ភ្នំពេញ: កម្ពុជារំពឹងថានឹងអាចទាក់ទាញវិនិយោគិនកាន់តែច្រើនថែមទៀតឲ្យចូលមកវិនិយោគក្នុងវិស័យរោងចក្រឧស្សាហកម្មស្បែកជើង បន្ទាប់ពីសមាគមស្បែកជើងកម្ពុជា (Cambodia Footwear Association, CFA) ត្រូវបានបង្កើតឡើងជាផ្លូវការ។
នៅក្នុងពិធីសម្ពោធបើកដំណើរការសមាគម CFA កាលពីថ្ងៃសៅរ៍លោក លី ឃុនថៃ ប្រធានសមាគមដែលទើបបង្កើតថ្មីនេះបានថ្លែងថា ដោយសម្លឹងឃើញភាពរីកចម្រើនយ៉ាងខ្លាំងក្នុងវិស័យឧស្សាហកម្មផលិតស្បែកជើងនៅកម្ពុជាក្នុងរយៈពេលប៉ុន្មានឆ្នាំចុងក្រោយនេះមានការជំរុញឲ្យបង្កើតសមាគមនេះឡើងដើម្បីរួមគ្នាជាសំឡេងតែមួយក្នុងការគាំទ្រ និងលើកស្ទួយវិស័យស្បែកជើង។
លោកថ្លែងថា៖ «យើងនឹងផ្តោតការងារសំខាន់ទៅលើការធ្វើឲ្យប្រសើរនូវលំហូរទីផ្សារតាមរយៈការរក្សាបាននូវភាពអំណោយផលផ្នែកពាណិជ្ជកម្ម និងកៀរគរវិនិយោគិនពីគ្រប់ប្រទេសឲ្យមកវិនិយោគក្នុងទីផ្សារកម្ពុជាបន្ថែមទៀត តាមរយៈកិច្ចព្រមព្រៀងពាណិជ្ជកម្ម និងដៃគូសេដ្ឋកិច្ចនានា»។
លោក ឃុនថៃ ប្រាប់ភ្នំពេញប៉ុស្តិ៍ថា លោករំពឹងថា វិស័យរោងចក្រឧស្សាហកម្មស្បែកជើងនៅកម្ពុជានឹងមានការរីកចម្រើនដែលអាចទាក់ទាញអ្នកវិនិយោគបន្ថែមទៀត ព្រោះ CFA បានចូលជាសមាជិកសមាគមស្បែកជើងអន្តរជាតិ និងបានអញ្ជើញក្រុមហ៊ុនផលិតស្បែកជើងចំនួន ១១ ប្រទេសរួមទាំងជប៉ុន ចិន ហុងកុង និងឥណ្ឌាឲ្យមកចូលរួមកម្មវិធីសម្ពោធ CFA។
លោកថ្លែងថា៖ «យើងក៏បាននាំពួកគាត់ [វិនិយោគិន] ធ្វើទស្សនកិច្ចតាមបណ្តារោងចក្រផលិតស្បែកជើងនានានៅកម្ពុជាផងដែរ។ យើងសង្ឃឹមថានឹងអាចទាក់ទាញពួកគាត់មកវិនិយោគ មកបង្កើតរោងចក្រក្រោយពេលគាត់មើល [រោងចក្រស្បែកជើង] ហើយខ្ញុំជឿថា គាត់នឹងមានឆន្ទៈមកវិនិយោគនៅស្រុកខ្មែរកាន់តែច្រើនទៀត»។
បច្ចុប្បន្នមានរោងចក្រផលិតស្បែកជើងចំនួន ៨៣ និងក្រុមហ៊ុនផ្គត់ផ្គង់សម្ភារផលិតស្បែកជើង ៧០ ដែលចុះបញ្ជីនៅកម្ពុជាដែលក្រុមហ៊ុនទាំងនេះគឺជាសមាជិករបស់ CFA។ វិស័យនេះមានកម្មករបម្រើការងារប្រមាណ ១៣ ម៉ឺននាក់ហើយរោងចក្រឧស្សាហកម្មស្បែកជើងទាំងនោះមានទីតាំងនៅភ្នំពេញ ខេត្តកំពង់ចាម កំពង់ស្ពឺ តាកែវ កណ្តាល និងក្រុងបាវិត ខេត្តស្វាយរៀង។ នេះបើតាមលោក ឃុនថៃ។
លោកបានថ្លែងថា៖ «សមាគមយើងជាតំណាងឲ្យរោងចក្រទាំងអស់នៅកម្ពុជាសម្រាប់ផ្តល់ព័ត៌មាន និងសម្របសម្រួលជាមួយក្រសួងស្ថាប័នពាក់ព័ន្ធ ឧទាហរណ៍ការបើកសិក្ខាសាលាខ្លីៗដល់និយោជកទាក់ទងផ្លូវច្បាប់ និងដឹកនាំកិច្ចប្រជុំក្នុងវិស័យស្បែកជើងទៅក្រៅប្រទេស»។
រោងចក្រឧស្សាហកម្មស្បែកជើងដែលវិនិយោគនៅកម្ពុជាមានមកពីប្រទេសចិន ម៉ាឡេស៊ី ជប៉ុន និងកូរ៉េខាងត្បូង ហើយទីផ្សារសម្រាប់វិស័យស្បែកជើងកម្ពុជាបាននាំចេញទៅអឺរ៉ុប អាមេរិក កាណាដា អូស្ត្រាលី ជប៉ុន និងនាំចេញមួយផ្នែកទៅប្រទេសក្នុងតំបន់អាស៊ាន។
លោកស្រីឧបនាយករដ្ឋមន្ត្រី ម៉ែន សំអន ដែលអញ្ជើញចូលរួមក្នុងពិធីសម្ពោធនោះបានអំពាវនាវឲ្យ CFA និងក្រុមហ៊ុនរោងចក្រស្បែកជើងបន្តការខិតខំប្រឹងប្រែងបន្ថែមទៀតក្នុងការលើកស្ទួយវិស័យឧស្សាហកម្មស្បែកជើង និងពង្រឹងសមត្ថភាពក្នុងការប្រកួតប្រជែងទៅផ្សារអន្តរជាតិ។
លោកស្រីថ្លែងថា៖ «ខ្ញុំសូមគាំទ្រពេញទំហឹងចំពោះការបង្កើតសមាគមនេះឡើង ដើម្បីដើរតួនាទីជាអន្តរការីសម្របសម្រួល និងសហការជាមួយរដ្ឋាភិបាល ស្ថាប័នឯកជនក្នុងការរួមចំណែកលើកស្ទួយ និងអភិវឌ្ឍន៍វិស័យផលិតស្បែកជើងនៅកម្ពុជា»។
លោក លឹម ហេង អនុប្រធានសភាពាណិជ្ជកម្មកម្ពុជាបានប្រាប់ភ្នំពេញ-ប៉ុស្តិ៍ថា ការបង្កើតសមាគមនេះនឹងជួយស្វែងរកដៃគូវិនិយោគ និងអាចជួយដោះស្រាយបញ្ហាប្រឈមនានារបស់រោងចក្រស្បែកជើងនៅកម្ពុជា។
លោកថ្លែងថា៖ «ការបង្កើតសមាគមនេះដើម្បីជាសំឡេងចរចាជាមួយអ្នកបញ្ជាទិញ និងធ្វើជាមួយអង្គការអន្តរជាតិខាងការងារ (ILO) ហើយធ្វើការជាមួយរដ្ឋាភិបាល នៅពេលមានបញ្ហាលំបាក [CFA] ធ្វើការដោះស្រាយជាមួយពួកគាត់ [រោងចក្រស្បែកជើង]»។
ក្នុងឆមាសទី ១ ឆ្នាំ ២០១៩ នេះការនាំចេញផលិតផលស្បែកជើងនៅកម្ពុជាស្ថិតក្រោមប្រព័ន្ធអនុគ្រោះពន្ធ GSP និងប្រព័ន្ធប្រទេសដែលទទួលបានអនុគ្រោះបំផុត (MFN) កើនឡើង ១៤,៦១ ភាគរយដល់ជាង ៥៦៣ លានដុល្លារធៀបនឹងឆមាសទី ១ ឆ្នាំ ២០១៨។ នេះបើតាមរបាយការណ៍របស់ក្រសួងពាណិជ្ជកម្ម។
នៅខែកក្កដាឆ្នាំនេះអង្គការ ILO បានចេញផ្សាយព្រឹត្តិបត្រមួយដែលបង្ហាញថា ប្រទេសកម្ពុជាស្ថិតនៅក្នុងចំណោមប្រទេសផលិតស្បែកជើងឈានមុខគេទាំង ១០ ដែលនាំចេញមានតម្លៃជាង ១ ពាន់លានដុល្លារកាលពីឆ្នាំ ២០១៨ កើនឡើង ១៩ ភាគរយ។ ទីផ្សារនាំចេញសំខាន់បំផុតរបស់ប្រទេសកម្ពុជាសម្រាប់ស្បែកជើង គឺអឺរ៉ុប ៤៦ ភាគរយ អាមេរិក ១៧ ភាគរយ និងជប៉ុន ១២ ភាគរយ។
របាយការណ៍ឆ្នាំ ២០១៨ របស់ធនាគារជាតិនៃកម្ពុជា (NBC) បានឲ្យដឹងថា ការនាំចេញសម្លៀកបំពាក់ និងស្បែកជើងរបស់កម្ពុជាមានតម្លៃ ១០ ពាន់លានដុល្លារកើនឡើង ២៤ ភាគរយ ធៀបនឹង ៨ ពាន់លានដុល្លារកាលពីឆ្នាំ ២០១៧៕ LA