ទីក្រុងប៉េកាំងៈ អាជ្ញាធរចិននឹងបន្ធូរបន្ថយការគ្រប់គ្រងការឆ្លងដែនចូលប្រទេសចិន សម្រាប់ប្រទេសជាច្រើនទាំងក្នុងតំបន់អាស៊ី និងតំបន់អឺរ៉ុបដោយអនុញ្ញាតឲ្យប្រជាជនអាចធ្វើដំណើរទៅកាន់ទីក្រុងជាច្រើន។
ប្រព័ន្ធផ្សព្វផ្សាយរបស់ចិនបានរាយការណ៍ថា រដ្ឋបាលអាកាសចរណ៍ស៊ីវិលប្រទេសចិន (CAAC) នឹងអនុញ្ញាតឲ្យក្រុមហ៊ុនអាកាសចរណ៍ទាំងក្នុងស្រុក និងបរទេសដាក់ពាក្យសុំការហោះហើរតាមតម្រូវការ «green channels» សម្រាប់ការហោះហើរលក្ខណៈជួល (chartered flights) ទៅកាន់អាកាសយានដ្ឋានប្រទេសចិន។
ប្រទេសដែលទទួលបានការអនុញ្ញាតឲ្យហោះហើរទៅកាន់ប្រទេសចិនមានប្រទេសសិង្ហបុរី ជប៉ុន អង់គ្លេស អាល្លឺម៉ង់ បារាំង អ៊ីតាលី និង ប្រទេសស្វ៊ីស។ នេះបើយោងតាមសេចក្តីរាយការណ៍របស់ប្រព័ន្ធផ្សព្វផ្សាយក្នុងស្រុក។
យោងតាមសេចក្តីជូនដំណឹងរបស់ CAAC ប្រតិបត្តិករហោះហើរអាចដាក់ពាក្យទៅកាន់បញ្ញត្តិករផ្លូវអាកាសនៅថ្នាក់ខេត្តដើម្បីដឹកអ្នកដំណើរតាមការជួល។
នៅពេលប្រទេសចិន ប៉ុនប៉ងដើម្បីត្រួតពិនិត្យសេដ្ឋកិច្ចរបស់ខ្លួនដែលរាំងស្ទះដោយសារការផ្ទុះឡើងវីរុសកូរ៉ូណា ប្រទេសចិន ត្រូវការអ្នកជំនាញ និងកម្មករជំនាញដូចជានៅក្នុងក្រុមហ៊ុនបរទេស ឬក្រុមហ៊ុនចូលទុនគ្នា ដើម្បីបន្តការងារឡើងវិញ។
ប្រទេសកូរ៉េខាងត្បូងជាប្រទេសទី ១ ដែលបង្កើត «green channel» ជាមួយប្រទេសចិនកាលពីដើមខែនេះ។ អ្នកដំណើរធុរកិច្ចរបស់កូរ៉េត្រូវបានអនុញ្ញាត ឲ្យធ្វើដំណើរទៅកាន់តំបន់ចំនួន ១០ រួមទាំងទីក្រុងសៀងហៃ Tianjin និង Chongqing បន្ទាប់ពីឆ្លងកាត់ការត្រួតពិនិត្យសុខភាពបឋម និងការធ្វើចត្តាឡីស័ក។
កម្មករជំនាញកូរ៉េជាង ២០០ នាក់ជាក្រុមទី ១ ត្រឡប់ទៅកាន់ទីក្រុង Tianjin កាលពីថ្ងៃទី ១០ ខែឧសភា ដើម្បីបន្តការងារនៅក្រុមហ៊ុនបុត្រសម្ព័ន្ធរបស់ Samsung ដែលភាគច្រើនផលិតសម្ភារអេឡិចត្រូនិក។
មន្ត្រីរដ្ឋាភិបាលសិង្ហបុរីបានជជែកជាមួយសមភាគីចិនដើម្បីចាប់ផ្តើមបង្កើតឡើងវិញចំពោះការធ្វើដំណើរចាំបាច់នានា ហើយសេចក្តីប្រកាសរំពឹងចេញឆាប់។
ប្រទេសសិង្ហបុរី ក៏បានជជែកជាមួយអូស្ត្រាលី កាណាដា នូវែលសេឡង់ និងកូរ៉េខាងត្បូង ដើម្បីបង្កើតឡើងវិញនូវដំណើរឆ្លងដែនសំខាន់ៗ។
កាលពីថ្ងៃពុធលោក Li Jian នាយករង CAAC បាននិយាយថា អាជ្ញាធរនឹងពិចារណាបង្កើនចំនួនជើងហោះហើរដើម្បីបំពេញតម្រូវការទីផ្សារ។
ចិនបានបិទព្រំដែនរបស់ខ្លួនដល់ជនបរទេសរួមទាំងអ្នកដែលកាន់លិខិតអនុញ្ញាតការងារមានសុពលភាពកាលពីចុងខែមីនាក្នុងកិច្ចខិតខំប្រឹងប្រែងដើម្បីទប់ស្កាត់ការនាំវីរុសចូលទៅក្នុងប្រទេស។
ចិនក៏បានកាត់បន្ថយចំនួននៃការហោះហើរដែលអនុញ្ញាតឲ្យក្រុមហ៊ុនអាកាសចរណ៍នីមួយៗ ហោះហើរតែ ១ លើកចូល និងចេញប្រទេសចិនក្នុង ១ សប្តាហ៍។
ចាប់តាំងពីពេលនោះមកអាកាសចរណ៍សិង្ហបុរីដែលភ្ជាប់ការហោះហើរសំខាន់ទៅកាន់ប្រទេសចិន បានប្រតិបត្តិការហោះហើរត្រង់ប្រចាំសប្តាហ៍ពីសិង្ហបុរីទៅទីក្រុងស៊ាងហៃ ខណៈដែលអាកាសចរណ៍ Silk Air ហោះហើរទៅនិងមកទីក្រុង Chongqing ១ ជើងក្នុង ១ សប្តាហ៍។Straitstimes/RR