រូបភាពប្រាង្គប្រាសាទមរតកបុព្វបុរសក្នុងវីដេអូចម្រៀងទ្វារបេះដូង។ ហ្វេសប៊ុក រស្មីហង្សមាស
ក្រុងបាងកកៈ ក្រុមហ៊ុនផលិតទឹកផ្លែឈើស្រស់ថៃ Malee Group Plc បានសម្រេចកិច្ចព្រមព្រៀងទិញយកក្រុមហ៊ុនលើកដំបូងរបស់ខ្លួនជាមួយក្រុមហ៊ុនផលិតភេសជ្ជៈវៀតណាមដែលជាផ្នែកមួយនៃផែនការយុទ្ធសាស្ត្រប្រកបដោយមហិច្ឆតារបស់ខ្លួនដើម្បីក្លាយជាក្រុមហ៊ុនផលិតអាហារ និងភេសជ្ជៈជំនួយដល់សុខភាពខ្នាតពិភពលោកនៅឆ្នាំ ២០២១។
លោក Roongchat Boonyarat ប្រធានផ្នែកប្រតិបត្តិការក្រុមហ៊ុន Malee បានឲ្យដឹងថាក្រុមហ៊ុននឹងចំណាយថវិកា ៣៣០ លានបាត (ប្រហែល ១០ លានដុល្លារ) ដើម្បីទិញយកភាគហ៊ុនចំនួន ៦៥ ភាគរយនៅក្នុងក្រុមហ៊ុន Long Quan Safe food Join Stock Company (LQSF) នៅប្រទេសវៀតណាម។
ក្រុមហ៊ុន Malee កំពុងពិចារណាពង្រីកអាជីវកម្មនៅប្រទេសវៀតណាម និងបង្កើនសមត្ថភាពផលិតកម្មរបស់ក្រុមហ៊ុនសម្រាប់ការនាំចេញទៅកាន់ប្រទេសជិតខាង និងទីផ្សារកំពុងអភិវឌ្ឍន៍ខ្លាំង។
មូលនិធិនេះនឹងទទួលបានពីទុនបង្វិលរបស់ក្រុមហ៊ុន និងកម្ចីពីធនាគារ។ ក្រុមហ៊ុន Malee រំពឹងថានឹងបញ្ចប់ប្រតិបត្តិការទិញយកក្រុមហ៊ុននេះនៅត្រីមាសទី ២ ។
លោក Opas Lopansri អនុប្រធានជាន់ខ្ពស់ផ្នែកពាណិជ្ជកម្មអន្តរជាតិរបស់ក្រុមហ៊ុន Malee បានឲ្យដឹងថាប្រតិបត្តិការទិញយកក្រុមហ៊ុនផលិតភេសជ្ជៈរបស់វៀតណាមនេះនឹងជួយលើកកម្ពស់អត្ថប្រយោជន៍ប្រកួតប្រជែងរបស់ក្រុមហ៊ុនក្នុងការបម្រើតម្រូវការរបស់អតិថិជនដែលមានប្រាក់ចំណូលមធ្យម និងទាបនៅតំបន់អាស៊ានជាពិសេសនៅហ្វីលីពីន និងឥណ្ឌូនេស៊ី។
LQSF ផលិតកាហ្វេ ទឹកផ្លែឈើស្រស់ចម្រុះ តែបៃតង ទឹកពិសា ចាហួយ និងភេសជ្ជៈផ្សេងៗ៕ BP
