ក្រុងប៉េកាំងៈ មន្ដ្រីក្រសួងកសិកម្មបានឲ្យដឹងកាលពីថ្ងៃពុធថា ប្រទេស ចិន អាចធានាគុណភាពការនាំចូលសណ្ដែកសៀងរបស់ខ្លួនដោយប្រតិបត្តិការទីផ្សារប្រកបដោយស្ថិរភាព ខណៈដែលផ្ទៃដីដាំដុះសណ្ដែកសៀងក្នុងប្រទេសនេះត្រូវរំពឹងថា នឹងត្រូវកើនឡើងក្នុងឆ្នាំ ២០១៩។
លោក Tang Ke ប្រធាននាយកដ្ឋានព័ត៌មានទីផ្សារ និងសេដ្ឋកិច្ចនៃក្រសួងកសិកម្ម និងកិច្ចការជនបទរបស់ប្រទេស ចិន បានប្រាប់សន្និសីទព័ត៌មានកាលពីថ្ងៃពុធថា ការផ្គត់ផ្គង់សរុបនៃសណ្ដែកសៀង ដែលជាដំណាំកសិកម្មពឹងផ្អែកយ៉ាងខ្លាំងលើការនាំចូលនោះនឹងត្រូវបានធានា ហើយទីផ្សារក្នុងស្រុកត្រូវបានរំពឹងថា នឹងកើនឡើងជានិច្ចនៅឆ្នាំនេះ។
លោក Tang បានកត់សម្គាល់ថា បច្ចុប្បន្នផ្ទៃដីដាំដុះសណ្ដែកសៀងកំពុងកើនឡើងជាបន្តបន្ទាប់នៅអាមេរិកខាងត្បូងនៅក្នុងឆ្នាំបង្កបង្កើនផលកសិកម្មថ្មីនេះ។ ប្រទេស អាហ្សង់ទីន ត្រូវបានរំពឹងថា នឹងប្រមូលផលសណ្ដែកសៀងលើសផលឆ្នាំមុនចំនួន ១៧ លានតោន ខណៈដែលស្ដុកសណ្ដែកសៀងអាមេរិកបានកើនឡើងផងដែរ។
ប៉ុន្តែមន្ដ្រីរូបនេះបានបន្ថែមថា ហានិភ័យអាចកើតឡើងដោយសារការប្រែប្រួលដ៏ធំនៃតម្លៃសណ្ដែកសៀងពិភពលោក ដែលបានបង្កឡើងដោយការកេងចំណញទីផ្សារ មុន ពេលសណ្ដែកសៀងរបស់អាមេរិកខាងត្បូងត្រៀមខ្លួនចូលក្នុងទីផ្សារនៅខែមីនា ហើយហានិភ័យទាំងនេះមិនអាចត្រូវបានផាត់ចេញឡើយ។
ទិន្នន័យបានពីអគ្គរដ្ឋបាលគយរបស់ប្រទេស ចិន បានបង្ហាញកាលពីថ្ងៃចន្ទថា កាលពីឆ្នាំ ២០១៨ ការនាំចូលសណ្ដែកសៀងរបស់ប្រទេស ចិន បានធ្លាក់ចុះ ៧,៩ ភាគរយធៀបនឹងរយៈពេលដូចគ្នាកាលពីឆ្នាំមុន មកនៅត្រឹម ៨៨,០៣ លានតោន។
ការធ្លាក់ចុះនេះ ដែលជាការធា្លក់ចុះប្រចាំឆ្នាំដំបូងចាប់តាំងពីឆ្នាំ ២០១១ មកនោះ បានកើតមានឡើង បន្ទាប់ពីការបង្កើនកិច្ចខិតខំប្រឹងប្រែងកាលពីឆ្នាំ ២០១៨ ក្នុងការធ្វើពិពិធកម្មប្រភពនាំចូលសណ្ដែកសៀងរបស់ខ្លួនទៅកាន់ប្រទេសផ្សេងៗ ដូចជាប្រេស៊ីល និងអាហ្សង់ទីន ដោយសារភាពតានតឹងផ្នែកពាណិជ្ជកម្មជាមួយអាមេរិក ដែលកាត់បន្ថយដោយផ្ទាល់នូវការនាំចូលរបស់ចិនពីអាមេរិក ដោយសារការហូតពន្ធនាំចូល ២៥ ភាគរយ។
ទន្ទឹមនឹងនេះ ដោយការគាំទ្រឲ្យមានការដាំដុះសណ្ដែកសៀងក្នុងស្រុកត្រូវបានពង្រឹងនោះ ការផ្គត់ផ្គង់សណ្ដែកសៀងដោយខ្លួនឯងរបស់ប្រទេសនេះ នឹងត្រូវកើនឡើងជាលំដាប់។ តម្លៃសម្រាប់ទិន្នផលក្នុងស្រុកនឹងតាមពីក្រោយកាន់តែកៀកនឹងតម្លៃរបស់សណ្ដែកសៀងនាំចូល។ នេះបើយោងតាមលោក Tang។
លោក Tang ថ្លែងថា៖ «តំបន់ភាគឦសានរបស់ប្រទេស ចិន នឹងចូលក្នុងដំណាក់កាលដ៏សំខាន់នៃការភ្ជួររាស់នៅនិទាឃរដូវ និងការរៀបចំគ្រាប់ពូជនៅក្នុងរយៈពេល ២-៣ ខែក្រោយ ដែលយើងនឹងយកចិត្តទុកដាក់យ៉ាងដិតដល់»។
លោក Zhang Lichen អនុប្រធានក្រុមហ៊ុន Jiusan Group ដែលជាក្រុមហ៊ុនកែច្នៃសណ្តែកសៀងដែលមានមូលដ្ឋាននៅខេត្តហេឡុងជាំង បានប្រាប់កាសែត Global Times របស់ចិនថា កសិករក្នុងស្រុកបានដឹងកាន់តែខ្លាំងអំពីរបៀបដំណើរការរបស់ទីផ្សារ ហើយពួកគេកំពុងយកចិត្តទុកដាក់យ៉ាងដិតដល់ចំពោះទំនាក់ទំនងពាណិជ្ជកម្មរវាងចិន និងអាមេរិក។
លោក Zhang កត់សម្គាល់ថា៖ «កសិករនឹងកែសម្រួលរចនាសម្ព័ន្ធដាំដុះរបស់ពួកគេដើម្បីតាមឲ្យទាន់ការផ្លាស់ប្តូរនានានៅទីផ្សារ និងតម្លៃផលិតផល ហើយខ្ញុំគិតថា ផ្ទៃដីដាំដុះនឹងកើននៅឆ្នាំនេះក្នុងខេត្តនេះ»។
លោក Tang បន្ថែមថា រដ្ឋាភិបាល និងសហគ្រាសនានាបានកាត់បន្ថយប្រកបដោយប្រសិទ្ធភាពនូវវិធានការផ្គត់ផ្គង់កាលពីឆ្នាំចាស់ និងបានកាត់បន្ថយតម្រូវការតាមរយៈការកម្រិតប្រតេអ៊ីន និងបន្ថយម្សៅសណ្តែកសៀងក្នុងចំណីជ្រូក៕ People''s Daily/LA