ឡូហ្គោរបស់ HP នៅមុខបរិវេណអគារការិយាល័យក្រុមហ៊ុន។ AFP
ក្រុងវ៉ាស៊ីនតោនៈ ក្រុមហ៊ុន HP Inc. បានឲ្យដឹងកាលពីថ្ងៃអាទិត្យថា ក្រុមហ៊ុនរបស់ខ្លួនបានច្រានចោលសំណើទិញតម្លៃ ៣៣ ពាន់លានដុល្លារ ពីក្រុមហ៊ុន Xerox ដោយនិយាយថា ក្រុមហ៊ុន Xerox ផ្តល់តម្លៃទាបជាងជាក់ស្តែងសម្រាប់ក្រុមហ៊ុនផលិតកុំព្យូទ័រ និងម៉ាស៊ីនបោះពុម្ពមួយនេះ។
.jpg)
ប៉ុន្តែក្រុមប្រឹក្សាភិបាលរបស់ក្រុមហ៊ុន HP បានឲ្យដឹងថា ក្រុមហ៊ុននឹងនៅតែចង់ពិភាក្សាស្វែងរកលទ្ធភាពនៃការឈានដល់កិច្ចព្រមព្រៀងមួយជាមួយក្រុមហ៊ុនជាគូប្រជែងរបស់ខ្លួនពោលគឺជាក្រុមហ៊ុនបច្ចេកវិទ្យាដ៏ចំណាស់មួយរបស់អាមេរិកដែលមានឈ្មោះល្បីដោយសារម៉ាស៊ីនថតចម្លង។
ក្រុមហ៊ុន HP បានឲ្យដឹងក្នុងសេចក្តីថ្លែងការណ៍មួយថា៖ «យើងទទួលស្គាល់អត្ថប្រយោជន៍ប្រកបដោយសក្តានុពលនៃការរួបរួមគ្នា ហើយយើងបើកចំហចំពោះការរុករកថា តើមានតម្លៃដែលត្រូវបានបង្កើតឡើងសម្រាប់ម្ចាស់ភាគហ៊ុនរបស់ក្រុមហ៊ុន HP ដែរឬយ៉ាងណាតាមរយៈការច្របាច់បញ្ចូលគ្នាដែលអាចកើតមានជាមួយក្រុមហ៊ុន Xerox»។
ប៉ុន្តែក្រុមហ៊ុនផលិតកុំព្យូទ័រនេះបន្ថែមថា សមាជិកក្រុមប្រឹក្សារបស់ក្រុមហ៊ុន «មានចំណោទជាមូលដ្ឋានដែលត្រូវដោះស្រាយ» ជាមុន។
ក្រុមហ៊ុនបានឲ្យដឹងទៀតថា ឧទាហរណ៍ប្រាក់ចំណូលរបស់ក្រុមហ៊ុន Xerox បានធ្លាក់ចុះពី ១០,២ ពាន់លានដុល្លារ មកនៅត្រឹម ៩,២ ពាន់លានដុល្លារ គិតចាប់ពីខែមិថុនា ឆ្នាំ ២០១៨ មក។
ហើយក្រុមហ៊ុន HP មានតម្លៃច្រើនជាងក្រុមហ៊ុន Xerox ដោយមានតម្លៃទីផ្សារ ២៧ ពាន់លានដុល្លារ។
ក្រុមហ៊ុន Hewlett-Packard ដែលជាឈ្មោះដើមរបស់ក្រុមហ៊ុន HP គឺជាក្រុមហ៊ុនមួយក្នុងចំណោមក្រុមហ៊ុនបច្ចេកវិទ្យាធំៗនៅតំបន់ Silicon Valle។ ក្នុងឆ្នាំ ២០១៥ ក្រុមហ៊ុននេះបានផ្តាច់ខ្លួនចេញពីអាជីវកម្មផលិតផលសហការ និងសេវាកម្មរបស់ខ្លួនហើយបានចាប់យកអាជីវកម្មផលិតកុំព្យូទ័រ និងម៉ាស៊ីនបោះពុម្ព៕ KC
