ភ្នំពេញៈ ក្រុមហ៊ុន លីលី ហ៊្វូដ អ៊ិនដាសទ្រី ខូ អិលធីឌី ដែលផលិតនំស្រួយ «លីលី» និងសហគ្រាស លាង ឡេង ដែលជាក្រុមហ៊ុនផលិតគ្រឿងទេសក្នុងស្រុកបានក្លាយជាក្រុមហ៊ុនដំបូងគេដោយបានដាក់ពាក្យស្នើសុំស្លាកសញ្ញាផលិតផលកម្ពុជាមានគុណភាព (Cambodia Quality Product) ពីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ដែលក្រសួងនេះទើបចេញប្រកាសឱ្យប្រើប្រាស់ជាសាធារណៈកាលពីថ្ងៃទី ៨ ខែកុម្ភៈ។
លោក រាម ច័ន្ទវណ្ណា អគ្គនាយករងនៃអគ្គនាយកដ្ឋានសហគ្រាសធុនតូច និងមធ្យម និងសិប្បកម្មនៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ បានប្រាប់ ភ្នំពេញ ប៉ុស្តិ៍ថា គិតមកដល់ពេលនេះក្រសួងឧស្សាហកម្ម ទើបតែទទួលបានពាក្យស្នើសុំវិញ្ញាបនបត្របញ្ជាក់សញ្ញាផលិតផលកម្ពុជាមានគុណភាពពីក្រុមហ៊ុនចំនួន ២ គឺក្រុមហ៊ុន នំស្រួយលីលី លើផលិតផលចំនួន ៤ មុខ និងសហគ្រាសផលិតទឹកត្រី ទឹកស៊ីអ៊ីវ ទឹកសៀង ទឹកម្ទេស និងប្រេងខ្យង ឈ្មោះ លាង ឡេង លើមុខផលិតផលចំនួន ៦ មុខ។
លោកនិយាយថា៖ «ក្រុមហ៊ុនទាំង ២ នេះកំពុងស្ថិតក្នុងនីតិវិធីដោយត្រូវធ្វើការប្រជុំសមាជិកនៃគណៈកម្មការផ្តល់សញ្ញាផលិតផលកម្ពុជាមានគុណភាពដើម្បីពិភាក្សា ពិនិត្យវាយតម្លៃ និងអនុម័តជាមុនសិន»។
លោក ច័ន្ទវណ្ណា បានឱ្យដឹងថា ក្រសួង កំពុងពិនិត្យ និងសម្រេចដើម្បីផ្តល់ស្លាកសញ្ញាផលិតផលកម្ពុជាមានគុណភាពដល់ក្រុមហ៊ុន និងសហគ្រាស ២ នេះ។
លោកថ្លែងថា៖ «គណៈកម្មការផ្តល់សញ្ញាផលិតផលកម្ពុជាមានគុណភាពនៃក្រសួងឧស្សាហកម្មនឹងរៀបចំពិធីប្រគល់វិញ្ញាបនបត្របញ្ជាក់សញ្ញាផលិតផលកម្ពុជាមានគុណភាព ជូនដល់ម្ចាស់រោងចក្រ សហគ្រាស និងសិប្បកម្មមួយចំនួនដែលបានដាក់ពាក្យស្នើដំបូងគេបន្តបន្ទាប់»។
អ្នកស្រី កែវ មុំ អគ្គនាយកក្រុមហ៊ុន លីលីហ៊្វូដ ប្រាប់ ភ្នំពេញ ប៉ុស្តិ៍ថា ក្រុមហ៊ុនអ្នកស្រីពិតជាបានស្នើសុំនិមិត្តសញ្ញាបញ្ជាក់គុណភាពពីក្រសួងដើម្បីទទួលបានការទទួលស្គាល់ផលិតផលរបស់ក្រុមហ៊ុនមានគុណភាព។
អ្នកស្រីនិយាយថា៖ «ការទទួលបានស្លាកសញ្ញាផលិតផលកម្ពុជាមានគុណភាពនឹងធ្វើឱ្យអតិថិជនមានទំនុកចិត្តក្នុងការប្រើប្រាស់ផលិតផលរបស់យើងកាន់តែខ្លាំងដោយមិនព្រួយបារម្ភពីការប៉ះពាល់ដល់សុខភាព»។
លោក ស្រ៊ាន ពេជ្រ បុគ្គលិកផ្នែកគ្រប់គ្រងគុណភាព និងសុវត្ថិភាពម្ហូបអាហារ (QC) នៃសហគ្រាស លាងឡេង បានឱ្យដឹងថា សហគ្រាសរបស់លោកបានដាក់ពាក្យស្នើសុំស្លាកសញ្ញាផលិតផលកម្ពុជាមានគុណភាពនៅក្រសួងឧស្សាហកម្មកាលពីខែមុន។
លោក ពេជ្រ បានបន្ថែមថា សហគ្រាស លាង ឡេង គឺជាក្រុមហ៊ុនក្នុងស្រុកឈានមុខនៅកម្ពុជាក្នុងការផលិតទឹកត្រី ទឹកស៊ីអ៊ីវ ទឹកខ្មេះ ទឹកម្ទេស ទឹកសៀង និងទឹកប្រេងខ្យងដែលកំពុងមានទីផ្សារល្អ ដោយការផលិតអនុលោមតាមស្តង់ដាអនាម័យត្រឹមត្រូវ ហើយការទទួលស្គាល់ផលិតផលមានគុណភាព សុវត្ថិភាពពីក្រសួងនេះនឹងផ្តល់ទំនុកចិត្តដល់អ្នកប្រើប្រាស់ថែមទៀត។
លោក ពេជ្រ បន្ត៖ «ខ្ញុំសង្កេតឃើញថា បច្ចុប្បន្ន ផលិតផលខ្មែរយើងកំពុងមានស្តង់ដា ដូច្នេះការទទួលបានសញ្ញាផលិតផលកម្ពុជាមានគុណភាពនឹងជួយពង្រឹងផលិតផលរបស់ខ្មែរយើងក្នុងការចាប់យកឱកាសប្រកួតប្រជែងនៅក្នុងទីផ្សារអន្តរជាតិ»។
លោក តែ តាំងប៉ ប្រធានសម្ព័ន្ធសមាគមសហគ្រាសធុនតូច និងមធ្យមកម្ពុជា (FASMEC) បានសន្យាជួយផ្សព្វផ្សាយដល់សមាជិកឱ្យដាក់ពាក្យស្នើសុំស្លាកសញ្ញានេះក្នុងពេលខាងមុខ ព្រោះវាមានសារៈសំខាន់។
លោកបញ្ជាក់៖ «ខ្ញុំគិតថា សិប្បកម្មផ្សេងៗទៀតគួរប្រញាប់ដាក់ស្នើសុំដើម្បីទទួលបានការបញ្ជាក់គុណភាពផលិតផលដែលពួកគេចាំបាច់ត្រូវធ្វើ»។
បើតាមលោក ហ៊ត ផេង អគ្គនាយកនៃអគ្គនាយកដ្ឋានសហគ្រាសធុនតូច និងមធ្យមនៃក្រសួងឧស្សាហកម្ម សហគ្រាសធុនតូច និងមធ្យមមាន ៥២ ១៥៤ មូលដ្ឋាន នៅមុនដំណាក់កាលនៃការរាតត្បាតជំងឺកូវីដ ១៩ ក្នុងនោះ សហគ្រាសធុនតូច និងមធ្យមសរុប ១៣ ៦៩០ មូលដ្ឋានត្រូវបានបានបិទ និងព្យួរនៅដំណាក់កាលជំងឺកូវីដ ១៩។
លោកថ្លែងថា៖ «យើងចាំបាច់ត្រូវតែពង្រឹងស្តង់ដាអនាម័យដើម្បីមានភាពប្រកួតប្រជែងទាំងការផលិត គុណភាព ការវេចខ្ចប់ដើម្បីចាប់យកឱកាសទីផ្សារអន្តរជាតិ»៕