ឡូហ្គោរបស់ក្រុមហ៊ុន Ford នៅមុខទីតាំងលក់រថយន្តនៅអាមេរិក។ រូបថត AFP
ក្រុងញូវយ៉កៈ ទីភ្នាក់ងារវាយតម្លៃ Moody''s បានទម្លាក់ចំណាត់ថ្នាក់ឥណទានរបស់ក្រុមហ៊ុន Ford ដល់ចំណាត់ថ្នាក់មិនល្អ ឬ «junk» កាលពីថ្ងៃចន្ទដោយលើកឡើងពីចក្ខុវិស័យហិរញ្ញវត្ថុទន់ខ្សោយរបស់ក្រុមហ៊ុន ខណៈក្រុមហ៊ុននេះចាប់ផ្ដើមរៀបចំរចនាសម្ព័ន្ធឡើងវិញប្រកបដោយមហិច្ឆតាមួយ។
ការហៅការធ្វើកំណែទម្រង់នៅពេលបច្ចុប្បន្នរបស់ក្រុមហ៊ុនរថយន្តឈានមុខដ៏ធំមួយនេះថាជា «កំណែទម្រង់ដ៏ធំមិនធ្លាប់មាន និងជាបញ្ហាប្រឈម» ទីភ្នាក់ងារវាយតម្លៃចំណាត់ថ្នាក់បំណុលមួយនេះបានកាត់បន្ថយបំណុលរបស់ក្រុមហ៊ុន Ford មកនៅត្រឹមកម្រិត "Ba1" ដែលមិនមែនជាចំណាត់ថ្នាក់វិនិយោគ។ Moody''s បានលើកឡើងថាចក្ខុវិស័យសម្រាប់លំហូរសាច់ប្រាក់របស់ក្រុមហ៊ុន និងអនុបាតប្រាក់ចំណេញក្នុងអំឡុងឆ្នាំ ២០២០-២០២១ គឺមិនល្អ។
Moody''s ឲ្យដឹងថា៖ «ប្រតិបត្តិការរបស់ក្រុមហ៊ុន Ford បានធ្លាក់ចុះ «ក្នុងអំឡុងដែលស្ថានភាពរថយន្តពិភពលោកមានស្ថានភាពល្អប្រសើរ។ នៅពេលនេះក្រុមហ៊ុន Ford ប្រឈមបញ្ហាដោយសារការដោះស្រាយបញ្ហាប្រតិបត្តិការទាំងនេះ និងតម្រូវការនៅក្នុងទីផ្សារសំខាន់ៗកំពុងចុះខ្សោយ និងខណៈឧស្សាហកម្មរថយន្តកំពុងប្រឈមកម្រិតប្រែប្រួលមិនធ្លាប់មានពាក់ព័ន្ធនឹងអគ្គិសនីយកម្មរថយន្ត រថយន្តស្វ័យបើកបរ សេវាតាក់ស៊ីចែករំលែកគ្នាជិះ និងបទប្បញ្ញត្តិបំភាយឧស្ម័នដែលកាន់តែស្មុគស្មាញខ្លាំងឡើងៗ»។
លោក Bruce Clark អនុប្រធានជាន់ខ្ពស់របស់ទីភ្នាក់ងារ Moody''s បានថ្លែងថា៖ «ប៉ុន្តែក្រុមហ៊ុន Ford ពិតជាមានតារាងតុល្យការ និងតួនាទីសាច់ប្រាក់ងាយស្រួលល្អប្រសើរក្នុងការប្រតិបត្តិការ»៕ LA
