ក្រុងសេអ៊ូលៈ ក្រុមហេកឃឺ (Hacker) បានចូលលួចរូបិយប័ណ្ណឌីជីថលតម្លៃជាង ៣០ លានដុល្លារ ពីទីផ្សារជួញដូររូបិយប័ណ្ណឌីជីថល bitcoin ឈានមុខគេរបស់ប្រទេសកូរ៉េខាងត្បូង ដែលបណ្ដាលឲ្យមានការធ្លាក់ចុះតម្លៃរបស់រូបិយប័ណ្ណនេះជុំវិញពិភពលោកកាលពីថ្ងៃពុធ។
រូបិយប័ណ្ណឌីជីថលនេះ មានតម្លៃ ៦ ៤៤២ ដុល្លារក្នុងមួយ bitcoin នៅពេលជួញដូរក្នុងពេលរសៀលនៅផ្សារហ៊ុនសេអ៊ូល ដែលធ្លាក់ចុះប្រហែល ៤,៤ ភាគរយធៀបនឹងរយៈពេល ២៤ ម៉ោងមុន បន្ទាប់ពីការវាយប្រហារចុងក្រោយបំផុតនេះលើក្រុមហ៊ុន Bithumb ដែលបានបង្កើនក្តីបារម្ភលើសន្ដិសុខរូបិយប័ណ្ណឌីជីថល។
ប្រទេសកូរ៉េខាងត្បូងដែលមានអ៊ីនធឺណិតល្បឿនលឿន បានក្លាយជាទីកន្លែងជួញដូររូបិយប័ណ្ណឌីជីថលមួយ ដែលនៅពេលមួយនោះ ដែលមានប្រតិបត្តិការជួញដូរប្រហែល ២០ ភាគរយនៃប្រតិបត្តិការជួញដូរ bitcoin លើពិភពលោក។
ក្រុមហ៊ុន Bithumb ដែលមានអតិថិជនជាង ១ លាននាក់ គឺជាទីផ្សារដោះដូររូបិយប័ណ្ណឌីជីថលឈានមុខគេនៅក្នុងប្រទេសកូរ៉េខាងត្បូង។
ទីផ្សារដោះដូរនេះបានឲ្យដឹងនៅក្នុងសេចក្ដីប្រកាសព័ត៌មានមួយថា៖ «ក្រុមហ៊ុនសូមបញ្ជាក់ថា រូបិយប័ណ្ណឌីជីថលមានតម្លៃ ៣៥ ពាន់លានវ៉ុន (៣២ លានដុល្លារ) ត្រូវបានគេលួចចាប់ពីជិតភ្លឺកាលពីម្សិលមិញ (ថ្ងៃអង្គារ) រហូតដល់ព្រឹកព្រលឹមថ្ងៃនេះ»។
ក្រុមហ៊ុននេះបានឲ្យដឹងទៀតថា ការដាក់ប្រាក់បញ្ញើ និងការដកប្រាក់ទាំងអស់ ត្រូវផ្អាក ដើម្បី «ធានាសន្ដិសុខ»។ ទីផ្សារដោះដូរនេះបានបន្ថែមថា សម្រាប់ការខាតបង់នេះ ក្រុមហ៊ុនជាអ្នកចំណាយដោយប្រើប្រាស់ទុនបម្រុងផ្ទាល់ខ្លួនរបស់ក្រុមហ៊ុន។
នេះជាការវាយប្រហារដ៏ធំទី ២ លើទីផ្សារដោះដូររូបិយប័ណ្ណឌីជីថលប្រទេសកូរ៉េខាងត្បូង ក្នុងរយៈពេលត្រឹមតែ ១០ ថ្ងៃប៉ុណ្ណោះ បន្ទាប់ពីក្រុមហេកឃឺបានលួចប្រាក់ ៤០ ពាន់លានវ៉ុនពីក្រុមហ៊ុន Coinrail ដែលមានមូលដ្ឋាននៅទីក្រុងសេអ៊ូល ដែលបានបណ្តាលឲ្យក្រុមហ៊ុនផ្អាកសេវាដកប្រាក់ និងដាក់ប្រាក់បញ្ញើចាប់តាំងពីពេលនោះ៕ AFP/LA