ភ្នំពេញៈ កម្ពុជានឹងរៀបចំកិច្ចប្រជុំកំពូលនៃប្រទេសមហាអនុតំបន់មេគង្គ (GMS) លើកទី ៧ ក្នុងត្រីមាសទី ១ ឆ្នាំ ២០២១ ខាងមុខ ខណៈចាប់តាំងពីបង្កើតរហូតមកដល់ពេលនេះ ការវិនិយោគរបស់ GMS មានតម្លៃជិត ២៣ ពាន់លានដុល្លារ។
GMS សំដៅដល់បណ្តាប្រទេសដែលមានទន្លេមេគង្គហូរកាត់ រួមមាន កម្ពុជា ចិន មីយ៉ាន់ម៉ា ឡាវ វៀតណាម និង ថៃ។ GMS បង្កើតឡើងដើម្បីអភិវឌ្ឍលើវិស័យអាទិភាពមួយចំនួនដូចជា កសិកម្ម ថាមពល បរិស្ថាន សុខភាព ការអភិវឌ្ឍធនធានមនុស្ស បច្ចេកវិទ្យាព័ត៌មាន និងទូរគមនាគមន៍ ទេសចរណ៍ ការដឹកជញ្ជូន ការធ្វើពាណិជ្ជកម្ម ការអភិវឌ្ឍទីក្រុង និងតំបន់សេដ្ឋកិច្ចពិសេសតាមព្រំដែន។
ក្នុងឱកាសនៃសន្និសីទថ្នាក់រដ្ឋមន្ត្រីមហាអនុតំបន់មេគង្គកាលពីថ្ងៃចន្ទលោក សុខ ចិន្តាសោភា អគ្គលេខាធិការក្រុមប្រឹក្សាអភិវឌ្ឍន៍កម្ពុជា (CDC) និងជារដ្ឋមន្ត្រីទទួលបន្ទុកកម្មវិធីមហាអនុតំបន់មេគង្គ (GMS) បាននិយាយថា នេះជាកិច្ចប្រជុំថ្នាក់រដ្ឋមន្ត្រីនៃក្រុមប្រទេស GMS ដែលមានបំណងពិនិត្យមើលលើការងារដែលអ្នកបច្ចេកទេសបានធ្វើកន្លងមក មុននឹងដាក់ឲ្យថ្នាក់ដឹកនាំនៃប្រទេសជាសមាជិកពិនិត្យ និងសម្រេចក្នុងកិច្ចប្រជុំ GMS ដែលនឹងធ្វើក្នុងឆ្នាំ ២០២១។
លោកថ្លែងថា៖ «GMS លើកទី ៧ ដែលកម្ពុជាធ្វើជាម្ចាស់ផ្ទះនឹងត្រូវធ្វើឡើងក្នុងត្រីមាសទី ១ ឆ្នាំ ២០២១។ កិច្ចប្រជុំកំពូលគឺជាឱកាសផ្តល់ជូនប្រមុខរដ្ឋាភិបាលប្រទេសជាសមាជិកដើម្បីអនុម័តអ្វីដែលបានរៀបចំ ពិសេសការអនុម័តនូវក្របខ័ណ្ឌយុទ្ធសាស្ត្រ GMS ២០២០-២០៣០»។
លោកពន្យល់ថា GMS គឺមានការប្រជុំតាមកម្រិតខុសៗគ្នាដោយកម្រិតទី ១ គឺកម្រិតបច្ចេកទេសដែលមានការចូលរួមរបស់តំណាងតាមវិស័យ និងក្រសួងពាក់ព័ន្ធមួយចំនួន ចំណែកកម្រិតទី ២ គឺជាកិច្ចប្រជុំថ្នាក់រដ្ឋមន្ត្រីដើម្បីពិនិត្យលើការងារដែលក្រុមការងារបច្ចេកទេសបានរៀបចំ។
បើតាមលោក ចិន្តាសោភា ចក្ខុវិស័យនៃកិច្ចសហប្រតិបត្តិការ GMS បានកើនឡើងតាំងពីឆ្នាំ ១៩៩២ ក្នុងគោលបំណងជំរុញការអភិវឌ្ឍក្នុងតំបន់ឲ្យកាន់តែមាន «សមាហរណកម្ម វិបុលភាព និងសមត្ថភាព»។
ជាមួយការមកដល់នៃបដិវត្តន៍ឧស្សាហកម្មទី ៤ លោក ចិន្តាសោភា បានថ្លែងថា៖ «ក្នុងក្របខ័ណ្ឌយុទ្ធសាស្ត្រ GMS នៅពេលខាងមុខ ខ្ញុំជឿថាច្បាស់ជាមានរឿងថ្មីច្រើន ព្រោះសកលលោក និងតំបន់យើងនៅពេលនេះ និងទៅអនាគតនឹងជួបប្រទះបញ្ហាប្រឈមថ្មីៗជាច្រើន ហើយនឹងមានទំហំធំជាងមុនទៀតផង»។
លោក Ahmed M.Saeed អនុប្រធានធនាគារអភិវឌ្ឍន៍អាស៊ីបាននិយាយថា ក្នុងរយៈពេល ២៧ ឆ្នាំមកនេះក្នុងកម្មវិធី GMS បានវិនិយោគអស់ជិត ២៣ ពាន់លានដុល្លារក្នុងនោះ ៤២ ភាគរយបានមកពី ADB ចំនួន ២៦ ភាគរយបានមកពីរដ្ឋាភិបាលនៃបណ្តាប្រទេស GMS និងនៅសល់បានមកពីកិច្ចសហប្រតិបត្តិការទ្វេភាគី និងពហុភាគី។ ចាប់តាំងពីបង្កើត GMS រហូតមកដល់ពេលនេះ ADB មានកម្មវិធីជាង ២២០ ដែលមានទឹកប្រាក់ជំនួយជាង ៣២០ លានដុល្លារ។ លោកថ្លែងថា៖ «យើងមានចក្ខុវិស័យក្នុងការបន្តនូវសកម្មភាពល្អៗជាបន្តទៀត ពិសេសបញ្ហាហេដ្ឋារចនាសម្ព័ន្ធក្នុងតំបន់»។
បើតាមលោក Ahmed សម្រាប់កម្ពុជា ADB បានផ្តល់ថវិកាសម្រាប់កិច្ចសហប្រតិបត្តិការចំនួន ២៣ គម្រោងចាប់ពីឆ្នាំ ១៩៩៦ មកដែលមានតម្លៃ ១,៣ ពាន់លានដុល្លារ។
លោកបន្តទៀតថា សម្រាប់គម្រោង GMS នៅកម្ពុជាឆ្នាំ ២០២២ គឺមានយ៉ាងតិចចំនួន ២ គម្រោង គឺការភ្ជាប់ និងធ្វើឲ្យប្រសើរនូវការកសាងផ្លូវ និងហេដ្ឋារចនាសម្ព័ន្ធផ្សេងទៀតដែលមានតម្លៃជាង ៧០ លានដុល្លារ។ កាលពីឆ្នាំ ២០១៨ រៀបចំកិច្ចប្រជុំកំពូល GMS លើកទី ៦ ត្រូវបានធ្វើឡើងនៅទីក្រុងហាណូយ៕LA