ភ្នំពេញៈ ប្រទេសកម្ពុជា មានអត្រាអតិផរណាដ៏មានស្ថិរភាពជាមធ្យមកម្រិត ២,៥ ភាគរយនៅឆមាសទី ១ ឆ្នាំនេះ ដោយសារការធ្លាក់ចុះទំនិញប្រេងឥន្ធនៈ ព្រមទាំងស្ថិរភាពនៃអត្រាប្តូរប្រាក់រូបិយប័ណ្ណក្នុងស្រុកធៀបនឹងប្រាក់ដុល្លារអាមេរិក។
របាយការណ៍ប្រចាំឆមាសទី ១ របស់ធនាគារជាតិនៃកម្ពុជា (NBC) ដែលបានចេញផ្សាយកាលពីថ្ងៃពុធក្នុងសប្តាហ៍នេះ បង្ហាញថាថ្លៃក្រុមម្ហូបអាហារបានកើនឡើង ៤ ភាគរយជាចម្បងបណ្តាលមកពីឥទ្ធិពលនៃជំងឺកូវីដ ១៩ ដែលធ្វើឲ្យការដឹកជញ្ជូនទំនិញនាំចូលមានភាពរអាក់រអួល។ ចំណែកឯថ្លៃក្រុមទំនិញ និងសេវាពាក់ព័ន្ធនឹងប្រេងឥន្ធនៈមានបរិត្តផរណាចំនួន ៣,៥ ភាគរយ ដោយសារថ្លៃប្រេងឆៅពិភពលោកបានថយចុះជាបន្តបន្ទាប់ចាប់ពីពាក់កណ្តាលខែមករា។
នៅកម្ពុជាប្រេងសាំងមានតម្លៃជាមធ្យម ២ ៩៥០ រៀលក្នុង ១ លីត្រធៀប ៣ ៦៥០ រៀលក្នុងបរិមាណដូចគ្នានៅឆមាសទី ២ ឆ្នាំ ២០១៩។
លោក ជា ចាន់តូ ទេសាភិបាលធនាគារជាតិនៃកម្ពុជាបានឲ្យដឹងនៅក្នុងរបាយការណ៍នេះថា ចាប់តាំងពីដើមឆ្នាំ ២០២០ ការរីករាលដាលជំងឺកូវីដ ១៩ បានបណ្ដាលឲ្យមានវិបត្តិសុខភាពពិភពលោកដែលនាំឲ្យមានវិបត្តិសេដ្ឋកិច្ចធ្ងន់ធ្ងរជាងវិបត្តិហិរញ្ញវត្ថុកាលពីឆ្នាំ ២០០៨ ឆ្នាំ ២០០៩ ទៅទៀត។ ពាណិជ្ជកម្ម ការវិនិយោគ និងភ្ញៀវទេសចរបរទេសរួមទាំងសេដ្ឋកិច្ចក្នុងស្រុកបានទទួលរងផលប៉ះពាល់យ៉ាងខ្លាំង។
លោកថ្លែងថា៖ «នៅក្នុងបរិការណ៍នេះ ប្រទេសកម្ពុជាបានដាក់ចេញវិធានការមួយចំនួន ដើម្បីគ្រប់គ្រងការរីករាលដាលជំងឺកូវីដ១៩។ ទោះបីយ៉ាងណា យើងមានស្ថិរភាពម៉ាក្រូសេដ្ឋកិច្ច បើទោះបីជាវាមានកម្រិតទាបដោយសារតែយើងរក្សាការគ្រប់គ្រងអតិផរណាទាបបំផុតដោយអត្រាការប្រាក់ប្រកបដោយស្ថិរភាព»។
លោកបន្ថែមថា លើសពីនេះទៅទៀតវិស័យធនាគារនៅតែរឹងមាំ និងបានរួមចំណែកយ៉ាងសកម្មក្នុងការផ្ដល់សន្ទនីយភាពដល់សេដ្ឋកិច្ច ខណៈដែលប្រាក់បញ្ញើ និងកម្ចីបន្តកើនឡើង ទោះបីជាសេដ្ឋកិច្ចកំពុងរងផលប៉ះពាល់ និងប្រឈមបញ្ហាក៏ដោយ។
លោក Hiroshi SUZUKI ប្រធានអគ្គនាយក ប្រធានសេដ្ឋវិទូនៅវិទ្យាស្ថានស្រាវជ្រាវពាណិជ្ជកម្មកម្ពុជា (BRIC) បានថ្លែងថា សម្រាប់អតិផរណា ២,៥ ភាគរយដែលកម្ពុជាមាននៅឆមាសទី ១ នេះបានបង្ហាញពីអត្រាប្រកបដោយស្ថិរភាពបំផុត ហើយវាឆ្លុះបញ្ចាំងពីកិច្ចខិតខំប្រឹងប្រែងរបស់អាជ្ញាធរក្នុងស្រុក ដើម្បីធ្វើឲ្យមានស្ថិរភាពដល់ម៉ាក្រូសេដ្ឋកិច្ច។
លោកថ្លែងថា៖ «អត្រាអតិផរណាបច្ចុប្បន្ន (២,៥ ភាគរយ) គឺពិតជាមានស្ថិរភាពខ្លាំងបំផុត។ យើងកោតសរសើរ ធនាគារជាតិនៃកម្ពុជា និងក្រសួងសេដ្ឋកិច្ច និងហិរញ្ញវត្ថុដែលបានខិតខំប្រឹងប្រែងដើម្បីធ្វើឲ្យមានស្ថិរភាពម៉ាក្រូសេដ្ឋកិច្ចរបស់ប្រទេសកម្ពុជា ទោះបីជាស្ថិតក្នុងស្ថានការណ៍ដ៏ពិបាកស្ថិតក្រោមជំងឺកូវីដ១៩ក៏ដោយ»។
លោកលើកឡើងថា៖ «ទោះបីជាតម្លៃទីផ្សារអន្តរជាតិ (ប្រេង និងតម្លៃផ្សេងៗទៀត) មានការប្រែប្រួល នៅពេលនេះយើងអាចមើលឃើញតម្លៃប្រកបដោយស្ថិរភាព ដោយសារតែតម្រូវការកើនឡើងនៅក្នុងទីផ្សារពិភពលោកស្ថិតក្រោមជំងឺកូវីដ ១៩។ ខ្ញុំយល់ស្របជាមួយនឹងអត្រាអតិផរណាដែលប៉ាន់ប្រមាណដោយ NBC និងអង្គការអន្តរជាតិ (មូលនិធិរូបិយវត្ថុអន្តរជាតិ (IMF), ធនាគារពិភពលោក (WB), ធនាគារអភិវឌ្ឍន៍អាស៊ី (ADB)។ល។) ដែលអង្គការទាំងនេះបង្ហាញអត្រាអតិផរណាប្រកបដោយស្ថិរភាព»។
យោងតាម NBC អត្រាប្តូរប្រាក់មាន ៤ ១០៤ រៀលធៀបនឹងប្រាក់ដុល្លារដែលកើនឡើង ១,៦ ភាគរយធៀបនឹងរយៈពេលដូចគ្នាកាលពីឆ្នាំមុន ៤ ០៣៦ រៀល។ NBC បានព្យាករថា អតិផរណានឹងរក្សាចំនួន ២,៥ ភាគរយនៅឆមាសទី ២៕ LA