ក្រុមហ៊ុន​ចំណីអាហារ​បាន​បង្កើន​ការ​ផលិត


130812_11
ការផលិតមីនៅក្នុងរោងចក្ររបស់ក្រុមហ៊ុន ម៉ែន សារុន នាពេលកន្លងមក

ភ្នំពេញៈ សហគ្រាស​ផលិត​ចំណីអាហារ​ក្នុង​ស្រុក​បាន​បង្កើន​ការ​ផលិត​របស់​ខ្លួន​សម្រាប់​ផ្គត់ផ្គង់​ឲ្យ​មាន​ប្រសិទ្ធភាព​និង​ទប់ស្កាត់​ការ​កើនឡើង​តម្លៃ​នៅ​ក្រោយ​ការ​បោះឆ្នោត​។

លោក​ជួន​កុល​អគ្គនាយករង​ក្រុមហ៊ុន​ម៉ែន​សារុន​ជា​ក្រុមហ៊ុន​ផលិត​មី​ក្នុង​ស្រុក​យីហោ​«​មីយើង​»​បាន​ប្រាប់​ភ្នំពេញ​ប៉ុស្តិ៍​កាលពី​ថ្ងៃ​អាទិត្យ​ថា​ក្រុមហ៊ុន​របស់​លោក​បាន​បង្កើន​ការ​ផលិត​ប្រមាណ​៤០​ភាគរយ​បើ​ធៀប​នឹង​ការ​ផលិត​នា​ពេល​កន្លង​មកពី​១​ម៉ឺន​កេស​ទៅ​១៤ ០០០​កេស​ក្នុង​មួយ​ខែ​។

លោក​លើក​ឡើង​ថា​ការ​ផលិត​លើស​ផែនការ​នេះ​បណ្តាល​មកពី​មូលហេតុ​សំខាន់​ៗ​រួម​មាន​ស្ថានភាព​នយោបាយ​បច្ចុប្បន្ន​បាន​នាំ​ឲ្យ​ប្រជាជន​ភ័យខ្លាច​បន្ទាប់ពី​ការ​បោះឆោ្នត​រួច​និង​ក្រោយ​មក​ទៀត​កម្ពុជា​នឹង​ប្រឈម​គ្រោះ​ទឹកជំនន់​ដែល​ត្រូវ​ការ​មីកញ្ចប់​សម្រាប់​ចែកចាយ​។

លោក​បន្ត​ថា​៖​«​យើង​ដឹងថា​ប្រជាជន​យើង​នឹង​នាំ​គ្នា​ទិញ​ភ្លាម​ៗ​ប្រមាណ​២​ម៉ឺន​ទៅ​៣​ម៉ឺន​កេស​។​ប្រជាជន​ភ័យខ្លាច​ខ្លាំង​ពេល​ទៅ​រក​ទិញ​ពី​ហាង​មួយ​ទៅ​ហាង​មួយ​ទៀត​តែ​ស្វែងរក​មិន​បាន​។​ខ្ញុំ​ប្រាប់​អ្នក​លក់​របស់​ខ្ញុំ​មិន​ឲ្យ​ដំឡើង​ថ្លៃ​ទេ​នៅ​ពេល​នោះ​។​ប្រសិន​យើង​ធ្វើ​បែប​នេះ​វា​ហាក់​ដូចជា​សម្លាប់​ប្រជាជន​យើង​អ៊ីចឹង​»។

លោក​និយាយ​ថា​នៅ​យប់​ថ្ងៃ​ទី​២៨​ក្រោយ​ការ​បោះឆោ្នត​និង​ព្រឹក​ថ្ងៃ​ទី​២៩​លោក​បាន​ទទួល​ដំណឹង​ថា​តម្លៃ​មី​មួយ​កេស​ថ្លៃ​រហូត​ដល់​១០​ដុល្លារ​ខណៈ​តម្លៃ​ធម្មតា​ត្រឹម​តែ​បួន​ដុល្លារ​ប៉ុណ្ណោះ​។​ប៉ុន្តែ​តម្លៃ​ហក់​ឡើង​ខ្ពស់​នេះ​មាន​តែ​តាម​កន្លែង​លក់​រាយ​ប៉ុណ្ណោះ​។

លោក​ប៊ុន​សុង​ប្រធាន​ទីផ្សារ​នៃ​សិប្បកម្ម​ផលិត​គុយទាវ​អនាម័យ​ដែល​ទើប​បង្កើត​ឡើង​ថ្មីថ្មោង​បាន​និយាយ​ថា​ស្ថានភាព​លក់​ចេញ​ពី​សិប្បកម្ម​មួយ​នេះ​បាន​កើនឡើង​ខ្លាំង​ណាស់​ក្នុង​មួយ​រយៈ​ចុង​ក្រោយ​នេះ​ហើយ​តាម​ការ​កត់សម្គាល់​សិប្បកម្ម​របស់​លោក​បាន​លក់​កើនឡើង​រហូត​ដល់​ទៅ​២០​ឬ​៣០​ភាគរយ​។​

លោក​បន្ត​ថា​៖​«​យើង​ឃើញ​ការ​កុម្ម៉ង់​ទិញ​មិន​ធម្មតា​។​ ការ​កុម្ម៉ង់​ច្រើន​ណាស់​ហើយ​ថ្ងៃ​ខ្លះ​យើង​អត់មាន​ផលិតផល​ឲ្យ​គេ​ផង​ហើយ​ពេល​ខ្លះ​ទៀត​ម៉ាស៊ីន​យើង​គាំង​ជា​លទ្ធផល​នៃ​ការ​ផលិត​លើស​សមត្ថភាព​របស់​វា​»​។

លោក​ម៉េង​ស័ក្តិ​ធារ៉ា​អគ្គនាយករង​នៃ​អគ្គនាយកដ្ឋាន​ឧស្សាហកម្ម​នៃ​ក្រសួង​ឧស្សាហកម្ម រ៉ែ​និង​ថាមពល បាន​និយាយ​ថា​ស្ថានភាព​កើតឡើង​ក្នុង​រយៈពេល​ខ្លី​បែប​នេះ​លំបាក​ប្រើប្រាស់​ជា​ឧបករណ៍​សម្រាប់​វិភាគ​ស្ថានភាព​សេដ្ឋកិច្ច​រយៈពេល​វែង​ណាស់​។

លោក​បន្ត​ថា​៖​«​ការ​ផ្គត់ផ្គង់​ត្រូវ​តែ​ឆ្លើយតប​តាម​តម្រូវការ​ហើយ​ខ្ញុំ​គិតថា​អ្នក​ផលិត​យល់​ច្បាស់​ពី​ស្ថានភាព​នេះ​ព្រោះ​គេ​ជា​អ្នក​វិនិយោគ​៕

ព័ត៌មានថ្មីៗ