បញ្ជររបស់ Airbus ក្នុងពិព័រណ៍យន្តហោះនៅសិង្ហបុរី។ រូបថត AFP
ក្រុងប៉ារីសៈ ក្រុមហ៊ុន Airbus កាលពីថ្ងៃព្រហស្បតិ៍បានរាយការណ៍ពីការខាតបង់សុទ្ធ ១,៣៦ ពាន់លានអឺរ៉ូ ក្នុងឆ្នាំ ២០១៩ បន្ទាប់ពីរងការពិន័យចំនួន ៣,៦ ពាន់លានអឺរ៉ូ ជុំវិញរឿងអាស្រូវស៊ីសំណូក និងចំណាយលើការអភិវឌ្ឍបន្ថែមសម្រាប់យន្តហោះដឹកជញ្ជូនម៉ូដែល A400M។
.jpg)
ក្រុមហ៊ុនផលិតយន្តហោះមួយនេះបានឲ្យដឹងថា ប្រាក់ចំណេញប្រតិបត្តិការបានកើនឡើង ៦,៩ ពាន់លានអឺរ៉ូ (៧,៥ ពាន់លានដុល្លារ)។ ក្រុមហ៊ុននេះបានបន្ថែមថា ខ្លួនរំពឹងថានឹងចែកចាយយន្តហោះពាណិជ្ជកម្មប្រហែល ៨៨០ គ្រឿង ក្នុងឆ្នាំ ២០២០ ធៀបនឹង ៨៦៣ គ្រឿង នៅឆ្នាំ ២០១៩។
លោក Guillaume Faury ប្រធាននាយកប្រតិបត្តិក្រុមហ៊ុន Airbus ថ្លែងថា៖ «យើងសម្រេចបានកិច្ចព្រមព្រៀងដ៏អស្ចារ្យមួយក្នុងឆ្នាំ ២០១៩។ យើងបានផ្តល់លទ្ធផលហិរញ្ញវត្ថុប្រតិបត្តិការដ៏រឹងមាំដែលត្រូវបានជំរុញដោយការចែកចាយយន្តហោះពាណិជ្ជកម្មរបស់យើង»។
លោកថ្លែងថា៖ «ប្រាក់ចំណេញដែលត្រូវបានរាយការណ៍នេះក៏ឆ្លុះបញ្ចាំងផងដែរអំពីកិច្ចព្រមព្រៀងចុងក្រោយជាមួយអាជ្ញាធរដែលដោះស្រាយការស៊ើបអង្កេតករណីអនុលោមភាព និងការចោទប្រកាន់ទាក់ទងនឹងការសន្មតជាមុននៃការនាំចេញយន្តហោះ A400M ដែលត្រូវបានពិនិត្យមើលឡើងវិញ»។
Airbus បានយល់ព្រមបង់ប្រាក់ពិន័យចំនួន ៣,៦ ពាន់លានអឺរ៉ូ ទៅឲ្យចក្រភពអង់គ្លេសប្រទេសបារាំង និងសហរដ្ឋអាមេរិក ដើម្បីដោះស្រាយការស៊ើបអង្កេតករណីពុករលួយដែលបង្កឡើងដោយការលក់ដែលគួរឲ្យសង្ស័យនានា។
ក្រុមហ៊ុនបានឲ្យដឹងថា ការបញ្ជាទិញយន្តហោះពាណិជ្ជកម្មបានកើនឡើងដល់ ៧៦៨ គ្រឿង កាលពីឆ្នាំមុនពីចំនួន ៧៤៧ គ្រឿង នៅឆ្នាំ ២០១៨៕ KC
