកម្ពុជាមិនបានបង្ហាញពីសញ្ញាវិជ្ជមានទេ ដោយមានតម្លៃសរុបត្រឹមតែ ៥៣,២ លានដុល្លារធ្លាក់ចុះ ២៨,៩៧ ភាគរយពីចំនួន ៧៤,៩ លានដុល្លារកាលពីរយៈពេល ២ ខែ ដើមឆ្នាំ ២០១៩។
លោក ហុង វណ្ណៈ អ្នកស្រាវជ្រាវសេដ្ឋកិច្ចនៃរាជបណ្ឌិត្យសភាកម្ពុជាបានប្រាប់ភ្នំពេញប៉ុស្តិ៍កាលពីថ្ងៃអង្គារថា កំណើនទំហំពាណិជ្ជកម្មទ្វេភាគី ជាពិសេសការនាំចេញទំនិញដ៏ច្រើនពីកម្ពុជាទៅកាន់អាមេរិកក្នុងរយៈពេល ២ ខែដំបូងនេះ គឺជាសញ្ញាបង្ហាញថា អាមេរិកគឺនៅតែជាទីផ្សារមានសក្តានុពលសម្រាប់ទំនិញកម្ពុជា។ កម្ពុជា និងអាមេរិកមិនត្រឹមតែមានទំនាក់ទំនងពាណិជ្ជកម្មល្អជាមួយគ្នាប៉ុណ្ណោះទេ ប៉ុន្តែទំនាក់ទំនងការទូតក៏ល្អប្រសើរដែរ។ លោកបន្តថា បើទោះបីពេលនេះអាមេរិកកំពុងមានបញ្ហានៃការឆ្លងរីករាលដាលនៃជំងឺកូវីដ១៩ ខ្លាំងដែលអាចធ្វើឲ្យតម្រូវការវត្ថុប្រើប្រាស់មួយចំនួនធ្លាក់ចុះ ប៉ុន្តែលោកនៅតែយល់ថា វានឹងមិនប៉ះពាល់ខ្លាំងចំពោះការធ្វើពាណិជ្ជកម្មជាមួយកម្ពុជានោះទេ។
លោកថ្លែងថា៖ «ក្នុងស្ថានភាពនេះខ្ញុំគិតថា ទំនាក់ទំនងកម្ពុជា និងអាមេរិកនឹងនៅតែល្អ ហេតុនេះការធ្វើពាណិជ្ជកម្មនឹងមិនមានបញ្ហាទេ ប៉ុន្តែបើមានការធ្លាក់ចុះក៏វាមិនធ្លាក់ជាគំហុកទេ»។
ទន្ទឹមនឹងគំនិតសុទិដ្ឋនិយមនេះលោក វណ្ណៈ ក៏បានលើកឡើងថា កម្ពុជាក៏ត្រូវតែខិតខំពង្រឹងគុណភាពផលិតផលខ្លួនឲ្យកាន់តែប្រសើរបន្ថែមទៀតដើម្បីធ្វើឲ្យទីផ្សារអន្តរជាតិរបស់ខ្លួនកាន់តែធំ។
ទំនិញដែលកម្ពុជានាំចេញទៅអាមេរិកមានភាគច្រើនជាសម្លៀកបំពាក់ ស្បែកជើង សម្ភារធ្វើដំណើរ អង្ករ និងផលិតផលកសិកម្មមួយចំនួនទៀត ចំណែកទំនិញដែលអាមេរិកនាំមកកម្ពុជាមានរថយន្ត គ្រឿងអេឡិចត្រូនិក និងផលិតផលសម្រេចមួយចំនួន។
លោក កាំង ម៉ូនីកា អគ្គលេខាធិការរងសមាគមរោងចក្រកាត់ដេរនៅកម្ពុជា មិនអាចទាក់ទងបានទេកាលពីថ្ងៃម្សិលមិញ។
ទោះជាយ៉ាងណាសមាគមរោងចក្រកាត់ដេរនៅកម្ពុជា (GMAC) កាលពីថ្ងៃអង្គារទី ២៤ ខែមីនាបានចេញនូវការអំពាវនាវមួយឲ្យអ្នកបញ្ជាទិញទាំងអស់មិនត្រូវផ្អាកការនាំចេញទំនិញដែលផលិតរួចហើយ និងទំនិញដែលកំពុងផលិតនៅកម្ពុជានោះទេនៅក្នុងអំឡុងផលប៉ះពាល់ដោយសារតែការរីករាលដាលកូវីដ ១៩ នេះ។
ការអំពាវនាវរបស់ GMAC បានធ្វើឡើងបន្ទាប់ពីអ្នកបញ្ជាទិញសំខាន់ៗមួយចំនួនមកពីអាមេរិក និងអឺរ៉ុបដូចជាក្រុមហ៊ុន H&M ក្រុមហ៊ុន Zara ក្រុមហ៊ុន Mango ក្រុមហ៊ុន Primark ក្រុមហ៊ុន Macys និងក្រុមហ៊ុន J.C. Penney កាលពីសប្ដាហ៍មុនបានប្រកាសពីការផ្អាកផលិតកម្មរបស់ពួកគេដោយសារតែការរីករាលដាលកូវីដ១៩ ធ្វើឲ្យតម្រូវការពិភពលោកធ្លាក់ចុះ។
យោងតាមទិន្នន័យពីការិយាល័យពាណិជ្ជកម្មអាមេរិកកាលពីឆ្នាំ ២០១៩ បានបង្ហាញថា ការនាំចេញរបស់កម្ពុជាទៅអាមេរិកមានតម្លៃប្រហែល ៥,៣៦២ ពាន់លានដុល្លារធៀបនឹង ៣,៨១៨ ពាន់លានដុល្លារកាលពីឆ្នាំ ២០១៨ កើនឡើង ៤០ ភាគរយ ខណៈការនាំចូលសរុបពីអាមេរិកមានតម្លៃប្រហែល ៥១៣,៤ លានដុល្លារកើនឡើងជាង ១៥ ភាគរយធៀបនឹង ៤៤៥,៨ លានដុល្លារកាលពីឆ្នាំ ២០១៨។
របាយការណ៍រយៈពេល ៩ ខែឆ្នាំ ២០១៩ របស់ធនាគារជាតិនៃកម្ពុជា (NBC) បានបង្ហាញថា អាមេរិកគឺជាទីផ្សារនាំចេញទំនិញធំជាងគេទី ១ របស់ប្រទេសកម្ពុជា ខណៈការនាំចូលទំនិញមកកម្ពុជាវិញ អាមេរិកស្ថិតនៅចំណាត់ថ្នាក់ទី ១០ ដែលលេខ ១ បានទៅលើប្រទេសចិន៕ LA
