រូប 3D នៃគម្រោងលំនៅឋានទី ២ សម្រាប់ការលម្ហែកាយនៅខេត្តកំពត។ រូបថត សហការី
កំពតៈ វិនិយោគិនក្នុងស្រុក និងវិនិយោគិនបារាំងបានវិនិយោគរួមគ្នាតម្លៃ ១៨ លានដុល្លារ ក្នុងការបង្កើតគម្រោងលំនៅឋានទី ២ នៅខេត្តកំពត។
.jpg)
លោក ច្រឹក សុខនីម ជាភាគទុនិកក្នុងស្រុក និងជាអគ្គនាយកក្រុមហ៊ុន Century 21 Mekong បានប្រាប់ភ្នំពេញ-ប៉ុស្ដិ៍ថា គម្រោងនេះត្រូវបានវិនិយោគដោយក្រុមហ៊ុន Forest Hamony ដែលជាគម្រោងវិនិយោគរួមមួយ វិនិយោគដោយក្រុមវិនិយោគិនក្នុងស្រុក និងវិនិយោគិនបារាំង ដើម្បីសាងសង់វីឡា ៩០ យូនីត នៅលើផ្ទៃដី ១៨ ហិកតា នៃផ្ទៃដីសរុបជាង ៩៧ ហិកតា នៅជិតក្រុងកំពត។
លោកឲ្យដឹងថា ជាមួយនឹងភាពល្បីរបស់ខេត្តកំពតដែលជាទិសដៅទេសចរណ៍តំបន់ឆ្នេរធម្មជាតិ បន្ទាប់ពីខេត្តព្រះសីហនុគម្រោងផ្ទះទី ២ កំណត់ទិសដៅសម្រាប់ទាំងទេសចរក្នុងស្រុក និងបរទេសដែលចង់មានអចលនទ្រព្យផ្ទាល់ខ្លួននៅក្នុងខេត្តនេះ សម្រាប់ការសម្រាកលម្ហែកាយនៅចុងសប្ដាហ៍ ឬថ្ងៃឈប់សម្រាក។ លោកថ្លែងថា៖ «យើងបានបើកលក់កាលពីថ្ងៃសៅរ៍ជាថ្ងៃដូចគ្នាដែលយើងចាប់ផ្ដើមការសាងសង់ ហើយគិតត្រឹមពេលនេះជាង ១០ ភាគរយ ត្រូវបានកក់ទុកនេះគឺជាសញ្ញាវិជ្ជមានមួយ»។
លោកបន្តថា៖ «ខ្ញុំមើលឃើញនៅពេលនេះប្រជាជនកម្ពុជាជាច្រើនបានបង្កើនប្រាក់ចំណូលរបស់ពួកគេ ដូច្នេះពួកគេចំណាយច្រើនលើការឈប់សម្រាកនៅតាមទីកន្លែងជាច្រើននៅក្នុងប្រទេសនានា ដូច្នេះវាជាពេលវេលាត្រឹមត្រូវសម្រាប់ពួកយើង ក្នុងការចាប់ផ្ដើមគម្រោងលំនៅឋានទី ២ លើកដំបូងនៅខេត្តកំពតនៅក្នុងចំណោមទាំងភ្ញៀវទេសចរក្នុងស្រុក និងបរទេស»។
លោក សុខនីម បានឲ្យដឹងថាវីឡានីមួយៗនឹងត្រូវសាងសង់លើផ្ទៃដីទំហំ ២៤ គុណ ៣០ ម៉ែត្រក្រឡា ដែលមានសួនច្បារ ភោជនីយដ្ឋាន ទីលានបាល់ទាត់ ទីលានវាយកូនបាល់ និងកីឡាកម្សាន្តផ្សេងទៀត។
លោកបន្តគម្រោងសាងសង់វីឡានេះនឹងត្រូវបញ្ចាប់ក្នុងរយៈពេល ២ ឆ្នាំ។
លោក សយ ស៊ីណុល អភិបាលខេត្តកំពតបានឲ្យដឹងថា គម្រោងនេះស្ថិតក្នុងគោលនយោបាយអភិវឌ្ឍន៍ទេសចរណ៍សម្រាប់មនុស្សចូលនិវត្តន៍ និងសម្រាប់ប្រជាជនក្នុងស្រុកដែលចង់ឈប់សម្រាកចុងសប្ដាហ៍។
លោកបន្ថែមថា៖ «នឹងមានការរួមចំណែកដ៏ល្អមួយសម្រាប់ការទាក់ទាញរបស់វិស័យទេសចរណ៍នៅខេត្តរបស់ខ្ញុំ ដោយសារវាស្របជាមួយនឹងគោលនយោបាយរបស់យើងដែលយើងចង់អភិវឌ្ឍគម្រោងលំនៅឋានទី ២ សម្រាប់ប្រជាជនវ័យចាស់ និងប្រជាជនចូលនិវត្តន៍»។
កម្ពុជាជាកន្លែងដ៏ពេញនិយមបំផុតរបស់ជនបរទេសដែលសុបិនចង់រស់នៅតាមជីវិតប្រណីតបំផុតនៅក្នុងតម្លៃទាប។ នេះបើតាមសន្ទស្សន៍ចូលនិវត្តន៍ពិភពលោកប្រចាំឆ្នាំរបស់ការរស់នៅអន្តរជាតិឆ្នាំ ២០១៩ ដែលចេញផ្សាយកាលពីខែកុម្ភៈ៕LA
