ភ្នំពេញ: OYIKA ជាក្រុមហ៊ុនរបស់ប្រទេសសិង្ហបុរី នឹងពង្រីកប្រតិបត្តិការអាជីវកម្មរបស់ខ្លួននៅកម្ពុជាតាមរយៈការផ្ដល់សេវាដល់សហគមន៍ជនបទ ជាកន្លែងដែលអាចប្រតិបត្តិការស្ថានីយប្តូរអាគុយ ដើម្បីកាត់បន្ថយការប្រើប្រាស់ចំហេះខាងក្នុង (ICE) ក្នុងការចាប់ផ្ដើមការប្រើប្រាស់ទោចក្រយានយន្តអគ្គិសនី។
OYIKA បានចូលមកកម្ពុជាកាលពីឆ្នាំ ២០១៩ តាមរយៈការផ្ដល់គំនិតក្នុងការដាក់ឱ្យប្រើប្រាស់ថាមពលអាគុយក្រុមហ៊ុន OYIKA អនុញ្ញាតឱ្យអ្នកជិះទោចក្រយានយន្តអគ្គិសនីផ្លាស់ប្តូរអាគុយដែលអស់ថាមពលជាមួយនឹងអាគុយដែលសាកពេញនៅតាមស្ថានីយផ្លាស់ប្តូរអាគុយនីមួយៗ។
លោក Carl Wong ប្រធានក្រុមហ៊ុននេះបានឱ្យដឹងថាក្រុមហ៊ុននេះបានចាប់ផ្ដើមអាជីវកម្មរបស់ខ្លួននៅក្នុងប្រទេសកម្ពុជាកាលពីខែកក្កដា ឆ្នាំ ២០១៩ ជាមួយនឹងស្ថានីយផ្លាស់ប្តូរអាគុយចំនួន ១០ នៅភ្នំពេញ ហើយបានផ្ដល់ដល់អ្នកជិះនូវគម្រោងបង់ប្រាក់ចំនួន ៦៩ ដុល្លារ ក្នុង ១ ខែ ដែលផ្ដល់ជូននូវទោចក្រយានយន្តអគ្គិសនី ១ គ្រឿង និងគម្រោងផ្លាស់ប្តូរអាគុយសម្រាប់ការធ្វើដំណើរចម្ងាយ ១ ៥០០ គីឡូម៉ែត្រ ក្នុង ១ ខែ។
លោក Carl ថា លោកមិនទាន់ឃើញមានសហគមន៍ផ្ដល់សេវាកម្មធ្វើដំណើរសាធារណៈនៅតាមតំបន់ជនបទនៅឡើយទេ។ ដូច្នេះការចែករំលែកទោចក្រយានយន្តអគ្គិសនីផ្ដល់នូវការធ្វើដំណើរដែលមានតម្លៃសមរម្យ ទៅកាន់សហគមន៍ជនបទដោយមិនចាំបាច់ការធ្វើការទិញយានយន្តជាមុនដើម្បីក្លាយជាម្ចាស់កម្មសិទ្ធិនោះទេ។ ក្រុមហ៊ុនលោកទទួលបាននូវប្រាក់ឧបត្ថម្ភពីកម្មវិធីអភិវឌ្ឍន៍របស់អង្គការសហប្រជាជាតិលើគម្រោងនេះ៕ LA