ភ្នំពេញៈ ការប្រមូលចំណូលពីវិស័យពន្ធដារក្នុងឆ្នាំ ២០១៩ កន្លងមកសម្រេចលើសផែនការ ៥៣០ លានដុល្លារ ស្មើនឹងជាង ២៣ ភាគរយ បើធៀបនឹងឆ្នាំ ២០១៨។ នេះបើតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ (GDT)។
របាយការណ៍នៃកិច្ចប្រជុំបូកសរុបលទ្ធផលចំណូលពន្ធដារប្រចាំខែធ្នូ និងប្រចាំឆ្នាំ ២០១៩ និងទិសដៅសម្រាប់អនុវត្តបន្តឆ្នាំ ២០២០ របស់អគ្គនាយកដ្ឋានពន្ធដារកាលពីថ្ងៃអង្គារបានឲ្យដឹងថា ក្នុងរយៈពេល ១២ ខែឆ្នាំ ២០១៩ ចំណូលពន្ធអាករដែលអគ្គនាយកដ្ឋានពន្ធដារប្រមូលបានមានចំនួន ២ ៨១៩,៣៣ លានដុល្លារ កើនលើសផែនការប្រចាំឆ្នាំ ២០១៩ ចំនួន ២៣,២០ ភាគរយ។ ចំនួននេះបើធៀបនឹងការប្រមូលចំណូលកាលពីឆ្នាំ ២០១៨ គឺមានកំណើន ២៨,២៨ ភាគរយ។
ដោយឡែកសម្រាប់ខែធ្នូ ឆ្នាំ ២០១៩ ការប្រមូលចំណូលពន្ធអាកររបស់អគ្គនាយកដ្ឋានពន្ធដារសម្រេចបានចំនួន ១៩៥,០៤ លានដុល្លារ កើនឡើង ៣៦,៨៥ ភាគរយ ធៀបនឹងពីខែធ្នូ ឆ្នាំ ២០១៨។
លោក គង់ វិបុល អគ្គនាយកនៃអគ្គនាយកដ្ឋានពន្ធដារបាននិយាយថា កំណើនសេដ្ឋកិច្ច និងការវិនិយោគបានធ្វើឲ្យការប្រមូលចំណូលពន្ធអាកររបស់អគ្គនាយកដ្ឋានពន្ធដារបន្តកើនឡើងជារៀងរាល់ឆ្នាំ។
លោកថ្លែងថា៖ «សមិទ្ធផលដ៏ថ្លៃថ្លាសម្រេចបានក្នុងឆ្នាំ ២០១៩ គឺជាការឆ្លុះបញ្ចាំងពីភាពជោគជ័យនៃការអនុវត្តនូវយុទ្ធសាស្ត្រកៀរគរចំណូលឆ្នាំ ២០១៩-២០២០ ដែលជានវានុវត្តន៍ប្រកបដោយនិរន្តរភាពនៃការបន្តអនុវត្តប្រកបដោយភាពជោគជ័យនូវការកែទម្រង់គោលនយោបាយរដ្ឋបាលសារពើពន្ធ និងទំនើបកម្មពន្ធដារ ស្របតាមយុទ្ធសាស្ត្រចតុកោណដំណាក់កាលទី ៤ នៃការកែទម្រង់ការគ្រប់គ្រងហិរញ្ញវត្ថុសាធារណៈ»។
របាយការណ៍ GDT បានឲ្យដឹងទៀតថាក្នុងឆ្នាំ ២០១៩ ការប្រមូលចំណូលអាករលើតម្លៃបន្ថែមបានកើនឡើង ៣១,០៥ ភាគរយ បើធៀបនឹងឆ្នាំ ២០១៨ ចំណែកការប្រមូលចំណូលតាមរយៈ E-VAT រួមជាមួយវិធានការពន្ធដារសំខាន់ផ្សេងៗទៀតបានកើនឡើង ២៨,៤៧ ភាគរយ អាករពិសេសកើន ៣០,៧២ ភាគរយ ពន្ធប្រថាប់ត្រា កើន ៤៣,៧៣ ភាគរយ ពន្ធលើប្រាក់បៀវត្សរ៍កើន ១៨,២១ ភាគរយ និងពន្ធលើឈ្នួលដី និងផ្ទះ កើន ៦៨,២០ ភាគរយ។
លោក អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុបានឲ្យដឹងថា GDT តែងតែសម្រេចបាននូវលទ្ធផលជាប្រវត្តិសាស្ត្រជាបន្តបន្ទាប់ ដែលនេះគឺជាមោទនភាពមួយសម្រាប់រដ្ឋាភិបាលកម្ពុជា។ លោកបន្តថា ទោះយ៉ាងណាដើម្បីធ្វើឲ្យការប្រមូលចំណូលកាន់តែមានប្រសិទ្ធភាព អគ្គនាយកដ្ឋានពន្ធដារក៏ត្រូវតែយកចិត្តទុកដាក់ចំពោះស្ថានភាពនៃការប្រែប្រួលនៃភូមិសាស្ត្រនយោបាយ និងស្ថានភាពនៃម៉ាក្រូសេដ្ឋកិច្ចសកលផងដែរ។
លោកថ្លែងថា៖ «សូមបង្កើនប្រសិទ្ធភាពនៃការគ្រប់គ្រងប្រមូលចំណូលពន្ធ និងវិធានការជំរុញកំណើនសេដ្ឋកិច្ច និងលើកកម្ពស់សកម្មភាពសេដ្ឋកិច្ចក្នុងស្រុកដែលផ្តល់នូវស្ថានភាពអំណោយផល និងភាពទាក់ទាញការវិនិយោគ»។
កាលពីឆ្នាំ ២០១៨ ការប្រមូល GDT ប្រមូលចំណូលបានប្រមាណ ២ ១៩៧,៨៥ លានដុល្លារ កើន ១៣,៣៧ ភាគរយ ស្មើនឹងប្រមាណ ២៥៩,១៥ លានដុល្លារ បើធៀបនឹងឆ្នាំ ២០១៧៕LA