ភ្នំពេញៈ ការនាំចេញម៉ាស៊ីនត្រជាក់ពីប្រទេស ថៃ មកកាន់កម្ពុជា កាលពីឆ្នាំ ២០១៨ មានតម្លៃប្រមាណ ១៦ លានដុល្លារក្នុងចំណោមការនាំចេញម៉ាស៊ីនត្រជាក់សរុបរបស់ថៃជាង ៥ ពាន់លានដុល្លារ ទៅកាន់ទីផ្សារអន្តរជាតិ។
ថ្លែងក្នុងឱកាសនៃការផ្សព្វផ្សាយពិព័រណ៍ «Bangkok RHVAC & Bangkok E&E 2019» កាលពីម្សិលមិញ លោក Witt Maneenetr អគ្គនាយករងនៃអគ្គនាយកដ្ឋានជំរុញពាណិជ្ជកម្មអន្តរជាតិនៃក្រសួងពាណិជ្ជកម្មប្រទេស ថៃ បានឲ្យដឹងថា ភាគច្រើនម៉ាស៊ីនត្រជាក់ដែលដាក់លក់នៅកម្ពុជា ត្រូវបាននាំចូលមកពីប្រទេស ថៃ ខណៈបច្ចុប្បន្ន ថៃ បានក្លាយជាប្រទេសដែលនាំចេញម៉ាស៊ីនត្រជាក់ច្រើនជាងគេលំដាប់ទី ២ ក្នុងពិភពលោកបន្ទាប់ពីប្រទេស ចិន។
លោកថ្លែងថា៖ «កាលពីឆ្នាំ ២០១៨ ការនាំចេញម៉ាស៊ីនត្រជាក់របស់ថៃទៅកាន់ទីផ្សារអន្តរជាតិ មានតម្លៃប្រមាណជាង ៥ ពាន់លានដុល្លារ ក្នុងនោះអាស៊ានមាន ២៥ ភាគរយ»។
ព្រឹត្តិការណ៍ពិព័រណ៍ «Bangkok RHVAC & Bangkok E&E 2019» គ្រោងនឹងរៀបចំធ្វើឡើងក្នុងទីក្រុងបាងកក ប្រទេស ថៃ ចាប់ពីថ្ងៃទី ២៥-២៨ ខែកញ្ញា ឆ្នាំ ២០១៩។
កាលពីឆ្នាំ ២០១៧ ប្រទេស ថៃ ផលិតម៉ាស៊ីនត្រជាក់បានចំនួន ១២,៤ លានគ្រឿងដោយក្នុងនោះ ៨៥ ភាគរយសម្រាប់នាំចេញ។
លោកប្រាប់ទៀតថា បើទោះបីជាការនាំចេញម៉ាស៊ីនត្រជាក់ពីថៃមកកម្ពុជានៅមានទំហំតិចតួចក្តី ប៉ុន្តែតាមការសិក្សាប្រជាជនខ្មែរគាំទ្រខ្លាំងដល់ផលិតផលរបស់ប្រទេស ថៃ។
បើយោងតាមលោក Jirawuth Suwanna អគ្គទីប្រឹក្សាពាណិជ្ជកម្មប្រចាំស្ថានឯកអគ្គរាជទូតថៃ បានឲ្យដឹងថា ក្នុងរយៈពេល ១១ ខែ ឆ្នាំ ២០១៨ ការធ្វើពាណិជ្ជកម្មទ្វេភាគីរវាងប្រទេសទាំង ២ មានទំហំជាង ៨ ពាន់លានដុល្លារ៕ LA